Read Ngaju MATEUS 19 Bible Online

MATEUS 19 - Ngaju bible

MATEUS 19

¹Limbah Yesus mahapus kare auh te, Ie malihi Galilea palus haguet akan daerah Yuda hong silan Sungei Yordan.

²Are oloh omba manuntut Ie, tuntang Ie mampakeleh ewen intu hete.

³Palus kare oloh Parisi dumah handak mancoba Ie. Ewen misek, “Manumon hukum agaman itah, en taukah oloh manolang sawae dengan alasan narai bewei?”

⁴ Yesus tombah, “En keton hindai mambasa huang Surat Barasih, Ie je manampa taloh handiai, bara solake manampa olon iete oloh hatue tuntang oloh bawi?

⁵ Tuntang limbah te Ie hamauh, ‘Jete sababe oloh hatue malihi indu-bapae tuntang hinje dengan sawae maka kadaduee te manjadi ije.’

⁶Jadi ewen dia tinai due biti, tapi ije. Jete sababe taloh je jari impahinje Hatalla dia tau imisah awi olon.”

⁷ Palus kare oloh Parisi misek Dengae, “Amon kalote mbuhen Moses manyoho oloh manenga surat hatolang akan sawae je inolange?”

⁸Yesus tombah, “Moses manyoho keton manolang sawan keton awi keton bahali iajar. Tapi sapunae dia kalote metoh hong tamparae.

⁹ Jadi keleh hining toh: Eweh je manolang sawae — padahal oloh bawi te dia nyaleweng — limbah te ie kawin tinai dengan oloh bawi beken, oloh te habandong.”

¹⁰Maka kare murid Yesus hamauh Dengae, “Amon soal hubungan oloh dengan kabalie puna macam te, keleh dia usah kawin ih.”

¹¹Yesus tombah, “Dia uras oloh tau manarima kare auh te, baya kare oloh je jari inantu awi Hatalla ih.

¹²Basa aton oloh je dia olih kawin, awi ewen puna inakan kalote. Aton kea je dia olih kawin awi ie iawi kalote awi oloh beken. Tuntang aton tinai je puna kahandak ayue kabuat uka dia kawin, mangat tau manempo Hatalla. Oloh je olih manarima auh ajar toh, keleh ie manarimae.”

¹³Aton kare oloh mimbit anak korik manalih Yesus uka Ie mina lengen Aie hunjun takolok ewen tuntang balaku doa akan ewen. Tapi kare murid Yesus malait kare oloh te.

¹⁴Maka Yesus hamauh dengan kare murid Ayue, “Nauhe ih kare anak korik te dumah manalih Aku! Ela mangahana ewen, basa kare oloh je tumon toh je manjadi anak ungkup ain Hatalla.”

¹⁵Palus Yesus mina Lengee hunjun takolok kare anak korik te tuntang mamberkat ewen. Limbah te Ie haguet bara hete.

¹⁶Hong sinde andau ije biti oloh hatue dumah manalih Yesus. “Pa Guru,” koae, “gawi bahalap en je musti iawiku mangat tau manarima pambelom je katatahie?”

¹⁷Yesus tombah, “Mbuhen ikau misek dengang-Ku tahiu taloh je bahalap? Baya aton Ije je bahalap. Amon ikau handak belom, ikau musti mamenda kare parentah Hatalla.”

¹⁸ “Parentah je kueh te?” koan oloh te misek. Yesus tombah, “Ela mampatei oloh, ela habandong, ela manakau, ela mawi saksi tanjaro,

¹⁹ hormat bapam tuntang indum; tuntang keleh sinta sama arep keton kilau ikau sinta arepm kabuat.”

²⁰“Uras kare parentah te jari inumongku,” koan oloh tabela te tombah. “Narai tinai je tapas?”

²¹Yesus hamauh dengae, “Amon ikau handak manjadi oloh je tinduh barasih, lius jual salepah ramom. Tenga duite akan oloh je belom susah, tuntang ikau kareh mandino ramo hong sorga. Limbah te dumah ih omba Aku!”

²²Awi mahining kare auh te, oloh tabela te haguet dengan kapehen ateie awi ie tatau toto.

²³Balalu Yesus hamauh dengan kare murid Ayue, “Aku hamauh dengan keton, bahali toto akan oloh tatau manjadi anak ungkup ain Hatalla.

²⁴Tuntang jetoh je handak insanang-Ku tinai akan keton; labih murah ije kongan onta tame rumbak pilus, bara ije biti oloh tatau tame Lewu Taheta ain Hatalla.”

²⁵Katika kare murid Ayue mahining auh te, ewen hengan. “Amon kalote,” koan ewen, “eweh je tau salamat?”

²⁶Yesus manampayah ewen balalu hamauh, “Akan olon jete mastahel! Tapi akan Hatalla, uras olih manjadi.”

²⁷Balalu Petrus hamauh, “Item ikei jari malihi kare taloh samandiai mangat omba Bapa. Tuntang narai taloh je akan inarima ikei?”

²⁸ Yesus hamauh dengan ewen, “Percaya ih: Hong Lewu je Taheta, Anak Olon kareh mondok hunjun padadusan Aie je tinduh barasih. Hong katika te keton kare murid-Ku kareh mondok hunjun due walas padadusan tuntang mahakim due walas bangsa Israel!

²⁹Tuntang gagenep oloh je tagal Aku malihi humae, atawa paharie bawi atawa hatue, atawa indu-bapae, atawa anak jariae, atawa tana nyeloe, oloh te kareh manarima haluli saratus kali lipet. Tuntang ie kea kareh manarima pambelom je bujur tuntang katatahie.

³⁰ Tapi are oloh je wayah toh mananjong helo, kareh manjadi je pangkarahiae tuntang je wayah toh mananjong pangkarahiae kareh manjadi je pangkaheloe.”