Read Ngaju MATEUS 13 Bible Online

MATEUS 13 - Ngaju bible

MATEUS 13

¹Hong andau te kea Yesus malihi huma te palus haguet akan saran danau tuntang mondok hete.

² Are toto oloh je mangarimbong Yesus, awi te Ie haguet mondok huang arut, tuntang oloh are te mendeng intu saran danau.

³Balalu Yesus te majar are hal akan ewen mahapan paribasa. “Aton ije biti oloh pamalan haguet manawor binyi,” koan Yesus nampara saritae.

⁴“Metoh ie manawore, maka aton binyi je manjato intu jalan. Palus burong dumah tuntang binyi te lepah kinae.

⁵Aton kea je manjato intu eka je are batue, tapi petake isut. Kare binyi te bajeleng lembut awi tapas petake.

⁶Tapi metoh matanandau jari ambo, kare salundike te nampara balayu, limbah te keang tuntang matei awi uhate dia olih timben akan penda.

⁷Aton kea binyi je manjato akan marak kare rowut haduhi. Rowut haduhi te belom tuntang mangalambo kare salundike te sampai dia tau mamua.

⁸Tapi aton binyi je manjato akan petak je basiwoh, palus mamua; aton je saratus, aton je jahawen puluh, tuntang aton kea je telo puluh lipet.”

⁹Limbah manyarita paribasa te Yesus hamauh, “Amon keton aton pinding, keleh mahining!”

¹⁰Limbah te kare murid Yesus dumah tuntang misek Dengae, “Mbuhen Bapa mahapan paribasa amon hakotak dengan oloh are te?”

¹¹Yesus tombah, “Awi keton jari dinon panenga uka mangatawan taloh basilim tahiu ampin Hatalla marentah, tapi akan ewen te jaton.

¹² Karana oloh je jari mandino akan inenga labih are tinai, tuntang ayue te kareh malabien karee. Tapi oloh je dia dinon taloh en-en, maka je isut huang ie mahin akan induan.

¹³Jete sababe Aku mahapan paribasa amon hakotak dengan oloh are, awi ewen te marenang, tapi sama kilau oloh je dia tau mite; ewen manyeneh tapi sama kilau oloh je dia mahining tuntang dia haratie.

¹⁴ Kalote maka, manjadi taloh je inujum awi Nabi Yesaya, ‘Hatalla hamauh: Ewen kareh tetep mahining tapi dia haratie; Ewen akan tetep manantuanie tapi dia katawan taloh je manjadi

¹⁵Awi tirok itong oloh te jari tumpul, pinding ewen te jari badengen tuntang matan ewen jari ngambutep. Jetoh manjadi uka matan ewen ela mite, pinding ewen ela mahining, tirok itong ewen ela haratie tuntang ela haluli manalih Aku, palus Aku mampakeleh ewen.’ ”

¹⁶ “Tapi dia laluen kaontong keton,” koan Yesus dengan kare murid Ayue, “awi keton toto mite tuntang mahining.

¹⁷Ingat, are nabi tuntang oloh je baketep dengan Hatalla mipen mite taloh je gitan keton wayah toh, tapi ewen dia mitee. Ewen mipen mahining taloh je ihining keton wayah toh, tapi ewen dia mahininge.”

¹⁸“Hining auh riman paribasa tahiu panawor binyi te.

¹⁹Binyi je manjato intu jalan jete tanding kare oloh je mahining barita tahiu ampin Hatalla marentah, tapi ewen dia haratie. Taloh Papa te dumah tuntang marampas taloh je jari inawor huang atei ewen.

²⁰Binyi je manjato hong eka je are batue, tanding kare oloh je mahining barita te, tuntang balalu manarimae dengan hanjak ateie.

²¹Tapi barita te dia muhat huang atei ewen, sampai dia tahan tahi. Sana ewen mangkeme kasusah atawa kapehe ganan barita te, te ewen balalu manolak barita te.

²²Binyi je manjato marak kare rowut haduhi, tanding kare oloh je mahining barita te, tapi mikeh tahiu pambelom ewen tuntang mipen belom tatau sanang. Tagal te barita bara Hatalla te ingalambon huang atei ewen sampai dia tau mamua.

²³Tuntang binyi je manjato intu petak je basiwoh, jete tanding kare oloh je mahining barita te tuntang haratie. Ewen mamua labat, aton je saratus, aton je jahawen puluh, tuntang aton je telo puluh lipet hasile.”

²⁴Yesus manyarita tinai ije paribasa akan oloh are koan Yesus, “Amon Hatalla marentah, jete ampie sama kilau paribasa toh: Ije biti oloh pamalan manawor binyi je bahalap intu tanae.

²⁵Hong ije alem, metoh oloh samandiai uras batiroh, musoh oloh pamalan te dumah manawor binyi tingen intu marak parei te, palus haguet.

²⁶Katika kare taloh imbul te jari belom, tuntang kare bungehe nampara lembut, te kare tingen te gitan kea.

²⁷Balalu kare oloh je iupah awi pamalan te dumah manalih pamalan te tuntang hamauh, ‘Tuan, en dia binyi je bahalap je iimbul tuan intu tanan tuan? Kilen ampie sampai aton tingen hete?’

²⁸Pamalan te tombah, ‘Jete gawin musoh.’ Balalu kare oloh je iupah pamalan te misek tinai, ‘En tuan hakon amon ikei manjawut tingen te?’

²⁹‘Dia,’ koae, ‘Basa amon tingen te injawut, kareh parei te omba tajawut kea.

³⁰Nauhe ih kare tingen te belom haya-hayak sampai wayah getem. Kareh aku handak hamauh dengan kare oloh je manggetem: Nampunan helo tingen te, meteng, palus inusul. Limbah te nampunan parei te, palus iingkes huang lepau.’ ”

³¹Yesus manyarita tinai ije paribasa akan kare oloh are, koae, “Amon Hatalla marentah, jete ampie sama kilau paribasa toh: Ije bawak sawi,[12] induan awi oloh palus iimbule intu tanae.

³²Bawak sawi jete binyi je paling korik. Tapi amon jari belom, ie tau manjadi je pangkahaie bara kare taloh imbul. Ie manjadi upon kayu, sampai kare burong dumah manyarangan intu kare edae.”

³³Aton ije paribasa beken inyarita Yesus akan oloh are. “Amon Hatalla marentah, jete ampie kilau ragi je induan awi ije biti oloh bawi, palus iewoie dengan epat puluh liter tepong gandom sampai kamer urase!”

³⁴Kare taloh samandiai te iajar awi Yesus akan kare oloh mahapan paribasa.

³⁵ Kalote maka manjadi taloh je insanan awi nabi, “Aku mahapan paribasa amon hakotak dengan ewen; Aku kareh mambarita kare taloh basilim bara tamparan kalunen toh injadian.”

³⁶Limbah te Yesus malihi oloh are te palus tame huma. Kare murid Ayue dumah tuntang hamauh, “Coba Bapa manarang akan ikei riman paribasa tahiu tingen marak parei te.”

³⁷Yesus tombah, “Oloh je manawor binyi je bahalap te, jete Anak Olon.

³⁸Tana te, jete kalunen toh. Binyi je bahalap te iete kare oloh je manjadi ungkup ain Hatalla. Tingen jete kare oloh je omba mamihak setan.

³⁹Musoh je mimbul tingen te, jete setan. Wayah getem jete andau kiamat, tuntang kare oloh je manggetem, jete kare malekat.

⁴⁰Sama kilau tingen te je inampunan tuntang inusul akan apui, kalote kea hong Andau Kiamat kareh.

⁴¹Anak Olon kareh manyoho kare malekat Ayue mamumpong bara kare ungkup Ayue kare oloh je mawi sabab sampai oloh beken mawi dosa, tuntang kakare oloh beken je malalus kapapa.

⁴²Ewen samandiai inganan akan huang tungku apui je halendang: intu hete ewen manangis tuntang kapehe.

⁴³Tuntang kare oloh je malalus kahandak Hatalla kareh manyangkowong kilau matanandau je huang Lewu Taheta ain Hatalla, Bapa ewen. Jadi amon aton pinding keleh mahining!”

⁴⁴“Amon Hatalla marentah, jete ampie kilau paribasa toh: aton ramo je bakalian hong penda petak palus inyondau awi ije biti oloh, tuntang inamean tinai akan huang petak. Limbah te awi kahanjake, oloh te haguet manjual salepah kare ramoe, palus haluli tuntang mamili petak te.”

⁴⁵“Amon Hatalla marentah, jete ampie kilau paribasa toh: Ije biti oloh dagang manggau kare mutiara je barega.

⁴⁶Katika ie sondau ije kabawak mutiara je jaton tarasanan kahalape, maka ie balalu haguet tuntang manjual kare ramoe, palus mamili mutiara ije kabawak te.”

⁴⁷“Amon Hatalla marentah, jete tau inanding dengan jala je imbirik akan danau, palus dinon are macam lauk.

⁴⁸Limbah jala te kontep, jala te inggatang akan hunjun petak awi kare oloh palauk. Limbah te ewen mondok tuntang mintih kare lauk te: lauk je bahalap iingkes ewen huang balanai tuntang je dia bahalap inganan.

⁴⁹Kalote kea ampin taloh hong Andau Kiamat, kare malekat kareh haguet mamisah kare oloh papa bara kare oloh je malalus kahandak Hatalla.

⁵⁰Limbah te kare oloh papa te inganan akan huang dapur je belom apuie. Intu hete ewen kareh manangis tuntang kapehe.”

⁵¹“En keton harati kare taloh samandiai te?” koan Yesus misek. “Harati Pa!” koan ewen tombah.

⁵²Balalu Yesus hamauh, “Tagal jete maka gagenep guru agama je jari manjadi anak ungkup ain Hatalla, sama kilau ije biti tuan huma je mampalua kare ramoe je taheta tuntang je usang bara eka panataue.”

⁵³Limbah Yesus manyarita kare paribasa te, Ie malihi eka te,

⁵⁴palus haluli akan lewu human Ayue. Hong hete Ie haguet majar intu huma sombayang, tuntang oloh je mahining Ie hete, hengan toto. Ewen hamauh, “Bara kueh oloh toh mandino kapintar kaharati je kilau te? Tuntang bara kueh Ie mandino kuasa uka mawi taloh heran?

⁵⁵En diakah Ie toh anak tukang kayu te? Diakah Maria indue; tuntang kare paharie te Yakobus, Yosep, Simon tuntang Yudas?

⁵⁶Tuntang kare paharie awang bawi te dia melai hetoh kea? Bara kueh Ie mandino kare taloh te?”

⁵⁷ Maka ewen dia maku manarima Yesus. Balalu Yesus hamauh dengan ewen, “Ije biti nabi ihormat hong kueh bewei, tapi dia huang lewun ayue kabuat.”

⁵⁸Tagal te Yesus dia mawi are taloh heran hong hete awi ewen te dia percaya.