Read Ngaju MATEUS 22 Bible Online

MATEUS 22 - Ngaju bible

MATEUS 22

¹Yesus hakotak tinai dengan oloh are mahapan paribasa,

²koae, “Amon Hatalla marentah sama kilau paribasa toh: Ije biti raja mawi pesta kawin akan anake je hatue.

³Raja te manyoho kare oloh ayue haguet manduan kare oloh je irawei akan pesta te. Tapi kare oloh je irawei te dia maku dumah.

⁴Limbah te raja te manyoho tinai kare oloh ayue je beken. Koae dengan ewen te: ‘Sanan akan kare oloh je irawei te: Taloh kinan hong pesta jari tatap. Sapi tuntang kare anak sapi ayungku je pangkahalape jari inyambalih. Taloh handiai jari tatap. Has keleh dumah akan pesta kawin!’

⁵Tapi kare oloh je irawei te dia paduli auhe. Ewen uras haguet akan gawi ayu-ayue — ije biti manalih tanae, je beken tinai akan satiare;

⁶tuntang aton je beken tinai manawan kare oloh ain raja te, palus mamukul tuntang mampatei ewen.

⁷Metoh raja te mahining hal te ie sangit toto. Ie mangirim kare tentarae uka mampatei kare oloh pamuno tuntang manusul lewun ewen.

⁸Limbah te ie mantehau kare oloh ayue palus hamauh, ‘Pesta kawin jari tatap, tapi kare oloh je irawei te jaton patut.

⁹Toh lius keton akan kare jalan hai, tuntang rawei sapire kare oloh je hasondau dengan keton dumah akan pesta kawin toh.’

¹⁰Maka kare oloh ain raja te palus haguet. Ewen haguet akan kare jalan hai palus mamumpong oloh samandiai je hasondau dengan ewen hete, iete kare oloh bahalap tuntang oloh papa kea. Te maka kontep eka oloh pesta kawin te awi kare oloh je irawei.

¹¹Limbah te raja te tame tuntang mite-mite kare ampin oloh je dumah. Ie mite aton ije biti hong pesta te je dia mahapan pakaian pesta.

¹²Palus ie misek dengan oloh te, ‘Ule, kilen ampie ikau tau tame hetoh dia mahapan pakaian pesta?’ Oloh te jaton olih mawi auh en-en.

¹³ Balalu raja te hamauh dengan kare oloh ayue, ‘Jarat pai-lengen oloh te, tuntang jakah ie akan luar intu eka je kaput. Hong hete kareh aton auh tangis tuntang kapehe.’ ”

¹⁴Balalu Yesus mahapus paribasa te kalotoh, “Are je irawei, tapi isut je iintih.”

¹⁵Limbah te kare oloh Parisi haguet palus pakat marunding tahiu kilen ampie ewen tau manjabak Yesus mahapan kare paisek.

¹⁶Maka ewen manyoho kare sarohan ewen manalih Yesus haya-hayak dengan pire-pire oloh bara baris Herodes. Kare oloh te hamauh dengan Yesus, “Pa Guru, ikei katawan Bapa toh bujur atei. Bapa majar tara-tarang tahiu kahandak Hatalla akan olon, dia paduli auh eweh bewei. Basa Bapa dia mintih ampin oloh.

¹⁷Tagal te, coba Bapa mansanan akan ikei: Manumon atoran agaman itah, en tau mambayar pajak akan Kaisar atawa dia?”

¹⁸Awi Yesus katawan kahandak atei ewen je papa te, maka ie hamauh, “O, oloh haliau! Mbuhen keton handak manjabak Aku?

¹⁹Coba parahan akangku bintap duit je ihapan keton mambayar pajak te!” Balalu ewen manenga akae ije kabintap duit perak.

²⁰Yesus misek dengan ewen, “Gambar tuntang aran eweh toh?”

²¹“Kaisar,” koan ewen tombah. Maka Yesus hamauh dengan ewen, “Amon kalote, tenga akan Kaisar taloh je ain Kaisar, tuntang akan Hatalla taloh je ain Hatalla.”

²²Metoh ewen mahining auh katarangan te ewen manjadi hengan. Maka ewen haguet malihi Yesus.

²³ Hong andau te kea, pire-pire oloh Saduki dumah manalih Yesus. Ewen te baris oloh je dia percaya oloh matei tau belom haluli.

²⁴ “Bapa Guru,” koan ewen, “Moses majar kalotoh: Amon ije biti oloh hatue matei, tuntang ie jaton anake, paharie musti kawin dengan balo ayue te uka manuron anak akan oloh je jari matei te.

²⁵Puji aton uju biti oloh hampahari je melai hong hetoh. Je bakas kawin palus matei jaton dinon anak. Maka baloe te ilihie akan paharie.

²⁶Limbah te paharie te matei kea marak jaton dinon anak. Sama kalote manjadi tinai dengan paharie je kateloe tuntang palus sampai je kaujue.

²⁷Kajariae oloh bawi te kabuat mahin matei kea.

²⁸Nah, hong wayah oloh matei impisik tinai, jadi sawan eweh oloh bawi te? Basa kauju-uju ewen te uras puji kawin dengae.”

²⁹Yesus tombah, “Keton sala toto, awi keton dia harati Surat Barasih, tuntang kea kuasan Hatalla.

³⁰Basa amon oloh matei kareh misik, ewen dia kawin tinai, tapi ewen kareh belom kilau malekat hong sorga.

³¹En keton hindai puji mambasa taloh je insanan Hatalla tahiu oloh matei je impisik tinai? Hatalla hamauh,

³² ‘Aku toh Hatallan Abraham, Hatallan Isaak tuntang Hatallan Yakob.’ Ie dia Hatalla ain oloh matei. Ie Hatallan oloh belom!”

³³Katika oloh are te mahining katarangan Yesus, ewen jungun toto dengan auh ajar Aie.

³⁴Hong katika oloh Parisi mahining tahiu Yesus je jari mawi kare oloh Saduki dia olih mawi auh en-en hindai, maka ewen hapumpong.

³⁵ Ije bara ewen te guru agama mancoba manjabak Yesus dengan ije paisek.

³⁶“Bapa guru,” koae, “parentah je kueh je paling mambatang intu huang hukum agama?”

³⁷ Yesus tombah, “Sinta Tuhan Hatallam dengan salepah ateim, dengan salepah hambaruam, tuntang dengan salepah kaharatim.

³⁸Jete parentah je mambatang tuntang je pangkahaie!

³⁹ Parentah je kaduee sama dengan je solake te: Sinta sama arep keton sama kilau ikau sinta arepm kabuat.

⁴⁰Salepah hukum agama je inenga awi Moses tuntang auh ajar kare nabi uras hagalang hunjun due parentah te.”

⁴¹Pandehan kare oloh Parisi hapumpong hete, Yesus misek dengan ewen,

⁴²“Kilen manumon itong keton tahiu Raja Panyalamat? Turonan eweh Ie te?” “Turonan Dawid,” koan ewen.

⁴³“Amon kalote,” koan Yesus misek, “narai sababe Roh Hatalla mampalawa atei Dawid mangat ie manyewut Raja Panyalamat te ‘Tuhan’? Basa Dawid hamauh,

⁴⁴ ‘Tuhan hamauh dengan Tuhang-Ku: mondok bewei hila gantaung-Ku [19] sampai Aku manjadian kare musoh Aim mamenda Ikau.’

⁴⁵Jadi amon Dawid manyewut Raja Panyalamat te ‘Tuhan’, kilen ampie Ie salenga tau turonan Dawid?”

⁴⁶Maka ije biti mahin jaton oloh tau tombah auh Yesus. Tuntang nampara bara andau te, jaton aton oloh je bahanyi misek taloh en-en hindai Dengae.