Read Ngaju MALEAKHI 3 Bible Online

MALEAKHI 3 - Ngaju bible

MALEAKHI 3

¹ Tombah TUHAN Je Jaton Tikas Kuasae, “Aku kareh manyoho sarohangku akan manatap jalan akangku. Palus salenga ih Aku, TUHAN je inggau keton, kareh dumah akan Humang-Ku. Sarohan je eka kataharun keton te kareh dumah tuntang mambarita janjing-Ku.”

² Tapi eweh olih belom metoh andau TUHAN dumah tuntang mamparahan bitin Aie? Awi Ie sama kilau apui ain tukang tinih sanaman, tuntang kilau sabun ain tukang mampukan.

³Ie dumah akan mamutus, kilau oloh je marasih tuntang mampalinyau perak. Tumon te sarohan TUHAN kareh mamparasih kare imam, mangat ewen maluput kare parapah dengan cara je ingahandak TUHAN.

⁴Palus sama kilau intu jaman horan, TUHAN kareh mangilak kare parapah je iluput Akae awi ungkup Yuda tuntang Yerusalem.

⁵Koan TUHAN Je Jaton Tikas Kuasae, “Aku kareh dumah tanggoh keton akan mamutus. Aku kareh bajeleng manjadi saksi taharep tukang sihir, kare oloh je habandong, je jadi saksi pananjaro, je mangurang upah oloh bagawi, je mamparugi kare balo, nule tuntang oloh tamuei, uras kare oloh je dia mahormat Aku.”

⁶“Aku TUHAN tuntang Aku dia hobah. Awi te keton turonan Yakob, dia imbinasa.

⁷Kilau tato hiang keton horan, keton uras jari mahiwang bara kare parentah-Ku tuntang dia baketep malalus jete. Keleh haluli talih Aku, palus Aku kea kareh haluli dengan keton. Tapi keton misek, ‘Narai je patut ilalus ikei uka haluli dengan TUHAN?’

⁸Toh Aku misek dengan keton: En tau olon manipu Hatalla? Batantu dia. Tapi keton manipu Aku kea. Keton misek, ‘Kilen ampie?’ Tombah aku: Huang mambayar sapersapuluh tuntang manenga parapah.

⁹Hapus bangsa manipu Aku, palus keton uras buah sapa.

¹⁰ Imbit sapersapuluh bara pengasilan keton samandiai akan Humang-Ku mangat are panginan intu hete. Riksa Aku, palus keton kareh mite, je Aku muap kare bauntonggang sorga tuntang mangontep keton dengan kare taloh je bahalap.

¹¹Aku kareh dia manalua hama marusak hasil petak keton; kare batang anggor keton kareh labat buae.

¹²Palus keton kareh inyewut salamat awi kakare bangsa, awi lewun keton jadi eka je bahalap akan eka melai.”

¹³TUHAN hamauh, “Kare auh keton toto manawah Aku. Tapi keton misek, ‘Narai je insanan ikei tahiu ikau?’

¹⁴Keton hamauh, ‘Ngahus bewei manempo Hatalla. Narai guna malalus kapatut itah akan TUHAN Je Jaton Tikas Kuasae, atawa mamparahan Akae je itah manyasal tagal kasalan itah?

¹⁵Itah mite kabuat je oloh bajoho sanang. Oloh papa dia baya sasar mangat, tapi amon ewen mariksa kasabar Hatalla dengan mawi kapapa, ewen liwus kea.’ ”

¹⁶Palus kare oloh je mikeh dengan TUHAN hakotak sama arepe. TUHAN mahining tuntang manirok taloh je inahiu ewen. Kare oloh je mahormat Ie tuntang mikeh taharep Ie, inyurat arae intu huang ije buku catetan je aton intu taharep Ie.

¹⁷TUHAN Je Jaton Tikas Kuasae hamauh, “Ewen kareh jadi ungkup-Ku. Hong andau Aku malalus janjing-Ku, ewen kareh jadi oloh ayung-Ku je inyinta-Ku. Aku kareh sinta ewen, kilau ije biti bapa sayang dengan anak je manempo ie.

¹⁸Ungkup-Ku kareh mite kabeken kajarian oloh je bahalap tuntang oloh je papa tinai kajarian oloh ije manempo Aku tuntang je dia manempo Aku.”