Read Ngaju MATEUS 14 Bible Online

MATEUS 14 - Ngaju bible

MATEUS 14

¹Hong katika te Herodes, je tempon kuasa hong daerah Galilea, mahining tahiu Yesus.

²Herodes hamauh dengan kare pagawai ayue, “Pasti Yohanes Pampandoi jari belom haluli! Awi te Ie aton kuasan Aie mawi taloh heran.”

³ Basa helo bara te Herodes manyoho manawan Yohanes tuntang manjarat ie palus manamean ie akan huang penjara. Herodes mawi ie kalote awi soal Herodias sawan paharie kabuat, iete Pilippus.

⁴ Basa Yohanes puji hamauh kalotoh dengan Herodes, “Dia tau ikau kawin dengan Herodias!”

⁵Sapunae Herodes handak ih mampatei Yohanes, tapi ie mikeh dengan kare oloh awi ewen mangira Yohanes te nabi.

⁶Katika Herodes mawi pesta ulang tahun ayue, anak Herodias je bawi manari hong bentok oloh are. Tarie te paham mampahanjak atei Herodes,

⁷sampai Herodes hajanji dengae hapan sumpah, koae, narai bewei je ilakue, akan inenga akae.

⁸Ganan iajar awi indue, anak bawi te hamauh, “Aku balaku takolok Yohanes Pampandoi inenga akangku metoh toh kea hong hunjun baki!”

⁹Awi mahining auh palaku te, Herodes paham kapehe ateie. Tapi awi ie jari sumpah intu taharep kare oloh je dumah, ie marentah uka palakun anak bawi te inenga ih.

¹⁰Ie manyoho oloh manalih penjara uka manetek takolok Yohanes.

¹¹Limbah te takolok Yohanes te iimbit tame tuntang iingkes intu hunjun baki tuntang inenga akan anak bawi te. Palus anak bawi te mimbite tinai akan indue.

¹²Limbah te kare murid Yohanes manduan hantun Yohanes tuntang mangubure. Balalu ewen haguet tuntang mansanan hal te akan Yesus.

¹³Katika Yesus mahining barita te, Ie lumpat arut kabuate tuntang malihi eka te, uka haguet akan eka je benyem. Tapi katika kare oloh mahining tahiu hal te, ewen malihi kare lewu-humae tuntang haguet manuntut Yesus jalan hunjun petak.

¹⁴Metoh Yesus mohon bara arut tuntang mite oloh are te, Ie masi dengan ewen. Palus Ie mampakeleh kare oloh haban je aton marak ewen.

¹⁵Katika andau jari halemei kare murid Yesus dumah tuntang hamauh Dengae, “Andau jari halemei tuntang eka toh kejau bara lewu. Labih bahalap Bapa manyoho kare oloh toh haguet, mangat tau mamili panginan intu kare lewu.”

¹⁶“Dia usah ih haguet,” koan Yesus, “Keton ih manenga panginan akan ewen.”

¹⁷“Ain ikei baya aton lime kabawak rote tuntang due kongan lauk!” koan kare murid Yesus te tombah.

¹⁸“Imbit kahetoh,” koan Yesus.

¹⁹Limbah te Ie manyoho oloh are te mondok hunjun oru, palus Ie manduan lime kabawak rote tuntang due kongan lauk te, palus mananggera akan langit tuntang manarimakasih akan Hatalla. Limbah te Ie mangiwak-mangiwak rote te hapan lengen Aie tuntang manengae akan kare murid Ayue uka ewen mambagie akan oloh are te.

²⁰Ewen samandiai kuman sampai besoh. Limbah te kare murid Yesus manampunan kalabien panginan te; aton due walas lontong kontep.

²¹Oloh je kuman hong katika te aton kurang labih lime koyan biti, luar bara kare oloh bawi tuntang anak korik.

²²Limbah te Yesus manyoho kare murid Ayue lumpat arut tuntang batolak helo dimpah danau, pandehan te Ie manyoho oloh are te buli.

²³Limbah oloh are te haguet, Yesus mandai ije bukit kabuate uka balaku doa. Metoh andau jari hamalem, Yesus magon aton hete kabuat.

²⁴Metoh te arut je ihapan kare murid Yesus nah, jari kejau hong bentok danau. Arut te kinjap tahampas awi riak, awi tintun riwut te hakalawan dengan arut.

²⁵Helat pukul telo dengan pukul jahawen hanjewu, Yesus dumah manalih ewen mananjong hunjun danum.

²⁶Katika kare murid Ayue mite Ie mananjong hunjun danum, ewen paham tarewen. “Kambe!” koan ewen mangkariak sambil mikeh.

²⁷Tapi Yesus hemben te kea tombah, “Dia men ih! Aku toh Yesus. Ela mikeh!”

²⁸Balalu Petrus hamauh, “Amon ikau puna Yesus, soho aku manalih tuntang mananjong hunjun danum.”

²⁹“Talih ih,” koan Yesus. Jadi Petrus mohon bara arut, mananjong hunjun danum tuntang manalih Yesus.

³⁰Tapi metoh Petrus mite kapaham kahain riwut hong danau te, ie mikeh tuntang nampara leteng. “Tuhan, dohop!” koae mangkariak.

³¹Yesus bajeleng mantajok lengen Ayue tuntang manyingkap ie tuntang hamauh, “Petrus, Petrus, ikau toh tapas kapercayam. Mbuhen ikau ragu-ragu dengang-Ku?”

³²Balalu ewen due lumpat akan arut te, tuntang riwut mahin tadoh.

³³Maka kare murid Yesus sontop manyembah Ie. Koan ewen, “Toto Tuhan toh Anak Hatalla!”

³⁴Katika ewen sampai saran danau dipah silae, ewen lumpat intu Genesaret.

³⁵Tuntang katika kare oloh hete mite oloh je dumah te Yesus, ewen mangabar barita te akan kare eka hakaliling lewu te. Palus kakare oloh haban iimbit manalih Yesus.

³⁶Tuntang ewen balaku intu Ie uka tau manigong jubah Ayue, lawie mahin barangai ih. Maka kakare oloh je manigong jubah Yesus balalu keleh.