Read Ngaju MATEUS 23 Bible Online

MATEUS 23 - Ngaju bible

MATEUS 23

¹Palus Yesus hamauh dengan kare oloh are tuntang dengan kare murid Ayue,

²“Kare guru agama tuntang kare oloh Parisi mandino kuasa uka manarang riman hukum ain Moses.

³Awi te keleh mamenda tuntang manumon taloh samandiai je inyoho ewen. Tapi ela malalus taloh je iawi ewen, basa ewen dia manjalan taloh je iajar ewen.

⁴Ewen manuntut kare hal je bahali tuntang manenga kare atoran je babehat, tapi isut mahin jaton ewen tau mandohop oloh manjalae.

⁵ Uras kare taloh je ilalus ewen te baya akan indu tampayah oloh ih. Ewen tantai ihate mahapan talin sombayang je lomba-lombah tuntang mamanjang kawir jubah ewen![20]

⁶Ewen rajin eka je bahalap hong kare pesta, tuntang karusi je tamam hong kare huma sombayang.

⁷Ewen rajin ihormat awi oloh hong kare pasar, tuntang intehau ‘Bapa Guru’.

⁸Tapi keton ela handak intehau ‘Bapa guru’, basa gurun keton baya aton ije tuntang keton samandiai uras hampahari.

⁹Tuntang ela aton oloh hong kalunen toh keton mantehau ‘Bapa’, basa Bapa keton baya aton ije, iete Bapa je huang sorga.

¹⁰Tuntang ela keton handak intehau ‘Pamimpin’, basa pamimpin keton baya aton ije, iete Raja Panyalamat je injanji Hatalla.

¹¹ Oloh je pangkahaie hong marak keton, musti ie manjadi jipen keton.

¹² Oloh je mampagantong arepe akan imparandah, tuntang oloh je mamparandah arepe akan inggatang.”

¹³“Calaka keton kare guru agama tuntang kare oloh Parisi! Keton tukang pura-pura. Keton mahambang oloh uka manjadi anak ungkup ain Hatalla. Keton kabuat dia maku manjadi anak ungkup ain Hatalla, tuntang oloh beken je handak, ihambang keton. [

¹⁴Calaka keton kare guru agama tuntang kare oloh Parisi: Keton tukang pura-pura. Keton manipu kare balo marampas humae tuntang hapa mangalindong kapapa te keton balakudoa panja-panjang. Jete sababe hukuman akan keton kareh babehat!]

¹⁵Calaka keton kare guru agama tuntang kare oloh Parisi! Keton tukang pura-pura! Keton haguet keja-kejau dimpah laut, tuntang mangumbang hunjun petak baya awi mimbit ije biti oloh mangat tame agaman keton. Tuntang limbah oloh te tame agaman keton, keton mawi ie jadi bakal naraka ije due kali lipet kapapae bara keton kabuat!

¹⁶Calaka keton kare pamimpin ije babute! Keton majar kalotoh, ‘Amon oloh basumpah tagal aran Human Tuhan, oloh te dia leket dengan sumpahe; tapi amon ie basumpah tagal amas je huang Human Tuhan, ie leket dengan sumpahe te.’

¹⁷Keton toh oloh ije humong tuntang babute! Je kueh je labih mambatang: amas te atawa Human Tuhan je manjadian amas te barasih?

¹⁸Keton majar kea jetoh, ‘Amon oloh basumpah tagal mesbeh, oloh te dia leket awi sumpahe te; tapi amon ie basumpah tagal parapah intu hunjun mesbeh te, ie leket awi sumpahe te.’

¹⁹Lalehan kabute matan keton! Je kueh je labih mambatang? Parapah atawa mesbeh je manjadian parapah te barasih?

²⁰Awi te, amon ije biti oloh basumpah tagal mesbeh, rimae ie basumpah tagal mesbeh, tuntang tagal kare parapah je aton intu hunjue te.

²¹Tuntang amon ije biti oloh basumpah tagal Human Tuhan jete rimae ie basumpah tagal Human Tuhan te, tuntang tagal Hatalla je melai huang hete.

²² Tuntang amon ije biti basumpah tagal sorga, jete rimae ie basumpah tagal padadusan Tuhan, tuntang tagal Hatalla je mondok hunjun padadusae te.

²³ Calaka keton kare guru agama tuntang kare oloh Parisi! Keton tukang pura-pura. Kare parapah kilau jintan, katumbar tuntang manyan mahi inenga keton bagi sapuluhe akan Tuhan. Padahal kare taloh je mambatang huang kare hukum agama, paribasa kilau: Kabujur, asi, tuntang kaketep, dia keton padulie. Padahal jete sapunae je musti keton malaluse, sambil malalus taloh awang beken kea.

²⁴Keton toh uras pamimpin je babute! Langau tingkep intu taloh ihop keton, inapis keton, padahal onta inelen keton!

²⁵Calaka keton kare guru agama tuntang oloh Parisi! Keton tukang pura-pura! Kare mangkok tuntang piring keton ienyau keton barasi-rasih hila luare, padahal hila huange papa toto awi kare taloh je dinon keton hapan kakaras tuntang kabungu.

²⁶O oloh Parisi je babute! Enyau helo rasi-rasih kare mangkok tuntang piring keton hila huange, mangat hila luare barasih kea!

²⁷ Calaka keton kare guru agama tuntang oloh Parisi! Keton tukang pura-pura! Keton kilau kubur je inyapu baputi; bahalap gitan bara luar, tapi intu huange kontep tolang tuntang kakare taloh maram.

²⁸Kilau te kea keton. Oloh mite keton bahalap bara luar; tapi intu huang, keton kontep tanjaro tuntang kare kasalan.”

²⁹“Calaka keton kare guru agama tuntang kare oloh Parisi! Keton tukang pura-pura! Keton mamangun kare kubur je bahalap akan kare nabi tuntang makaian kare tugu pangingat akan kare oloh je belom bahalap.

³⁰Tuntang keton hamauh, ‘Jaka ikei belom hong jaman tato hiang ikei horan, dia baka ikei omba kare ewen je mampatei kare nabi.’

³¹Jadi keton mangaku kabuat je keton puna turonan kare oloh je mampatei kare nabi!

³²Amon kalote, rajur akae tuntang pajadi akae kare dosa je jari inampara awi kare tato hiang keton te!

³³Keton oloh papa tuntang turonan oloh papa! Kilen ampie keton tau manyalamat arep keton bara hukuman intu naraka?

³⁴Hining bua-buah: Aku kareh mangirim talih keton kare nabi, kare oloh pintar-harati, tuntang kare guru; belahe ewen te kareh impatei keton, tuntang belahe tinai kareh inyampalaki keton. Aton belahe kareh ingapehe keton huang kare huma sombayang, tuntang iharak keton bara lewu ije akan lewu je beken.

³⁵Awi te, keton kareh ihukum tagal pampatei je iawi keton buah kakare oloh je dia basala — nampara bara pampatei Abel je dia basala, sampai pampatei Sakarias, anak Berekhia, je impatei keton intu helat Human Tuhan dengan mesbeh.

³⁶Percaya bewei: uras kare taloh te kareh inanggong awi kare oloh jaman jetoh!”

³⁷“Yerusalem, Yerusalem! Kare nabi impateim. Kare sarohan Hatalla imantingm hapan batu sampai matei. Jari pire kali Aku handak mamumpong kare oloh lewum kilau pehok je mamumpong kare anake hong penda palapase, tapi keton dia maku!

³⁸Tagal te Hatalla dia tinai mampahayak keton.

³⁹Ingat: Nampara bara toh ikau kareh dia mite Aku tinai sampai ikau hamauh, ‘Imberkat Ie je dumah huang aran Tuhan.’ ”