Read Ngaju MATEUS 24 Bible Online

MATEUS 24 - Ngaju bible

MATEUS 24

¹Katika Yesus malihi Human Tuhan, kare murid Ayue dumah manalih Ie tuntang maninjok akan hila pangun Human Tuhan te.

²Yesus hamauh dengan ewen, “En keton mite kare taloh samandiai te? Keleh keton katawan, ije mahin jaton batu hong kare bangunan te kareh je dia bakarak bara ekae. Taloh samandiai te kareh baduroh.”

³Limbah te Yesus haguet akan Bukit Saitun, tuntang metoh Ie mondok, kare murid Ayue dumah handak hakotak Dengae mangabuat ih. “Sanan akan ikei hamparea kare taloh handiai te kareh manjadi,” koan ewen Dengae. “Narai kare tanda je mansanan panumah Bapa hong kalepah kalunen?”

⁴Yesus tombah, “Keleh keton bajaga, ela sampai keton inanjaro oloh.

⁵Basa are oloh kareh dumah mahapan arang-Ku tuntang hamauh, ‘Aku toh Raja Panyalamat!’ Ewen kareh mananjaro are oloh.

⁶Keton kareh mahining kare auh kalahi tuntang barita parang, tapi ela mikeh. Basa kare taloh te uras manjadi, tapi jete dia mansanan katikae jari kiamat.

⁷bangsa ije kareh hakalahi malawan bangsa je beken, tuntang negara ije kareh manyarang negara je beken. Hong hete-hete kareh lembut bahaya tapas panginan tuntang petak hagerek.

⁸Kakare taloh te baya tamparae bewei, kilau kapehe je buah ije biti oloh bawi katika ie handak luas.

⁹ Limbah te keton kareh inawan tuntang inyarah oloh mangat ingapehe tuntang impatei. Hapus kalunen kareh manyingi keton awi keton murid-Ku.

¹⁰Hong katika te are oloh kareh mundur kapercayae, tuntang hadawa sama arepe hayak basingi sama arepe.

¹¹Are nabi pananjaro kareh lembut, tuntang mananjaro are oloh.

¹²Kapapa sasar tayap dia lue-luen sampai are oloh dia olih tinai malalus gawin asi.

¹³ Tapi oloh je tahan sampai kalepahe, kareh inyalamat.

¹⁴Tuntang Barita Bahalap tahiu kilen ampie Hatalla marentah, kareh insanan akan hapus kalunen, uka kakare oloh uras mahininge. Limbah te harun dumah andau kiamat.”

¹⁵ “Keton kareh mite ‘Kapapa je mampahancor’, kilau je insanan awi Nabi Daniel, mendeng hong eka je barasih. (Pampingat akan pambasa: Keleh manggau riman auh te!)

¹⁶Hong katika te, oloh je aton hong Yuda musti hadari akan kare bukit.

¹⁷ Oloh je aton intu sapau huma ela mohon mado manduan taloh huang huma.

¹⁸Oloh je aton intu tana ela mado buli manduan jubahe.

¹⁹Dia laluen kapapae kare andau te akan oloh bawi je batihi, tuntang akan indu je mampatuso anake!

²⁰Keleh balakudoa uka ela sampai keton musti hadari hong wayah pangujan atawa hong andau Sabat!

²¹ Hong kare andau je bakaike-ikeh te kareh lembut kasusah je hai kilau je hindai puji manjadi bara tamparan kalunen sampai katika toh, tuntang dia akan manjadi tinai.

²²Jaka Hatalla dia mamandak katikae; maka ije biti mahin jaton oloh je tau salamat. Tapi tagal oloh ungkup Ayue, Hatalla mamandak wayah kapehe te.

²³Hong katika te amon aton oloh hamauh dengan keton, ‘Ite, Raja Panyalamat te aton hetoh!’ atawa ‘Ie aton intu hete!’ — ela keton percaya oloh te.

²⁴Basa kareh lembut kare panyalamat pananjaro tuntang kare nabi pananjaro. Ewen kareh malalus kare gawi je lala-lalau kahaie, tuntang kare taloh heran hapa mananjaro, amon tau mananjaro ungkup ain Hatalla kea.

²⁵Jadi, keleh mingat! Aku jari mansanae akan keton helo bara kare taloh te manjadi.

²⁶ Amon oloh hamauh dengan keton, ‘Ite, Ie aton hetoh hong padang pasir!’ — ela keton manalih hete. Atawa amon ewen hamauh, ‘Ite, Ie manyahokan hong kamar hetoh!’ — ela percayae.

²⁷Basa panumah Anak Olon sama kilau kalawan kilat je mamancar bara hila timor, tuntang paha-pahai sampai akan hila Barat.

²⁸ Hong kueh aton hantu, hete kea aton burong je kuman hantu.”

²⁹ “Dia tahi limbah kare kasusah kajake wayah te, matanandau kareh manjadi kaput, tuntang bulan jaton tinai kalawae. Kare bintang kareh manjato bara langit, tuntang kare taloh kuasa intu langit kareh manjadi hakangkalut.

³⁰ Limbah te tanda Anak Olon kareh gitan intu langit. Hong katika te kare bangsa hong hunjun petak kareh manangis. Ewen kareh mite Anak Olon dumah hunjun baunandau dengan kuasan Aie tuntang kahaie je paham.

³¹Tarompet hai kareh impahiau, tuntang Anak Olon kareh manyoho kare malekat Ayue mamumpong ungkup Ayue bara kaepat puting kalunen, bara tapakan langit silae sampai tapakan langit je silae tinai.”

³²“Keleh manduan ajar bara batang sikon. Amon kare edae jari bahijau tuntang balemo, tuntang nampara manyuloh, keton katawan jete tanda wayah mandang jari tokep.

³³Kalote kea amon keton mite kare hal te manjadi, katawan keton jete tandae wayahe jari tokep toto. [21]

³⁴Ingat! Kare taloh te kareh manjadi helo bara kare oloh je belom wayah toh matei lepah.

³⁵Langit tuntang petak kareh lilap, tapi auh-Ku tetep sampai katatahie.”

³⁶“Jaton oloh je katawan hamparea andaue tuntang jame, kare malekat hong sorga mahin dia, Anak Hatalla mahin dia,[22] baya Bapa bewei je katawan.

³⁷ Amon Anak Olon dumah kareh, jete ampie sama kilau jaman Noah horan.

³⁸Hong kare andau helo bara danum soho te, kare oloh kuman mihop, tuntang kawin. Kalote raju-rajur sampai akan andau Noah tame akan huang banama.

³⁹ Hong wayah danum soho te mantakan ewen samandiai, harue ewen ingarendeng tahiu taloh je kanjerae manjadi. Maka kalote kea ampie kareh amon Anak Olon dumah.

⁴⁰Hong katika te, due biti oloh je bagawi hong tana: ije biti induan, tuntang ije tinai ilihi.

⁴¹Due oloh bawi je metohe manepong gandom: ije kareh induan, tuntang ije tinai ilihi.

⁴²Jadi keleh batawat, basa keton dia katawan hamparea Tuhan kareh dumah.

⁴³ Keleh mingat jetoh! Amon oloh tempon huma katawan jam pire maling dumah hamalem, ie dia baka batiroh, uka maling te dia tame akan huang humae.

⁴⁴Awi te, keton musti tata-tatap dengan arep keton. Karana Anak Olon kareh dumah hong katika je dia olih keton mangatawae.”

⁴⁵Koan Yesus tinai, “Amon kalote, jipen je kueh je baketep tuntang pintar harati? Jete ie je iangkat awi tuan ayue uka mangapala kare jipen awang beken, mangat ie mampakanan ewen puna hong katikae.

⁴⁶Paham toto kahanjak jipen te amon tuan ayue buli, tuntang manyondau ie metohe malalus kare gawie te.

⁴⁷Percaya ih, tuan te kareh manenga kapercayae akan jipee te uka ie mahaga ramoe.

⁴⁸Tapi amon jipen te oloh papa, ie kareh hamauh huang ateie,

⁴⁹‘Tuan ayung-Ku te magon tahi hindai harue buli,’ palus ie nampara mamukul kare jipen awang beken, tuntang ie kuman mihop dengan kare oloh pambusau.

⁵⁰Tapi kareh tuan te buli hong andau tuntang jam je dia ie katawae.

⁵¹Maka jipen te kareh injerae sakalepah belaie,[23] tuntang iharak akan eka kare oloh haliau. Hete ewen kareh manangis tuntang kapehe.”