Read Ngaju MATEUS 12 Bible Online

MATEUS 12 - Ngaju bible

MATEUS 12

¹ Hong ije andau Sabat, metoh Yesus mahalau ije padang gandom, kare murid Ayue manampara mamutik gandom palus kumae awi balau.

²Katika kare oloh Parisi mite hal te, ewen hamauh dengan Yesus, “Ite! Kare murid Ayum malanggar hukum agaman itah awie malalus taloh je ingahana hong andau Sabat.”

³ Yesus tombah, “En keton hindai puji mambasa taloh je iawi Dawid metoh ie tuntang kare oloh ayue balau?

⁴ Ie tame akan huang Human Hatalla; palus kuman rote je jari inyarah akan Hatalla. Padahal manumon hukum agaman itah, ie tuntang kare oloh ayue te dia tau kuman rote te — baya kare imam ih je tau.

⁵ Atawa keton hindai puji mambasa intu huang hukum ain Moses je genep andau Sabat, kare imam je bagawi hong Human Tuhan, malanggar atoran andau Sabat, tapi dia inyalan?

⁶Hining taloh je koang-Ku toh: intu hetoh aton ije je labih hai bara Human Tuhan.

⁷ Huang Surat Barasih aton tarasurat: Gawin asi je ingahandak-Ku, dia ie parapah. Jaka keton toto-toto harati auh toh, pasti keton dia handak manyalan kare oloh je dia basala.

⁸Karana Anak Olon aton kuasan Aie hunjun andau Sabat.”

⁹Yesus malihi eka te palus haguet akan ije huma sombayang.

¹⁰Hete aton due biti oloh je matei lengee silae. Pire-pire oloh je tantai handak manggau kasalan Yesus, misek intu Ie, “En tau mampakeleh oloh hong andau Sabat?”

¹¹ Yesus tombah, “Paribasa aton ije biti bara keton tempon tabiri ije kongan, tuntang hong andau Sabat tabiri te manjato akan huang lowang je handalem; en diakah oloh je tempon tabiri te manggau jalan mangat mampalua tabiri te bara huang lowang te?

¹²Nah, olon labih barega bara tabiri! Jadi, amon kalote, tau ih mandohop oloh hong andau Sabat.”

¹³Limbah te Yesus hamauh dengan oloh je matei lengee silae te, “Tajok lengem.” Oloh te mantajok lengee, tuntang lengee te keleh sama kilau lengee je silae.

¹⁴Tapi kare oloh Parisi malihi huma sombayang te, palus pakat uka mampatei Yesus.

¹⁵Yesus katawan kare oloh Parisi te aton kahandak atei ewen je papa intu Ie. Jadi Ie haguet bara eka te tuntang are oloh manuntut Ie. Balalu Ie mampakeleh kakare oloh je haban.

¹⁶Tapi Ie mangahana ewen mansanan akan oloh beken tahiu Ie.

¹⁷Kalote maka manjadi taloh je insanan Hatalla mahalau nabi Yesaya,

¹⁸ “Jetoh ie sarohang-Ku je iintih-Ku Oloh je inyinta-Ku tuntang manyanang atei-Ku. Roh-Ku handak inenga-Ku Akae, kaadilan ayung-Ku kareh imbarita akan kare bangsa.

¹⁹Ie dia akan mawi karidu kalahi atawa mangkariak, atawa bapidato hong kare jalan hai.

²⁰Dereh je nantahulei kareh dia imelek Awie lantera je pini-pinit kareh dia Ie mambelepe. Ie kareh manaharep kare tantangan sampai olih mandino kaadilan;

²¹Kare bangsa mingkes kaharape intu Ie.”

²²Limbah te oloh mimbit manalih Yesus ije biti oloh babute tuntang bisu awi kuasan setan. Yesus mampakeleh oloh te sampai ie tau hakotak tuntang mite.

²³Kakare oloh hengan tuntang hamauh, “En puna Ie toh Anak Dawid je injanji te?”

²⁴ Katika kare oloh Parisi mahining jete, ewen tombah, “Oloh toh baya olih Ie maharak setan, awi Beelsebul, kapalan kare setan te, jari manenga kuasa Akae.”

²⁵Yesus katawan auh tirok kare oloh Parisi te. Jadi, Ie hamauh dengan ewen, “Amon ije negara tapisah-darai awi kare baris oloh je hamusoh sama arepe, negara te dia olih batahan, tuntang ije lewu atawa keluarga je tapisah-darai tuntang hamusoh sama arepe, akan rusak.

²⁶Kalote kea huang karajaan setan; amon ije baris maharak baris je beken, maka karajaan setan te jari bapusit tuntang akan baduroh.

²⁷Koan keton Aku toh maharak setan hapan kuasan Beelsebul! Amon kalote, hapan kuasan en kare murid keton maharak setan? Kare murid keton te kabuat je mambukti keton te sala!

²⁸Tapi Aku maharak setan hapan kuasan Roh Hatalla. Tuntang jete rimae Hatalla jari nampara marentah marak keton.

²⁹Kilen ampie oloh olih tame akan huang human ije biti oloh gancang uka marampas ramoe, amon dia ie labih helo manjarat oloh gancang te? Limbah te harue ie olih marampas ramoe.

³⁰ Oloh je dia mamihak Aku, ie toto-toto malawan Aku. Tuntang oloh je dia mandohop Aku, ie puna handak marusak gawing-Ku!

³¹Awi te buah keton katawan, amon oloh mawi dosa tuntang mampalua auh je mamapa,[10] ie tau iampun! Tapi amon ie mahina Roh Hatalla, ie dia tau iampun!

³² Amon oloh mawi auh je malawan Anak Olon, ie tau iampun, tapi amon oloh mamapa Roh Hatalla, ie dia olih iampun, aloh wayah toh aloh hong wayah je rahian!”

³³ “Mangat tau mandino bua je bahalap, maka batang musti basiwoh. Amon batange dia basiwoh, buae kea dia bahalap. En batange te basiwoh atawa dia, tau ingatawan bara buae.

³⁴ Keton toh oloh papa, kilen ampie keton olih mansanan taloh bahalap amon keton papa. Taloh je impalua awi nyame, jete lembut bara atei!

³⁵Oloh bahalap mansanan kare taloh bahalap awi ie kontep dengan kahalap. Tapi oloh papa mansanan kare taloh je papa awi ie kontep dengan kapapa.

³⁶Jadi, ingat: hong Andau Kiamat genep biti musti mananggong kare kotake je dia baguna.

³⁷Karana auh bawak kotakm bewei je akan ihapan uka mamutus en ikau sala atawa dia.”

³⁸ Limbah te pire-pire guru agama tuntang kare oloh Parisi hamauh, “Pa Guru, ikei handak mite Bapa mawi taloh heran.”

³⁹ “Lalehan kapapae tuntang kadarhakae kare oloh jaman jetoh!” koan Yesus tombah. “Keton balaku Aku mawi taloh heran? Ije tanda heran mahin dia olih inenga akan keton, kacuali taloh heran je iawi Nabi Yona.

⁴⁰ Yona melai telo andau telo alem intu huang kanain lauk hai. Kalote kea Anak Olon telo andau telo alem melai intu huang kanain petak.

⁴¹ Hong Andau Kiamat, oloh lewu Niniwe kareh harikas haya-hayak dengan oloh jaman jetoh tuntang mandawa ewen. Basa kare oloh Niniwe te hobah bara kare dosan ewen, katika Yona bahotbah akan ewen. Tapi hong hetoh wayah toh aton ije je labih hai bara Yona!

⁴² Hong Andau Kiamat, raja bara hila Salatan kareh hingkat haya-hayak dengan kare oloh jaman jetoh tuntang mandawa ewen. Basa mangat tau mahining auh ajar Salomo je pintar harati, maka raja bawi te mawi jalanae je kejau toto bara tapakan kalunen. Tapi intu hetoh metoh toh aton je labih hai bara Salomo!”

⁴³“Amon roh papa malihi ije biti oloh, roh te mangumbang kare eka je keang uka manggau ekae manyandehan, tapi ie jaton sondau ekae.

⁴⁴Tagal te ie hamauh, ‘Terai, aku buli akan humangku je jari ilihiku.’ Metoh ie sampai hete, huma te buang, barasih tuntang bungas.

⁴⁵Palus ie haguet tuntang mimbit uju roh beken je labih papa bara ie. Limbah te ewen tame akan huang oloh te, palus melai hete. Tuntang ampin oloh te menjadi labih papa bara helo. Jete kea je kareh menjadi buah kare oloh papa jaman jetoh.”

⁴⁶Pandehan Yesus magon hakotak dengan oloh are te, maka dumah indue tuntang kare paharie. Ewen mendeng intu luar tuntang manggau jalan mangat tau hakotak Dengae.

⁴⁷Ije bara kare oloh are te hamauh dengan Yesus, “Pa, indu tuntang paharin Bapa aton intu luar. Ewen handak hakotak dengan Bapa.”[11]

⁴⁸Balalu Yesus tombah, “Eweh indu-Ku? Eweh paharing-Ku?”

⁴⁹Balalu ie maninjok akan hila kare murid Ayue tuntang hamauh, “Jetoh ie indu-Ku tuntang paharing-Ku.

⁵⁰Oloh je malalus kahandak Bapa-Ku je huang sorga, jete paharing-Ku hatue, paharing-Ku bawi tuntang indu-Ku.”