Read Ngaju MATEUS 16 Bible Online

MATEUS 16 - Ngaju bible

MATEUS 16

¹ Aton pire-pire oloh Parisi tuntang oloh Saduki dumah manalih Yesus handak manjabak Ie. Ewen balaku Ie mawi taloh heran uka mambukti je Ie te dumah bara Hatalla.

²Yesus tombah, [“Amon metoh matanandau handak belep, keton hamauh, ‘Bahalap ampin andau, awi langite mahindang.’

³Tuntang hong hanjewu, keton hamauh, ‘Andau toh handak ujan awi langit mahindang hayak kundom.’ Nah, keton tau maramal ampin andau awi mite ampin langit, padahal kare tanda jaman dia keton tau maramale!”]

⁴ “Lalehan kapapae tuntang kadarhakae oloh jaman jetoh. Keton balaku Aku mawi taloh heran. Akan keton jaton inenga taloh heran. Aloh ije mahin dia, kacuali taloh heran ain nabi Yona.” Limbah hamauh kalote Yesus malihi ewen, palus haguet.

⁵Katika kare murid Yesus sampai hong saran danau dipah silae, harue ewen taraingat ewen kalapean mimbit rote.

⁶ Yesus hamauh dengan ewen, “Keleh bua-buah keton taharep ragin oloh Parisi tuntang Saduki.”

⁷Sana mahining auh Yesus te, kare murid Ayue nampara hakotak sama arepe, “Ie hamauh kalote awi itah jaton mimbit rote.”

⁸Yesus katawan narai taloh je inahiu ewen te. Maka Ie hamauh, “Mbuhen keton mamander soal jaton rote? Keton toh tapas kapercaya!

⁹ En keton magon hindai harati? En keton dia mingat tahiu lime rote je imbagi-Ku akan lime koyan oloh? Pire lontong kalabien rote je inampunan keton?

¹⁰ Tuntang kilen tinai dengan uju rote akan epat koyan biti oloh te? Pire lontong kalabien panginan je nampunan keton?

¹¹Mbuhen keton sampai dia haratie je Aku dia hakotak tahiu rote dengan keton? Keleh bua-buah keton manaharep kare ragin oloh Parisi tuntang Saduki!”

¹²Kajariae kare murid Yesus haratie kea Yesus manyoho ewen bua-buah dia ganan ragi je hapa manampa rote, tapi manaharep kare auh ajar ain kare oloh Parisi tuntang Saduki.

¹³Yesus haguet akan daerah tokep lewu Kaisarea Pilippi. Intu hete Ie misek kare murid Ayue, “Manumon koan oloh, Anak Olon te eweh?”

¹⁴ Kare murid Ayue tombah, “Aton je manyewut Yohanes Pampandoi. Aton kea je manyewut Elia. Je beken tinai manyewut Yeremia, atawa salahimbal bara kare nabi.”

¹⁵“Tapi manumon koan keton kabuat, Aku toh eweh?”

¹⁶ Simon Petrus tombah, “Bapa toh Raja Panyalamat, Anak Hatalla je belom.”

¹⁷“Ontong toto ikau, Simon anak Yona!” koan Yesus, “Basa dia ie olon je mansanan hal te akam, malengkan Bapa-Ku je huang sorga.

¹⁸Awi te buah ikau katawan, ikau toh Petrus, batu je dehen, intu hunjun batu toh Aku handak mamangun Gareja ayung-Ku, je dia olih impakalah; aloh awi pampatei!

¹⁹ Aku manenga akam kunci bara Lewu Taheta ain Hatalla. Taloh je ingahana hunjun petak, ingahana kea hong sorga. Tuntang je koam bujur hong kalunen, bujur kea hong sorga.”

²⁰Limbah te Yesus mampingat kare murid Ayue uka ewen dia mansanan akan eweh bewei je Ie te Raja Panyalamat.

²¹Nampara bara katika te, Yesus hakotak terus-tarang dengan kare murid Ayue, je Ie musti haguet akan Yerusalem tuntang Ie kareh mandino are kapehe bara kare pamimpin, kare imam tuntang kare guru agama. Ie akan impatei, tapi huang andau je kateloe Ie kareh imbelom tinai.

²²Palus Petrus manjijit Yesus akan sare tuntang maningak Ie, koae, “Keleh Hatalla mangejau taloh te, Tuhan! Ela sampai soal te manjadi buah Tuhan!”

²³Yesus tampaliau palus hamauh dengan Petrus, dari bara hetoh, setan! Ikau mahambang Aku. Tirokm te tirok olon; dia ie tirok Hatalla!

²⁴ Limbah te Yesus hamauh dengan kare murid Ayue, “Oloh je handak omba Aku, musti mangalapean kamangat ayue kabuat, ie mananggong sampalakie tuntang tetep omba Aku.

²⁵ Karana oloh je baya handak halaluan pambelome, kareh nihau pambelome. Tapi oloh je manyarah pambelome akang-Ku, kareh mandino jete.

²⁶Narai kaontonge akan oloh amon ie dinon hapus kalunen toh akan panataue tapi ie nihau pambelome? En tau pambelom te inakiri hapan taloh beken?

²⁷ Dia tahi tinai Anak Olon, haya-hayak dengan kare malekat Ayue, handak dumah dengan kuasan Bapa Aie. Hong katika te ie kareh mambaleh akan genep bitin oloh manumon kare ampin gawie.

²⁸Ingat! Bara keton hetoh aton je dia akan matei, helo bara ie mite Anak Olon dumah kilau Raja.”