Read Ngaju MATEUS 11 Bible Online

MATEUS 11 - Ngaju bible

MATEUS 11

¹Limbah Yesus manenga kare nasehat te akan due walas murid Ayue, Ie malihi eka te. Ie haguet majar tuntang manyiar peteh Hatalla hong kare lewu je tokep hete.

²Yohanes Pampandoi je metoh hong penjara, mahining tahiu gawin Kristus. Palus ie manyoho pire-pire murid Ayue haguet manalih Yesus uka misek,

³“En Bapa toh oloh je akan dumah manumon janjin Hatalla, atawa musti ikei mentai oloh beken?”

⁴Yesus tombah, “Buli ih talih Yohanes, tuntang sanan akae taloh je ihining tuntang gitan keton:

⁵ Oloh babute tau mite, oloh lumpuh tau mananjong, oloh je buah panyakit kulit je bakaike-ikeh keleh;[9] oloh badengen tau mahining, oloh matei belom haluli, tuntang Barita Bahalap bara Hatalla imbarita akan kare oloh je belom susah.

⁶Salamat oloh je dia aton saketa hapae manolak Aku!”

⁷Limbah kare sarohan Yohanes te haguet Yesus nampara hakotak dengan oloh are tahiu Yohanes, koae, “Keton manalih padang pasir handak mite narai? Ije kalambar oru je inariup riwutkah?

⁸Keton handak haguet mite narai? Mite oloh je hapakaian bahalapkah? Kare oloh je hapakaian kalote aton melai huang istana!

⁹Jadi mbuhen keton haguet akan padang pasir? Handak mite ije biti nabikah? Toto, labih haream bara ije biti nabi.

¹⁰ Karana Yohanes te je inyewut huang ayat Surat Barasih toh, ‘Jetoh ie sarohang-Ku, koan Hatalla, Aku manyoho ie helo bara Ikau uka ie muap jalan Akam.’

¹¹Ingat! hong kalunen toh dia puji aton oloh je labih hai bara Yohanes Pampandoi. Aloh kalote, oloh je pangkakorike bara kare anak ungkup ain Hatalla, labih hai bara Yohanes.

¹² Bara katika Yohanes mangabar baritae sampai katika toh, ungkup ain Hatalla ilawan awi kare oloh je manggau akal handak manguasae hapan kakarase.

¹³Sampai panumah Yohanes, kakare hukum Moses tuntang auh ajar kare nabi, uras manujum tahiu kare taloh je musti manjadi.

¹⁴ Tuntang amon keton handak percaya, Yohanes te jete Elia, je pandumahe jari inujum.

¹⁵Amon aton pinding, keleh mahining!

¹⁶Hapan en Aku musti mananding kare oloh jaman jetoh? Ewen kilau anak oloh je mondok hong pasar. Ije kakawan ewen te mangkariak dengan awang beken,

¹⁷‘Ikei manyanyi lagu rami akan keton, tapi keton dia maku manari! Ikei manyanyi lagu kajake, tuntang keton dia maku manangis!’

¹⁸Yohanes dumah — ie puasa tuntang dia mihop anggor; tuntang kare oloh hamauh, ‘Ie ingumpang setan!’

¹⁹Toh Anak Olon dumah — Ie kuman tuntang mihop; balalu kare oloh hamauh, ‘Ite oloh te! Babungo, pambusau, sobat panagih pajak tuntang sobat oloh badosa.’ Aloh kalote, kapintar kaharatin Hatalla gitan bara kare hasile.”

²⁰Balalu Yesus nampara manida ampin kasalan kare lewu je ekae paling are mawi taloh heran. Basa kare oloh huang lewu te dia maku hobah bara kare dosan ewen.

²¹ “Calaka keton, Korasim! Tuntang calaka kea ikau Betsaida! Paribasa kare taloh heran je iawi hong marak keton jari iawi hong Tirus tuntang Sidon, pasti kare oloh hete jari tahi hobah bara kare dosan ewen tuntang mahapan pakaian oloh je kapehe atei tagal pampatei hayak mambowor kawo hunjun takoloke.

²²Ingat, hong Andau Kiamat, kare oloh Tirus tuntang Sidon labih murah mandino ampun bara Hatalla amon inanding dengan ampun je dinon keton!

²³ Tuntang keton, Kapernaum! En keton inggatang sampai akan sorga? Dia! Malahan keton kareh inganan akan apui naraka! Basa paribasa kare tanda heran je iawi marak keton te jari iawi hong Sodom, Sodom te mahin magon aton sampai wayah toh!

²⁴ Ingat, hong Andau Kiamat, oloh Sodom akan labih murah iampun awi Hatalla bara keton!”

²⁵Hong katika te Yesus balakudoa, “Bapa, Tuhan je manguasa langit tuntang petak. Aku manarima kasih Akam tagal taloh handiai te je inyahokan Awim bara kare oloh pintar tuntang oloh bailmu, tapi Ikau mamparahae akan kare oloh je jaton pangatawae.

²⁶Jete bewei je manyanang atei Bapa.”

²⁷ Palus Yesus hamauh, “Kare taloh handiai jari inyarah Bapa akang-Ku. Jaton ije biti oloh mangasene Anak, beken bara Bapa. Jaton kea je mangasene Bapa, beken bara Anak, tuntang kare oloh je akae Anak te jari mamparahan Bapa.

²⁸Keleh dumah talih Aku keton samandiai je heka, tuntang je mangkeme katanggongan; Aku handak mampangat keton.

²⁹ Keleh manumon auh parentah-Ku tuntang keleh bajar dengang-Ku. Basa Aku toh balemo tuntang randah atei, maka keton kareh mangkeme kamangat.

³⁰Karana kare parentah-Ku mampangat, tuntang tanggongan je inenga-Ku akan keton te mahian.”