Read Ngaju MATEUS 15 Bible Online

MATEUS 15 - Ngaju bible

MATEUS 15

¹Aton ije baris oloh Parisi tuntang pire-pire guru agama bara Yerusalem dumah manalih Yesus. Ewen misek intu Ie,

²“Mbuhen kare murid Ayum malanggar hadat tato hiang itah? Metoh handak kuman ewen dia menyau lengee helo manumon atoran!”

³Yesus tombah, “Tuntang mbuhen keton kea mahin malanggar parentah Hatalla, baya awi keton handak manumon hadat tato hiang keton?

⁴ Basa Hatalla hamauh, ‘Hormat bapam tuntang indum,’ tuntang ‘ewe-eweh je manyapa indu-bapae, musti buah hukum matei.’

⁵Tapi keton majar: amon oloh hamauh dengan oloh bakase, ‘Taloh je musti inengaku akan indu tuntang bapaku jari inyarahku akan Hatalla,’

⁶maka oloh te balalu dia mahormat oloh bakase.[13] Jadi, tagal hadat tato hiang keton, keton manaha gampang auh Hatalla.

⁷Keton oloh haliau! Pas kilau auh je inujum awi nabi Yesaya tahiu keton, iete,

⁸ ‘Kalotoh auh Hatalla: Kare oloh te manyembah Aku baya hapan kotake, tapi atei ewen kejau bara Aku.

⁹Ngahus ih ewen manyembah Aku, awi ewen majar atoran kalunen iawie kila-kilau atoran bara Aku.’ ”

¹⁰Limbah te Yesus mantehau oloh are tuntang hamauh dengan ewen, “Hining toh mangat harati!

¹¹Taloh je tame akan nyame, jete dia tau mawi kapapan oloh; baya je balua bara nyamae, jete je tau mawi kapapae.”

¹²Balalu kare murid Yesus dumah tuntang hamauh dengan Yesus, “En katawan Bapa kare oloh Parisi te basingi angat ateie awi Bapa hamauh kalote?”

¹³Yesus tombah, “Gagenep taloh imbul je dia Bapa-Ku mimbule, akan injawut.

¹⁴ Dia usah keton paduli oloh Parisi te. Ewen te kare pamimpin babute; tuntang amon oloh babute mamimpin oloh babute, maka kadaduee kareh manjato hong parit.”

¹⁵Petrus hamauh, “Dohop manarang paribasa te akan ikei, Pa!”

¹⁶Yesus tombah auh ewen, “En keton magon hindai haratie?

¹⁷En dia keton katawan, taloh je tame akan huang nyame mohon akan kanai, tuntang limbah te balua tinai?

¹⁸ Tapi taloh je balua bara nyame, asale bara atei; tuntang jete je mawi oloh manjadi papa.

¹⁹Basa bara atei lembut kare tirok papa je mawi sabab oloh tau mampatei, habandong, pahabawi, manakau, mananjaro tuntang mamapa.

²⁰Kare taloh te je mawi oloh manjadi papa, dia ie awie kuman mahapan lenge je dia ienyau.”

²¹Limbah te Yesus malihi eka te tuntang haguet akan daerah tokep lewu Tirus tuntang Sidon.

²²Ije biti bawin oloh Kanaan bara eka te, dumah manalih Yesus sambil kariak-kariak, “Anak Dawid, pasi aku! Anakku je bawi ingumpang setan. Ampie paham kapehe toto.”

²³Yesus dia tombah samasinde auh oloh bawi te. Balalu kare murid Yesus dumah manalih Ie tuntang balaku, “Pa, soho oloh bawi te haguet. Ie baya mamparidu ih hila likut itah!”

²⁴Yesus tombah, “Aku inyoho dumah baya akan bangsa Israel, je mambatang akan kare ewen je layang.”

²⁵Oloh bawi te dumah balalu sontop manyembah intu taharep Yesus tuntang hamauh, “Dohop aku, Tuhan.”

²⁶Yesus tombah, “Dia bahalap manduan panginan bara anak oloh korik tuntang manjakahe akan aso.”

²⁷“Toto, Tuhan,” koan oloh bawi te, “tapi aso mahin kuman tisan panginan je manjato bara mejan tempoe.”

²⁸Palus Yesus hamauh dengae, “Ibu, kapercayam paham hai! Keleh manjadi akam tumon kahandakm!” Hemben te kea anak oloh bawi te keleh.

²⁹Yesus malihi eka te palus mananjong mahoroi saran Danau Galilea. Limbah te Ie mandai akan ije bukit palus mondok hete.

³⁰Are oloh dumah manalih Ie mimbit kare oloh je batimpang, je babute, je lumpuh, je bisu, tuntang are tinai oloh haban je beken. Ewen mingkes kare oloh te intu taharep Yesus, tuntang Ie mampakeleh oloh te.

³¹Oloh are je aton hete paham hengan metoh ewen mite oloh bisu tau hakotak, oloh batimpang keleh, oloh lumpuh mananjong, tuntang oloh babute tau mite. Palus ewen manara Hatallan oloh Israel.

³²Limbah te Yesus mantehau kare murid Ayue balalu hamauh dengan ewen, “Aku masi angat-Ku dengan oloh are toh. Jari telo andau katahie ewen omba Aku, tuntang ewen jaton panginae. Aku dia handak manalua ewen buli hayak balau, bele ewen tujah hong jalan.”

³³Kare murid Ayue misek Ie, “Hong kueh itah tau mandino panginan hong eka benyem toh je kejau bara lewun oloh hapa mampakanan oloh kilau toh karee?”

³⁴“Pire aton rote ain keton?” koan Yesus misek ewen. “Uju” tombah ewen, “tuntang lauk korik pire-pire kongan.”

³⁵Balalu Yesus manyoho oloh are te mondok intu petak.

³⁶Limbah te Ie manduan uju rote te dengan lauke palus manarima kasih akan Hatalla. Limbah te Ie mangiwak-mangiwak rote dengan lauk te hapan lengen Ayue palus manenga te akan kare murid Aie. Tinai kare murid te mambagi kare rote te akan oloh are.

³⁷Uras oloh are te kuman sampai besoh, limbah te kare murid Yesus, manampunan tisan panginan te samandiai kontep uju lontong.

³⁸Kare oloh hatue je kuman metoh te aton epat koyan biti, hindai iise oloh bawi tuntang anak oloh korik.

³⁹Limbah te Yesus manyoho oloh are te buli. Ie balalu lumpat akan ije arut tuntang tolak akan daerah Magadan.