Read Ngaju MATEUS 21 Bible Online

MATEUS 21 - Ngaju bible

MATEUS 21

¹Katika jari tokep Yerusalem, ewen sampai hong Betpage intu Bukit Saitun. Intu hete Yesus manyoho due biti murid Ayue mananjong labih helo.

²“Lius talih lewu je hila baun te,” koan peteh Yesus dengan ewen. “Balalu keton kareh mite ije kongan kalidai injarat dengan anake. Engkak jarate tuntang imbit akan hetoh.

³Amon aton oloh maningak taloh gawin keton te, sanan akan oloh te, ‘Tuhan [17] perlu mahapae’, maka oloh te balalu manalua keton mimbit kalidai te.”

⁴Hal te manjadi uka tulus taloh je insanan awi nabi kalotoh,

⁵ “Sanan akan kota Sion, Rajam toh dumah manalih ikau. Ie randah ateie tuntang manongkang ije kongan anak kalidai, ije kongan anak kalidai tabela.”

⁶Maka kadadue murid te haguet tuntang malalus taloh je inyoho Yesus ewen.

⁷Maka ewen mimbit kalidai te dengan anake. Palus ewen malapik likut kare kalidai te hapan jubah ewen. Limbah te Yesus lumpat hunjue.

⁸Are oloh intu hete mambirang kare jubah ewen intu jalan, awang beken tinai manetek kare edan kayu tuntang manataie intu bentok jalan.

⁹ Oloh are je mananjong intu hila baun tuntang hila likut Yesus mangkariak hayak hamauh, “Tara hormat akan Anak Dawid! Imberkat Ie je dumah hong aran Tuhan! Tara hormat akan Hatalla hong ngambo!”

¹⁰Maka metoh Yesus tame Yerusalem, hapus lewu te palus geger. “Eweh toh?” koan kare oloh lewu te misek.

¹¹“Ie toh Nabi Yesus, bara Nasaret hong Galilea,” koan oloh are je mairing Yesus.

¹²Limbah te Yesus tame akan Human Tuhan, tuntang maharak kakare oloh je hajual-habili hete. Ie manambalik kare mejan oloh pahurup duit, tuntang kare bangku ain oloh je bajual burong dara.

¹³ Palus Ie hamauh dengan kare oloh te, “Huang Surat Barasih aton tarasurat kalotoh, ‘Humang-Ku kareh inyewut huma eka balakudoa.’ Tapi keton mawie manjadi eka parampok manyarangan.”

¹⁴Kare oloh babute tuntang lumpuh dumah manalih Yesus hong Human Tuhan, tuntang Ie mampakeleh ewen.

¹⁵Tapi kare imam kapala tuntang kare guru agama balait mite kare taloh heran je ilalus awi Yesus. Tuntang ewen balait kea mahining kare anak oloh basura-surak hong Human Tuhan, “Tara hormat akan Anak Dawid!”

¹⁶ Ewen hamauh dengan Yesus, “Hiningm narai je koan ewen te?” “Iyoh, hining-Ku,” koan Yesus tombah. “En hindai puji keton mambasa huang Surat Barasih auh toh: ‘Kare anak korik tuntang awau jari iajar-Ku uka mambo auh tara je tinduh barasih’?”

¹⁷Limbah te Yesus malihi ewen, palus balua bara lewu te akan Betania tuntang baramalem hete.

¹⁸Hayak jajewu andau ije tinai, jalanan haluli akan lewu, Yesus balau.

¹⁹Ie mite ije kaupon batang sikon hong saran jalan. Ie manalih upon kayu te, tapi ije mahin jaton sondau buae, baya kare dawee ih. Palus Yesus hamauh dengan batang kayu te, “Ikau dia olih mamua tinai!” Balalu ih batang sikon te balayu.

²⁰Katika kare murid Yesus mite kajadian te, ewen paham hengan. “Kilen ampie batang sikon te tau balalu matei urase?” koan ewen misek.

²¹ Yesus tombah, “Toto auh-Ku dengan keton. Amon keton percaya tuntang dia bembang, keton tau mawi taloh je jari iawi-Ku dengan batang sikon toh. Tuntang dia baya jete bewei, keton mahin tau hamauh dengan bukit toh, ‘Hingkat tuntang palus sewu akan huang tasik’; maka jete kareh manjadi.

²²Narai bewei je ilaku keton huang lakudoan keton, keton kareh manarimae asal keton percaya.”

²³Limbah te Yesus haluli akan Human Tuhan, palus tame tuntang majar hete. Metoh Ie majar, kare imam kapala tuntang kare pamimpin Yehudi dumah manalih Ie tuntang misek, “Hunjun dasar narai ikau malalus taloh samandiai toh? Eweh je manenga hak te akam?”

²⁴Yesus kea tombah, “Aku kea handak misek keton. Tuntang amon keton tau tombah, Aku handak mansanan akan keton hapan hak eweh Aku malalus kare hal toh.

²⁵Yohanes mampandoi mahapan hak eweh? Hatalla atawa olon?” Balalu kare imam kapala tuntang kare pamimpin Yehudi te nampara barunding sama arepe, “Amon koan itah, ‘Hapan hak Hatalla,’ Ie akan hamauh, ‘Amon kalote mbuhen keton dia percaya dengae?’

²⁶Tapi amon itah hamauh ‘Mahapan hak olon,’ itah dia bahanyi dengan oloh are, basa ewen uras manyewut Yohanes te ije biti nabi.”

²⁷Jadi ewen tombah, “Ikei dia katawan,” Palus Yesus hamauh dengan ewen, “Amon kalote Aku mahin dia handak mansanan akan keton mahapan hak eweh Aku malalus taloh samandiai toh.”

²⁸“Nah, toh kilen tirok keton tahiu hal jetoh?” koan Yesus manontong auh Ayue. “Aton ije biti bapa tempon due anak hatue. Oloh te manalih anake je bakas tuntang hamauh, ‘Nak, ikau haguet bagawi akan kabon anggor andau toh.’

²⁹‘Aku dia handak,’ koan anak te tombah. Tapi limbah te ie mobah tiroke tuntang haguet akan kabon anggor te.

³⁰Limbah te bapae haguet manalih anake je kaduee, tuntang mansanan auh je sama kalote kea. ‘Iyoh, bapa,’ koan anak je kaduee te tombah. Tapi ie dia haguet.

³¹Nah, bara kadadue anak te, je kueh je malalus kahandak bapae?” “Ije bakas,” koan kare imam kapala tuntang kare pamimpin Yehudi te. Maka Yesus hamauh dengan ewen, “Percaya ih: kare panagih pajak tuntang kare bawin lontei kareh labih helo manjadi anak ungkup ain Hatalla bara keton. [18]

³² Karana Yohanes Pampandoi dumah, tuntang mamparahan akan keton cara belom je ingahandak Tuhan, tapi keton dia maku percaya dengan auh ajare; tapi kareh panagih pajak tuntang kare bawin lontei percaya dengae. Tapi aloh keton jari mite kare taloh samandiai te, keton dia kea mobah tirok keton tuntang dia percaya dengan Tuhan.”

³³ “Hining paribasa ije toh tinai,” koan Yesus. “Ije biti oloh tuan tanah, mimbul anggor huang kabon anggore. Kaliling kabon te ingarambange, tuntang mangali rumbak eka mahamis bua anggor, limbah te mampendeng manara panjaga. Limbah te ie mampasewa kabon anggor te akan tukang panggarap palus haguet akan daerah beken.

³⁴Katika jari sampai wayah mamutik bua anggor, tuan tanah te mangirim kare oloh ayue manalih kare tukang panggarap te uka manarima bagin ayue.

³⁵Tapi kare tukang panggarap te manawan kare oloh ain tuan tanah te: Ije biti buah pukul, je beken impatei, tuntang je beken tinai imanting hapan batu.

³⁶Tuan tanah te mangirim tinai oloh ayue awang beken, labih are hindai bara je ingirime solake te. Tapi ewen te mahin iawi oloh panggarap te hapan cara je sama kalote kea.

³⁷Kajariae, oloh tatau te mangirim manalih ewen anake kabuat, ‘Pasti anakku toh kareh ihormat oloh,’ koan tiroke.

³⁸Tapi metoh oloh panggarap te mite anak tuan tanah te, ewen hamauh sama arepe, ‘Nah, toh ie, ahli warise. Ayo itah mampatei ie, mangat itah mandino warisae!’

³⁹Balalu anak te inawan palus iimbit balua tuntang impatei.”

⁴⁰Yesus misek, “Amon tempon kabon anggor te buli, en je handak iawie dengan kare oloh panggarap te?”

⁴¹Ewen tombah, “Pasti ie kareh mampatei kare oloh papa te, palus mampasewa kabon anggor te akan oloh beken je handak manenga bagin hasil petak te akae amon sampai wayahe.”

⁴² Maka Yesus hamauh dengan ewen, “En keton hindai puji mambasa taloh je inyurat huang Surat Barasih? ‘Batu je dia ihapan awi tukang huma jari manjadi batu je mambatang. Jetoh ie gawin Tuhan; lalehan kahalape!’ ”

⁴³“Jadi keleh mingat,” koan Yesus, “kakare hak ain anak ungkup Hatalla kareh induan bara keton tuntang inenga akan bangsa je kareh malalus kare parentah Hatalla. [

⁴⁴Oloh je manjato intu batu te, akan rotek-ramok; tuntang oloh je penyet batu te, imipis manjadi kawo.]”

⁴⁵Hong katika kare imam kapala tuntang kare oloh Parisi mahining kare paribasa ain Yesus te, ewen katawan je Yesus te hakotak tahiu ewen.

⁴⁶Jadi ewen manggau akale uka manawan Ie. Tapi ewen mikeh dengan oloh are, basa oloh are te maanggap Yesus te ije biti nabi.