Read Ngaju MATEUS 18 Bible Online

MATEUS 18 - Ngaju bible

MATEUS 18

¹ Hong katika te kare murid Yesus dumah manalih Ie tuntang misek, “Eweh je pangkahaie bara marak kare anak ungkup ain Hatalla?”

²Yesus mantehau ije biti anak korik, tuntang manyoho ie mendeng intu taharep ewen.

³ Palus Ie hamauh, “Percaya bewei! Asal keton hobah tuntang manjadi sama kilau anak korik, keton kareh manjadi anak ungkup ain Hatalla.

⁴Oloh je mamparandah arepe tuntang manjadi sama kilau anak korik toh, ie te je pangkahaie bara marak kare anak ungkup ain Hatalla.

⁵Tuntang oloh je manarima anak je sama kilau toh tagal Aku, rimae manarima Aku kea.”

⁶“Eweh je mawi sabab sampai ije biti bara kare anak korik toh dia percaya tinai dengang-Ku, labih bahalap amon batu kisaran hai injarat intu uyate tuntang ie impaleteng intu tasik je handalem.

⁷Calaka toto kalunen toh tagal kare hal je mimbit oloh mawi dosa. Puna kare taloh te harajur aton, tapi calaka toto oloh je mawi sabab te!

⁸ Amon lenge gantaum atawa paim mawi ikau badosa, tetek tuntang kanan jete. Labih bahalap ikau belom dengan Hatalla dia halenge sila atawa pai, bara ikau inganan akan apui naraka dengan due lengem tuntang paim.

⁹ Tuntang amon matam mawi sabab ikau mawi dosa, karuit tuntang kanan. Labih bahalap ikau belom dengan Hatalla hapan ije mate bara ikau inganan akan apui naraka dengan due matam.”

¹⁰“Awas! Ela mahina ije bara kare oloh je korik toh. Basa ingat, kare malekat ewen te harajur aton intu taharep Bapa-Ku hong sorga. [

¹¹ Basa Anak Olon dumah uka manyalamat oloh je layang!]

¹²Kilen huang tirok keton! Paribasae aton ije biti oloh je tempon saratus kongan tabiri, ije kongan bara tabiri te nihau, en je handak ilalus awi oloh te? Pasti ie kareh malihi tabiri je jalatien puluh jalatien kongan te hong bukit tuntang haguet manggau je nihau te.

¹³Tuntang amon ie sondau tinai tabiri te, percaya ih auh-Ku — ie kareh labih hanjak dengan tabiri je ije kongan te bara je jalatien puluh jalatien kongan awang beken je dia nihau te.

¹⁴Kalote kea Bapa keton[14] hong sorga dia handak ije bara kare oloh je harue percaya dengang-Ku toh layang.”

¹⁵ “Amon paharim badosa intu taharepm,[15] talih ie tuntang sanan akae kasalae. Lalus jete suni-suni baya akan arep keton due ih. Amon ie manumon kare auhm, maka ikau bahasil mandino paharim te haluli.

¹⁶ Tapi amon dia, imbit ije atawa due biti oloh tinai. Basa huang Surat Barasih aton tarasurat, ‘Paling isut due atawa telo biti saksi inggau hapa mangarinah kasalan oloh je indawa.’

¹⁷Amon ie dia manarima nasehat kare oloh te, sanan hal te akan ungkup. Tuntang kalepahe haliai, amon ie dia maku manarima nasehat ungkup, anggap ih ie kilau oloh panagih pajak tuntang oloh je dia mangasene Hatalla.”

¹⁸ “Keleh keton katawan: Taloh je ingahana keton hong kalunen, ingahana kea hong sorga. Tuntang je tau ilalus hong kalunen, tau kea ilalus hong sorga.

¹⁹Tuntang keleh keton katawan kea: Amon aton bara marak keton je hong kalunen due biti oloh hapakat tahiu en bewei palus balakudoa akan taloh te, maka lakudoae te kareh inarima awi Bapa-Ku hong sorga.

²⁰Basa hong kueh aton due atawa telo biti oloh hapumpong tagal Aku, Aku aton hong bentok ewen te.”

²¹ Limbah te Petrus dumah manalih Yesus tuntang misek, “Tuhan, amon paharingku badosa dengangku, sampai pire kali aku musti mampun ie? Sampai uju kali kah?”

²²Yesus tombah, “Dia, dia ie uju kali, tapi uju puluh kali uju kali![16]

²³Basa amon Hatalla marentah, jete tau inanding kilau paribasa toh: Ije raja je handak mamberes utang kare jipee.

²⁴Sana ie nampara mariksa ewen, maka aton imbit oloh manalih ie ije jipen je butang bajuta-juta,

²⁵tuntang dia olihe mambayare. Jadi, raja te marentah uka jipee te injual haya-hayak dengan kare anak-sawae tuntang kare ramoe hapa mambayar utange.

²⁶Jipen te sontop manyembah intu taharep raja te, tuntang balaku, ‘Tuan, sabar helo dengangku. Aku kareh mambayar lepah kare utangku.’

²⁷Raja te masi dengae sampai ie mambebas jipen te bara kare utange.

²⁸Katika jipen te balua, ie hasondau dengan kare sobate, sama-sama jipen kea, je butang pire-pire koyan dengae. Ie manawan sobate te, mahekak uyate, tuntang hamauh, ‘Bayar palepah utangm!’

²⁹Palus sobate te sontop manyembah taharep ie sambil balaku, ‘Sabar helo le, kakare utangku te kareh imbayarku lepah!’

³⁰Tapi jipen te manolak. Malahan ie manamean sobate te akan huang penjara sampai ie mambayar utange.

³¹Katika kare jipen awang beken mite kare taloh je jari manjadi, ewen kapehe atei tuntang mansanan hal te akan raja.

³²Maka raja te mantehau jipen je papa te tuntang hamauh dengae, ‘Jipen je papa! Salepah utangm jari imbebasku bara ikau baya awim balaku nyame-nyame dengangku.

³³En dia mustikah ikau masi kea dengan sobatm sama kilau aku kea jari masi ikau?’

³⁴Raja te paham sangit. Jipen je papa te inamean akan huang penjara sampai ie mambayar lepah kare utange.”

³⁵Yesus mahapus saritan Aie te hapan auh toh, “Kalote kea Bapa-Ku hong sorga kareh mawi keton, amon keton dia mampun gagenep paharin keton dengan atei je barasih.”