Read Ngaju MATEUS 26 Bible Online

MATEUS 26 - Ngaju bible

MATEUS 26

¹Sana Yesus hapus majar taloh samandiai te, Ie hamauh dengan kare murid Ayue,

² “Keton katawan due andau tinai Andau Pesta Paska, tuntang Anak Olon kareh inyarah uka inyampalaki!”

³Hong katika te kare imam kapala tuntang kare pamimpin Yehudi hapumpong hong istana Imam Hai Kayapas.

⁴Ewen barunding uka manawan Yesus benye-benyem mangat mampatei Ie.

⁵“Tapi,” koan ewen, “ela mawie metoh wayah pesta bele lembut karidu kalahi bentok oloh are.”

⁶Katika Yesus aton hong Betania, intu human Simon je bihin puji buah panyakit kulit je bakaike-ikeh,

⁷ ije biti oloh bawi dumah manalih Yesus. Ie mimbit kasa pualam, basuang minyak harum je barega. Katika Yesus metoh mondok kuman, oloh bawi te manata minyak harum te akan hunjun takolok Yesus.

⁸Kare murid Yesus mite taloh je manjadi te ewen palus balait. “En gunae kare taloh toh ihakana-kanan?” koan ewen.

⁹“Minyak harum toh tau injual dengan rega je hai, tuntang duite inenga akan kare oloh je belom susah!”

¹⁰Yesus katawan tirok ewen, palus Ie hamauh, “Mbuhen keton manyusah oloh bawi toh? Ie malalus taloh gawi je bahalap tuntang je patut inara akang-Ku.

¹¹ Oloh je belom susah harajur aton intu marak keton, tapi Aku dia harajur hinje keton.

¹²Awie manata minyak harum te hunjun biting-Ku, ie manatap Aku akan kubur-Ku.

¹³Percaya ih! Hong hapus kalunen, hong kueh bewei Barita Bahalap ain Hatalla imbarita, gawin oloh bawi toh kareh inyarita kea kilau pangingat akae.”

¹⁴Balalu ije biti bara due walas murid Yesus te, je bagare Yudas Iskariot, haguet manalih kare imam kapala.

¹⁵ Ie hamauh dengan ewen, “En taloh je inenga keton akangku amon aku manyarah Yesus akan keton?” Maka ewen mise telo puluh duit perak, palus manenga duit te akae.

¹⁶Nampara bara katika te Yudas manggau katika je bahalap uka mandarhaka mawi Yesus.

¹⁷Intu andau je solake hong wayah Pesta Rote Dia Iragi, kare murid Yesus dumah manalih Ie. Ewen misek, “Hong kueh Bapa handak ikei manatap panginan Paska akan Bapa?”

¹⁸Yesus tombah, “Lius talih ije biti oloh hong lewu tuntang sanan akae, ‘Koan Bapa Guru, jari sampai katika akang-Ku; Aku handak mahaga Paska intu humam haya-hayak dengan kare murid-Ku.’ ”

¹⁹Kare murid Yesus malalus kare taloh je inyoho Yesus ewen. Ewen haguet manatap panginan Paska te.

²⁰Sana hamalem, Yesus dengan duewalas murid Ayue mondok kuman.

²¹Metoh ewen kuman, Yesus hamauh, “Hining toh: ije biti bara keton kareh mandarhaka mawi Aku.”

²²Mahining auh te, kare murid Yesus manjadi kapehe toto ateie. Palus mije-mije ewen te misek dengan Yesus, “Pasti je koan Bapa te beken aku?”

²³ Yesus tombah, “Oloh je manculop rote huang mangkok haya-hayak dengang-Ku, ie te je mandarhaka mawi Aku.

²⁴Punae Anak Olon kareh matei sama kilau je tarasurat huang Surat Barasih. Tapi calaka oloh je mandarhaka mawi Anak Olon! Labih bahalap jaka oloh te dia puji inakan samasinde!”

²⁵Palus Yudas je mandarhaka te hamauh, “Pasti je koan Bapa te beken aku?” Yesus tombah, “Kalote je koam!”

²⁶Metoh ewen kuman, Yesus manduan rote palus manyewut lakudoa tarimakasih. Limbah te Ie mangiwak rote te hapan lengen Ayue kabuat palus manenga akan kare murid Ayue sambil hamauh, “Duan, tuntang kinan; jetoh biting-Ku.”

²⁷Limbah te Ie manduan ije cangkir anggor palus manarimakasih intu Hatalla. Tinai Ie manenga cangkir te akan kare murid Ayue, sambil hamauh, “Ihop toh, kakare keton.

²⁸ Basa jetoh dahang-Ku je manjadi tanda katoton janjin Hatalla — daha je inusoh akan kare oloh hapa mampun dosan ewen.

²⁹Percaya bewei, Aku dia handak mihop anggor toh tinai sampai katika Aku mihop anggor je taheta haya-hayak dengan keton hong Lewu Taheta ain Bapa-Ku.”

³⁰Limbah te ewen te manyanyi ije nyanyi tara, ewen palus haguet akan Bukit Saitun.

³¹ Palus Yesus hamauh dengan kare murid Ayue, “Hong alem toh kea kakare keton kareh hadari malihi Aku; basa huang Surat Barasih tarasurat: Hatalla hamauh, ‘Aku kareh mampatei sakatik te, tuntang kawan tabirie kareh kasaburan.’

³² Tapi limbah Aku imbelom haluli, Aku kareh haguet mananselo keton manalih Galilea.”

³³Petrus hamauh dengan Yesus, “Kanduem ih oloh awang beken uras malihi Bapa, aku toh dia samasinde!”

³⁴“Ingat,” koan Yesus dengae, “Alem toh kea, helo bara manok manando, hantelo ikau jari milim Aku.”

³⁵Petrus tombah, “Aloh aku matei hayak Bapa, aku dia baka mansanan aku dia kasene Bapa!” Tuntang uras kare murid awang beken mahin hamauh kalote kea.

³⁶Limbah te Yesus haguet dengan kare murid Ayue akan ije eka je bagare Getsemane. Hete Ie hamauh dengan ewen, “Keleh mondok hetoh pandehan Aku haguet balakudoa.”

³⁷Palus Ie mimbit Petrus tuntang due anak Sebedeus haguet haya-hayak Dengae. Ie nampara kapehe Ateie tuntang gogop Ampie.

³⁸Ie hamauh dengan kare murid Ayue, “Atei-Ku paham kapehe angate kilau handak matei ih. Keleh keton melai hetoh, tuntang omba bajaga dengang-Ku.”

³⁹Limbah te tinai Yesus haguet keja-kejau isut, palus Ie mahingkep akan petak tuntang balakudoa. “Bapa,” koae, “amon tau, keleh mangejau bara Aku kare kapehe je musti ingkeme-Ku toh. Tapi ela tumon kahandak-Ku, malengkan manumon kahandak Bapa bewei.”

⁴⁰Limbah te Yesus haluli manalih katatelo murid Ayue tuntang ite ewen metoh batiroh. Ie hamauh dengan Petrus, “Aloh baya ije jam bewei keton batelo dia olih bajaga dengang-Ku?

⁴¹Keleh bajaga tuntang balakudoa mangat keton dia buah tingkes. Puna roh keton handak malalus taloh je bujur toto tapi keton dia olih, awi sipat kaolon te balemo.”

⁴²Sinde tinai Yesus haguet balakudoa, koae, “Bapa, amon kapehe toh musti buah Aku, tuntang dia tau ihakan, keleh kahandak Bapa je manjadi.”

⁴³Limbah te Yesus haluli tinai, tuntang mite kare murid Ayue magon batiroh awi ewen paham mangantok.

⁴⁴Sinde tinai Yesus malihi ewen tuntang akan katelo kalie Ie balakudoa hayak manyewut auh je sama kilau helo te kea.

⁴⁵Limbah te Ie haluli tinai manalih kare murid Ayue tuntang hamauh, “En keton magon batiroh tuntang malayan kaheka? Ite, katika jari sampai Anak Olon inyarah akan kuasan kare oloh badosa.

⁴⁶Misik, keleh itah haguet. Ite! Oloh je mandarhaka mawi Aku jari dumah!”

⁴⁷Pandehan Yesus magon hakotak, Yudas, ije bara duewalas murid Ayue te dumah. Haya-hayak dengae dumah kea kare oloh je mimbit padang tuntang gagada. Ewen te inyoho awi kare imam kapala tuntang kare pamimpin Yehudi.

⁴⁸Oloh darhaka te jari mansanan akan ewen tanda toh, “Oloh je inyiumku, jete Ie oloe. Tawan Ie!”

⁴⁹Kalote ewen sampai hong eka te, Yudas balalu manalih Yesus tuntang hamauh, “Tabe, Pa Guru!” Palus Ie manyium Yesus.

⁵⁰Yesus tombah, “Pahari, akan en pahari dumah akan hetoh?”[24] Limbah te oloh are te manokep balalu manawan Yesus.

⁵¹Ije biti bara murid Ayue je aton hete dengan Yesus, manyilak padange tuntang mariwis jipen imam hai sampai balumpeng pindinge.

⁵²Yesus hamauh dengan murid Ayue te, “Ngumpang haluli padangm, basa oloh samandiai je mahapan padang akan matei awi padang.

⁵³Ikau madoe, Aku dia tau balaku dohop dengan Bapa-Ku, tuntang Ie balalu mangirim akang-Ku labih bara duewalas pasukan tentara malekat?

⁵⁴Tapi amon kalote, kueh tau manjadi taloh je inujum huang Surat Barasih sama kilau je puna musti manjadi tumon toh?”

⁵⁵ Palus Yesus hamauh dengan oloh are, “En Aku toh oloh papa, sampai keton dumah hayak mimbit padang tuntang gagada mangat manawan Aku? Genep andau Aku majar huang Human Tuhan tapi keton dia manawan Aku!

⁵⁶Tapi puna jari musti kalote uka manjadi taloh je inyurat awi kare nabi huang Surat Barasih.” Limbah te, kakare murid Ayue hadari malihi Yesus.

⁵⁷Kare oloh je manawan Yesus mimbit Ie akan human Imam Hai Kayapas. Hong hete kare guru agama tuntang kare pamimpin Yehudi jari hapumpong.

⁵⁸Petrus manuntut Yesus bara kejau sampai akan baun human imam hai. Palus Petrus tame akan baun huma te, tuntang mondok hinje dengan kare pengawal. Ie handak mangatawan kilen ampie kajarian kare taloh handiai te kareh.

⁵⁹Kare imam kapala tuntang hapus Pengadilan Agama manggau akal uka mandino saksi tanjaro mangat tau mamutus hukuman matei mawi Yesus.

⁶⁰Tapi ewen jaton mandino bukti, ije mahin jaton, aloh are oloh je mendeng kilau saksi tanjaro. Kajariae aton due biti oloh je dumah akan baun.

⁶¹ Ewen hamauh, “Oloh toh hamauh, ‘Aku olih manduroh Human Hatalla, tuntang huang telo andau olih mamangue haluli.’ ”

⁶²Palus imam hai mendeng, tuntang hamauh dengan Yesus, “En ikau dia tombah kare auh dawan oloh je mawi ikau te?”

⁶³Tapi Yesus benyem ih. Sinde tinai imam hai te hamauh Dengae, “Tagal aran Hatalla je belom, sanan akan ikei en ikau Raja Panyalamat, Anak Hatalla?”

⁶⁴ Yesus tombah, “Kalote ih koam. Tapi percaya bewei: nampara bara katika toh, keton kareh mite Anak Olon mondok hila gantaun[25] Hatalla Je Jaton Tikas Kuasae, tuntang dumah hong hunjun baunandau intu langit!”

⁶⁵ Maka imam hai te marabit pakaiae,[26] tuntang hamauh, “Ie mamapa Hatalla! Dia usah hindai saksi. Keton uras jari mahining kabuat kare auh je mamapa Hatalla.

⁶⁶Toh kilen tirok keton?” Ewen tombah, “Ie basala, tuntang musti matei.”

⁶⁷ Palus ewen maluja baun Yesus, tuntang mamukul Ie. Aton kea je manampar Ie

⁶⁸tuntang hamauh, “Coba nujum akan ikei, o Raja Panyalamat! Eweh je manampar ikau te?”

⁶⁹Petrus metoh mondok intu luar, hong baun huma. Ije biti jipen bawi dumah, tuntang hamauh dengan Petrus, “Dia ikau toh je dengan Yesus oloh Galilea te?”

⁷⁰Tapi Petrus milim arepe intu taharep ewen te samandiai. “Aku dia katawan narai je koam,” koan Petrus tombah,

⁷¹palus ie manalih bauntonggang pagar handak balua. Metoh te ije biti jipen bawi beken hamauh dengan kare oloh hong hete, “Oloh toh endau mahin haya-hayak dengan Yesus bara Nasaret te.”

⁷²Palus Petrus milim tinai, tuntang basumpah. “Puna toto aku dia kasene oloh te!” koan Petrus.

⁷³Dia tahi limbah te, kare oloh je mendeng hete dumah manalih Petrus tuntang hamauh, “Pasti ikau toh aton ije bara kare ewen te. Bara auh kotakm batantu toto jete.”

⁷⁴Balalu Petrus nampara sapa-sapa auhe tuntang hamauh, “Aku dia kasene oloh te!” Hemben te kea manok manando.

⁷⁵Tuntang Petrus taraingat taloh je puji insanan Yesus akae, koae, “Helo bara manok manando, hantelo ikau jari milim Aku.” Balalu Petrus balua tuntang manangis side-siden awi kapehen ateie.