Read Ngaju MALEAKHI 1 Bible Online

MALEAKHI 1 - Ngaju bible

MALEAKHI 1

¹Jetoh peteh TUHAN akan Maleakhi uka inyampai akan ungkup Israel.

² TUHAN hamauh dengan ungkup Ayue, “Aku sinta dengan keton.” Tapi ewen tombah, “Kilen ampie TUHAN sinta ikei?” TUHAN tombah, “En dia Esau kaka Yakob? Tapi Yakob inyayang-Ku,

³hemben te kea Esau inyingi-Ku. Tanah je habukit eka Esau melai jari imparusak awi-Ku, tuntang petake inyarah-Ku akan kare meto basiak intu padang pasir.”

⁴Amon turonan Esau je oloh Edom te hamauh, “Kare lewun keton jadi imparusak, tapi ikei kareh mamangue haluli,” palus TUHAN kareh tombah, “Ewen tau mamangun haluli, tapi Aku kareh manderepe. Ewen kareh inyewut ‘Lewu darhaka’ tuntang ‘Bangsa je buah kalait Hatalla sampai katatahie.’ ”

⁵Oloh Israel kareh mitee kabuat, tuntang hamauh, “TUHAN toto hai, kuasan Aie sampai intu luar tanah Israel!”

⁶TUHAN Je Jaton Tikas Kuasae hamauh dengan kare imam, “Ije biti anak mahormat bapae, tuntang ije biti ayang mahormat tuan ayue. Aku toh Bapam; mbuhen keton dia mahormat Aku? Aku toh TUHAN keton; mbuhen keton dia mikeh dengangku? Keton manawah Aku, tapi keton misek, ‘Dengan cara kilen ampie ikei manawah ikau?’

⁷Dengan maluput panginan je dia patut akan lndu parapah intu hunjun mesbeh aing-Ku. Palus keton misek, ‘Dengan cara kilen ikei manawah ikau?’ Dengan cara mamapa mesbeh aing-Ku.

⁸ Amon keton maluput akang-Ku meto je babute, je haban tuntang je lumpuh, en dia jete gawi je sala? Coba manenga meto kalote akan Gubernur! En ie kareh sanang tuntang manarima keton dengan bahalap?”

⁹Toh, o kare imam, keleh balaku dengan Hatalla mangat Ie masi itah. Ie dia baka tombah lakudoan keton, tuntang jete kasalan keton kabuat.

¹⁰TUHAN Je Jaton Tikas Kuasae hamauh, “Labih bahalap bauntonggang Humang-Ku iatep, awi ngahus keton mantokan apui intu hunjun mesbeh aing-Ku. Aku dia rajin dengan keton, tuntang dia nahuang manarima parapah keton.

¹¹Aku ihormat awi kare Bangsa oloh hapus kalunen. Hong hete-hete imapui garo hapa mahormat arang-Ku tuntang iluput parapah je patut, awi uras bangsa mahormat Aku.

¹²Tapi keton manawah Aku awi manyangka mesbeh aing-Ku dia barega, tuntang maluput intu hete panginan je ingabele keton.

¹³Koan keton, ‘Ikei jari peda dengan kakare taloh te’, tuntang keton manawah Aku. Keton mimbit meto hasil takau, meto je lumpuh atawa haban akan iluput akang-Ku. En tumon tirok keton Aku nahuang manarima parapah keton te?

¹⁴Tarasapa oloh panipu je maluput akang-Ku meto je dia barega, amon marak metoe aton meto je bahalap je jari injanjie akang-Ku! Awi aku Raja Hai, tuntang ihormat awi kakare bangsa.”