Read Ngaju MATEUS 20 Bible Online

MATEUS 20 - Ngaju bible

MATEUS 20

¹“Amon Hatalla marentah, jete ampie kilau paribasa toh: Ije biti oloh tempon kabon anggor hong jajewu manggau oloh uka bagawi hong kabon anggor ayue.

²Limbah jari imakat uka ie mambayar upah ije duit perak jandau akan ewen, ie manyoho ewen bagawi intu kabon anggore.

³Pukul jalatien hanjewu, oloh je tempon kabon anggor te haguet tinai, tuntang mite pire-pire oloh je kanjerae manggaleor intu pasar.

⁴Maka ie hamauh dengan ewen, ‘Haguet ih keton bagawi hong kabon anggor-Ku. Kareh aku mambayar akan keton hapan upah je patut kea kahaie.’

⁵Maka ewen haguet kea. Pukul duewalas bentok andau, tuntang pukul telo halemei, tukang kabon te balua tinai tuntang mawie kalote kea.

⁶Tuntang kira-kira pukul lime halemei, ie balua tinai tuntang mite magon aton oloh je melai bewei. Palus ie misek dengan ewen, ‘Mbuhen keton tetep mendeng janda-jandau hetoh tuntang jaton mawi taloh en-en?’

⁷Kare oloh te tombah, ‘Jaton ati oloh je manenga gawi akan ikei.’ ‘Amon kalote,’ koan tempon kabon anggor te, ‘lius keton bagawi hong kabon anggor-Ku.’

⁸ Halemei andau, tempon kabon te hamauh dengan mandure, ‘Tehau kare oloh je bagawi te tuntang bayar upah akan ewen gagenep bitie, nampara bara oloh je pangkarahiae tame sampai dengan je pangkasolake tame.’

⁹Maka kare oloh je bagawi nah dumah nampara bara pukul lime halemei. Genep bitin ewen te manarima ije duit perak.

¹⁰Limbah te dumah tinai kare oloh je bagawi bara hanjewu. Ewen manirok, ewen tau dinon labih hai. Padahal akan ewen baya inenga ije duit perak kea.

¹¹Metoh manarima duit te, ewen bakotok dengan tempon kabon.

¹²‘Oloh je pangkarahiae dumah bagawi te baya bagawi ije jam. Tapi ikei bagawi janda-jandau penda lasot matanandau, tapi tuan mambayar akan ewen sama dengan ikei!’

¹³Tempon kabon anggor te tombah dengan ije biti bara kare ewen te, ‘Ule, aku dia basala dengam. Kan ikau satuju manarima upah ije duit perak akan gawi ije andau?

¹⁴Nah, duan upahm, tuntang haguet ih. Aku puna handak manenga akan oloh je tame pangkarahiae te upah je sama dengan je inengaku akan keton.

¹⁵En dia taukah aku mawie tumon kahandakku ih dengan ramo ayungku? Atawa ikau bahiri, awi aku toh bajenta ateiku?’ ”

¹⁶ Palus Yesus hamauh tinai, “Kalote kea kare oloh je pangkarahiae kareh manjadi je pangkaheloe, tuntang kare oloh je pangkaheloe manjadi je pangkarahiae.”

¹⁷Katika Yesus haguet manalih Yerusalem, hong benteng jalan Ie mantehau due walas murid Ayue uka ewen hapumpong Dengae kabuat ih. Palus Ie hamauh dengan ewen,

¹⁸“Hining toh! Itah metoh toh haguet manintu Yerusalem. Hong kanih Anak Olon kareh inyarah akan kare imam kapala tuntang kare guru agama. Palus Ie kareh ihukum matei.

¹⁹Limbah te inyarah akan kare oloh je dia Yehudi. Ewen kareh halalea Ie, mangapehe Ie, tuntang manyampalaki Ie. Tapi hong andau kateloe, Ie impisik tinai.”

²⁰Limbah te sawan Sebedeus dumah dengan kare anake manalih Yesus. Intu taharep Yesus Ie sontop manyembah tuntang balaku taloh en-en.

²¹“Ibu handak en?” koan Yesus misek. Ibu te tombah, “Aku handak mangat kadadue anakku toh mondok hila sambil tuntang hila gantaun Bapa amon Bapa manjadi Raja kareh.”

²²“Keton dia katawan narai taloh je ilaku keton,” koan Yesus dengan ewen. “En olih keton mihop bara cangkir kajake je musti Aku mihope?” “Olih,” koan ewen tombah.

²³Yesus hamauh, “Punae, keton kareh mihop kea bara cangkir-Ku. Tapi tahiu eweh je mondok hila sambil tuntang hila gantaung-Ku, jete dia Aku je tempon hak manukase. Kare eka te, ain kare oloh je jari inantu awi Bapa-Ku.”

²⁴Katika sapuluh ewen murid awang beken mahining hal te, ewen balait dengan due biti oloh hampahari te.

²⁵ Awi te Yesus mantehau ewen samandiai palus hamauh, “Keton katawan je pamimpin bangsa je dia mangasene Hatalla te mahenyek rayate. Tuntang kare oloh hai ain ewen te mahapit ewen.

²⁶ Tapi keton dia tau kalote. Malahan, oloh je handak manjadi oloh hai hong marak keton, musti manjadi jipen keton.

²⁷Tuntang oloh je handak manjadi oloh je solake hong marak keton, musti manjadi jipen keton.

²⁸Sama kilau Anak Olon te kea; Ie dumah dia uka Ie iayang tapi uka Ie manyang, tuntang manyarah hambaruan Aie hapa maliwus are oloh.”

²⁹Metoh ewen malihi Yerikho, are oloh manuntut Yesus.

³⁰Due oloh babute mondok intu saran jalan. Sana ewen mahining Yesus mahalau ewen mangkariak, “Anak Dawid pasi ikei!”

³¹Oloh are je aton hong hete balait dengan ewen tuntang manyoho ewen suni. Tapi ewen mangkariak sasar hai haream auhe, “Tuhan, Anak Dawid, pasi ikei toh!”

³²Balalu Yesus tende tuntang mantehau ewen. “Narai je kahandak keton mangat Aku tau mawie akan keton?” koan Yesus misek.

³³Ewen tombah, “Tuan, ikei handak mite!”

³⁴Yesus masi dengan ewen, palus manggayap matan ewen. Hemben te kea ewen tau mite. Ewen palus omba Yesus.