Read Ngaju MATEUS 1 Bible Online

MATEUS 1 - Ngaju bible

MATEUS 1

¹Jetoh daptar tato hiang Yesus Kristus, Turonan Dawid, Turonan Abraham. Aran kare tato hiang Yesus bara Abraham sampai Dawid te kalotoh:

²Abraham, Isaak, Yakob, Yuda tuntang kare paharie, Peres tuntang Serah (indu ewen te arae Tamar), Hesron, Aram, Aminadab, Nahason, Salmon, Boas (indue te Rahab), Obed (indue te Rut), Isai, tuntang Raja Dawid.

⁶ Bara Dawid sampai katika oloh Israel inawan akan Babel maka aton tarasurat kare aran toh: Salomo (indue te solake sawan Uria), Rahabeam, Abia, Asa, Yosapat, Yoram, Usia, Yotam, Ahas, Hiskia, Manase, Amon, Yosia, Yekhonia tuntang kare paharie.

¹²Bara wayah oloh Israel inawan akan Babel sampai Yesus inakan, maka aton tarasurat kare aran toh: Yekhonia, Sealtiel, Serubabel, Abihud, Eliakim, Asor, Sadok, Akhim, Eliud, Eleasar, Matan, Yakob, Yosep, banan Maria. Tuntang bara Maria te jari inakan Yesus je inyewut Kristus.

¹⁷Jadi bara Abraham sampai Dawid, samandiaie aton epat walas turonan. Bara Dawid sampai wayah oloh Israel inawan akan Babel sampai Kristus inakan, aton tinai epat walas turonan kea.

¹⁸ Kalotoh auh saritae tahiu Yesus Kristus inakan. Indu Ayue, iete Maria, batunangan dengan Yosep. Tapi helo bara ewen kawin, te gitan ampin Maria te jari mimbit arepe. Tapi Yosep jaton katawan je Maria te batihi awi Roh Hatalla.

¹⁹Yosep, tunangae te, puna oloh je baketep manumon kare atoran agama. Jadi ie handak manggeto hubungae dengan tunangae te suni-suni uka Maria dia impahawen hong taharep oloh are.

²⁰Pandehan Yosep manirok hal te, te ie tapatiroh palus nupi. Hong nupie te ie mite ije malekat Tuhan hamauh dengae, “Yosep, Turonan Dawid, ela mikeh kawin dengan Maria; basa anak je huang kanaie te manjadi awi kuasan Roh Hatalla.

²¹ Maria kareh manak ije biti anak hatue. Ikau musti manenga aran anak te Yesus, karana Ie manyalamat ungkup Ayue bara dosan ewen.”

²²Taloh handiai te manjadi kalote uka tulus taloh je insanan Tuhan mahalau nabi Ayue, iete,

²³ “Ije biti bujang salia kareh batihi tuntang manak ije anak hatue. Anak te kareh inggare Imanuel.” (Imanuel jete auh kotak bara basa Ibrani, rimae, “Hatalla aton hinje itah”.)

²⁴Limbah te Yosep misik, ie malalus taloh je insanan malekat Tuhan te akae.

²⁵ Ie kawin dengan Maria. Tapi katahin Maria hindai luas anak te, Yosep dia hinje batiroh dengan Maria. Limbah anak te jari inakan, Yosep manenga arae Yesus.