Read Ngaju MATEUS 2 Bible Online

MATEUS 2 - Ngaju bible

MATEUS 2

¹Yesus inakan hong lewu Betlehem hong tanah Yuda; je manjadi raja metoh te iete Herodes. Hong katika te pire-pire ahli ilmu bintang bara timor dumah akan Yerusalem.

²Ewen misek hong hete-hete, “Hong kueh Anak te, je inakan uka manjadi Rajan oloh Yehudi? Ikei mite bintang Ayue lembut hila timor, tuntang ikei dumah mangat manyembah Ie.”

³Katika Raja Herodes mahining hal te, ie paham tarewen, kalote kea kakare oloh hong Yerusalem.

⁴Ie manyoho kakare imam kapala tuntang kare guru agama oloh Yehudi dumah hapumpong. Palus ie misek dengan ewen, “Hong kueh Raja je injanji Hatalla te akan inakan?”

⁵Ewen tombah, “Intu Lewu Betlehem hong tanah Yuda. Basa kalotoh auh je inyurat awi nabi,

⁶ ‘Ikau Betlehem hong tanah Yuda ikau samasinde dia je pangkakorike bara kare lewu mambatang hong Yuda. Karana bara ikau akan dumah ije biti pamimpin je akan mamimpin Israel.’ ”

⁷Limbah mandino katarangan te, Herodes mantehau kare ahli bintang bara timor te suni-suni. Palus ie misek dengan ewen hamparea katika je pas ewen nampara mite bintang te.

⁸Limbah te ie manyoho ewen akan Betlehem dengan peteh kalotoh, “Lius, gau Anak te titi-titip. Tuntang amon keton sondau Ie, sanan akangku, mangat aku kea manalih manyembah Ie.”

⁹Balalu ewen haguet. Ewen mite tinai bintang je gitan ewen bihin hila timor. Paham kahanjak ewen mite bintang te! Bintang te mananselo ewen, balalu tende hunjun eka Anak te.

¹¹Ewen tame akan huang huma te tuntang mite Anak te dengan indu Ayue Maria. Ewen sontop tuntang manyembah Anak te, palus mukei sarangan ramon ewen, tuntang manenga Akae amas, garo, tuntang mor.[1]

¹²Hatalla mampingat ewen huang nupi uka ela haluli manalih Herodes. Jadi ewen buli mahoroi jalan je beken.

¹³Limbah kare ahli bintang te haguet, malekat Tuhan mamparahan arepe akan Yosep huang nupi. Malekat te hamauh, “Herodes handak manggau Anak te palus mampatei Ie. Tagal te misik, imbit Anak te dengan indu Ayue hadari akan Misir. Melai ih intu hete sampai Aku hakotak tinai dengam.”

¹⁴Yosep misik, tuntang alem te kea ie mimbit Anak te dengan indu Ayue hadari akan Misir.

¹⁵ Ewen melai hete sampai Herodes matei. Kalote maka manjadi taloh ije insanan Tuhan mahalau nabi Ayue kalotoh, “Aku mantehau anak-Ku bara Misir.”

¹⁶Katika Herodes katawan ahli bintang bara timor te mananjaro ie, ie paham balait. Palus ie marentah uka mampatei anak hatue je umure due nyelo kapenda intu Betlehem tuntang eka hakalilinge. Jete cocok dengan katarangan je dinoe bara kare ahli bintang te tuntang katika bintang te gitan.

¹⁷Kalote maka manjadi taloh je insanan awi Nabi Yeremia, iete,

¹⁸ “Intu Rama tarahining auh tatum, tarahing hayak tangis. Rahel manatum kare anake ie jaton maku iampong awi ewen jari nihau.”

¹⁹Limbah Herodes matei, katika Yosep magon hong Misir, ije malekat Tuhan mamparahan arepe tinai akan Yosep huang nupi.

²⁰Malekat te hamauh, “Kare oloh je handak mampatei Anak te jari nihau. Tagal te misik, duan Anak te dengan indu Ayue tuntang buli akan Israel.”

²¹Maka Yosep misik, palus mimbit Anak te dengan indue haluli akan Israel.

²²Tapi rahian Yosep mahining Arkelaus, anak Herodes jari mangganti bapae manjadi raja hong Yuda. Jadi Yosep mikeh haguet akan hete. Limbah ie mandino Nasehat tinai bara Tuhan huang nupi, ie haguet manalih daerah Galilea.

²³ Hong hete ie melai intu lewu je arae Nasaret. Kalote maka manjadi taloh je insanan awi kare nabi tahiu anak te: “Ie kareh inyewut Oloh Nasaret.”