Read Ngaju MATEUS 27 Bible Online

MATEUS 27 - Ngaju bible

MATEUS 27

¹Hayak hanjewu toto, kakare imam kapala tuntang pamimpin Yehudi mamutus uka mampatei Yesus.

²Ewen marantai Ie, tuntang mimbit Ie, balalu manyarah Ie akan Pilatus, gubernur pamarentah Roma.

³ Katika Yudas oloh darhaka te mite Yesus jari imutus buah hukum, te ie manyasal. Palus ie malian telo puluh kabintap duit perak te akan kare imam kapala tuntang kare pamimpin Yehudi.

⁴Ie hamauh, “Aku jari badosa mandarhaka mawi oloh je dia basala, sampai Ie ihukum matei!” Tapi ewen tombah, “Narai perlu ikei padulie? Jete urusan ayum!”

⁵Yudas manjakah duit te akan huang Human Tuhan, palus haguet tuntang manggantong arepe.

⁶Kare imam kapala manduan duit te tuntang hamauh, “Duit toh duit daha. Manumon hukum agama, duit toh dia tau inamean akan huang eka parapah intu Human Tuhan.”

⁷Maka limbah ewen pakat, ewen mangguna duit te akan mamili petak je inyewut Petak Tukang Balanai. Petak te akan eka kuburan oloh tamuei.

⁸Maka tagal te sampai andau toh petak te inggare “Petak Daha”.

⁹ Awi te, maka manjadi taloh je insanan awi Nabi Yeremia, iete, “Ewen manarima telo puluh duit perak, jete rega je imakat awi bangsa Israel hapa mambayar akae.

¹⁰Tuntang duit te hapa ewen mamili Petak Tukang Balanai, kilau je irentah Tuhan akangku.”

¹¹Katika Yesus manaharep Pilatus, gubernur daerah te, Pilatus misek, “En ikau Raja ain oloh Yehudi?” “Kalote ih koam,” koan Yesus tombah.

¹²Tapi metoh kare imam kapala tuntang kare pamimpin Yehudi mansanan are dawan oloh mawi Yesus, Ie dia tombah samasinde.

¹³Tagal te Pilatus hamauh Dengae, “En ikau jaton mahining kakare taloh je indawa ewen mawi ikau?”

¹⁴Tapi Yesus isut mahin dia tombah sampai gubernur te hengan toto.

¹⁵Hong genep wayah Pesta Paska, bahut gubernur malapas ije biti oloh je buah tawan hong penjara, tumon paintih oloh are.

¹⁶Hong katika te aton ije biti oloh tawanan je basewut. Arae te Yesus Barabas.

¹⁷Jadi metoh oloh are jari hapumpong, Pilatus misek ewen, “Eweh oloe je eka kahandak keton mangat aku malapase akan keton? Yesus Barabas atawa Yesus je inyewut Kristus?”

¹⁸Pilatus hamauh kalote awi ie katawan, kare oloh Yehudi je mimbing kuasa te manyarah Yesus akae awi kahirin atei ewen.

¹⁹Metoh Pilatus mondok hong balai pengadilan, sawae mangirim peteh akae, koae, “Ela ikau omba campur pakaran oloh je dia basala te, basa awi ganan Ie, aku mandino nupi je mawi aku mangkarieng andau toh.”

²⁰Tapi kare imam kapala tuntang kare pamimpin Yehudi magon ih manantiring oloh are te uka balaku dengan Pilatus mangat Barabas ilapas tuntang Yesus ihukum matei.

²¹Palus gubernur te misek tinai dengan ewen, “Bara due biti oloh te, eweh ie je ingahandak keton mangat aku malapase akan keton?” “Barabas,” koan ewen tombah.

²²“Amon kalote, kilen gawingku dengan Yesus je inyewut Kristus?” koan Pilatus misek ewen. “Nyampalaki Ie!” koan ewen tombah dere-derep.

²³“Tapi narai kapapan gawie?” koan Pilatus misek. Palus ewen manyangit haream mangkariak tinai, “Nyampalaki Ie!”

²⁴ Kajariae Pilatus katawan je ie jaton olih mawi taloh en-en hindai tuntang kare oloh te ampie sasar ridu. Jadi ie manduan danum, palus intu taharep oloh are te ie menyau lengee tuntang hamauh, “Aku dia omba tiwas dengan pampatei oloh toh! Jetoh tanggong jawab keton!”

²⁵Salepah oloh are te tombah, “Iyoh, nauhe ikei tuntang kare anak ikei mananggong hukum tagal pampateie!”

²⁶Palus Pilatus malapas Barabas akan ewen, tuntang manyoho oloh mahewes Yesus hapan cambuk; tuntang manyarah Ie uka inyampalaki.

²⁷Limbah te kare prajurit Pilatus mimbit Yesus tame akan istana gubernur, tuntang hapus pasukan rimpo-rimpong mangaliling Yesus.

²⁸Ewen mengkak pakaian Yesus, tuntang mangkepan jubah kawo-kawo warnae intu Ie.

²⁹Ewen manampa ije makota bara kare bajakah je haduhi, tuntang mangkepae intu takolok Yesus. Limbah te ewen manjulok ije kadereh sukah hong lengee gantau, palus sontop manyembah intu taharep Ie, tuntang mureh Ie. “Salamat Rajan Oloh Yehudi!” koan ewen.

³⁰Ewen maluja Ie, tuntang manduan sukah te palus mahambat Ie buah takoloke.

³¹Limbah ewen mureh Ie, ewen mengkak jubah te palus mangkepan haluli pakaian ayue kabuat. Limbah te Ie iimbit akan luar uka inyampalaki.

³²Hong benteng jalan, ewen hasondau dengan ije biti oloh bara Kirene bagare Simon. Ewen mamaksa oloh te meton sampalakin Yesus.

³³Limbah te tinai ewen sampai hong eka je bagare Golgota, rimae “Eka Bangon Takolok”.

³⁴ Intu hete ewen manenga akan Yesus danum anggor je iewoi dengan peru. Tapi limbah Yesus mangkeme anggor te, Ie dia maku mihope.

³⁵ Limbah te ewen manyampalaki Ie, tuntang ewen habagi pakaiae mahapan tenong.

³⁶Limbah te ewen mondok manjaga Ie hong hete.

³⁷Intu hunjun takolok Ayue ewen mangkepan surat tahiu dawan oloh mawi Ie, iete: “Jetoh Yesus, Rajan Oloh Yehudi”.

³⁸Haya-hayak Dengae te ewen kea manyampalaki due biti bandit; ije hila gantau Ie tuntang ije tinai hila sambil Ie.

³⁹ Kare oloh je mahalau hete manggiling takoloke,[27] tuntang manawah Yesus.

⁴⁰ Ewen hamauh, “Ikau je handak manduroh Human Hatalla nah, tuntang mamangue tinai huang telo andau! Amon Ikau Anak Hatalla, mohon ih ikau bara sampalaki kau, tuntang nyalamat Arepm!”

⁴¹Kalote kea kare imam kapala tuntang kare guru agama dengan kare pamimpin Yehudi halalea Yesus. Ewen hamauh,

⁴²“Ie tau manyalamat oloh beken, padahal Arepe kabuat dia olih Ie manyalamate! Amon Ie Rajan Oloh Israel, toh keleh Ie mohon bara sampalaki te, harun ikei handak percaya intu Ie.

⁴³ Ie percaya dengan Hatalla, tuntang manyewut arepe Anak Hatalla. Nah, ayo itah mitee en toh Hatalla maku manyalamat Ie.”

⁴⁴Kare bandit je inyampalaki hayak Dengae te mahin kalote kea omba mahina Ie.

⁴⁵Katahin telo jam hong bentok andau, hapus daerah te manjadi kaput.

⁴⁶ Pukul telo halemei, Yesus mangkariak hayak hai auhe, “Eli, Eli, lama sabakhtani?” rimae, “O Hatallang-Ku, O Hatallang-Ku, mbuhen ikau malihi Aku?”

⁴⁷Pire-pire oloh hete mahining kariak te, tuntang hamauh, “Ie mantehau Elia!”

⁴⁸ Ije bara ewen te kaje-kajeng haguet manduan kambang karang, tuntang manculope huang anggor masem. Limbah te ie mantejeke intu tapakan dereh kayu, tuntang manjujue manalih biwih Yesus.

⁴⁹Tapi kare oloh beken hamauh, “Entai, keleh itah mitee en Elia dumah manyalamat Ie!”

⁵⁰Limbah te Yesus mangkariak tinai hayak hai auhe, palus Ie manggeto tahaseng.

⁵¹ Dinding benang je ingkepan huang Human Tuhan barabit sila due bara hunjun sampai akan pendae, petak hagerek tuntang bukit batu bapusit.

⁵²Kare kubur buap, tuntang are ungkup ain Hatalla je jari matei imbelom haluli.

⁵³Ewen balua bara kare kubur limbah Yesus misik bara pampatei, tuntang ewen tame akan Yerusalem. Tuntang hete are oloh mite ewen.

⁵⁴Kapala pasukan haya-hayak dengan kare prajurit je metoh manjaga Yesus manjadi mikeh toto awie mite petak hagerek, tuntang kare taloh handiai je manjadi te. Ewen hamauh, “Toto, Ie toh Anak Hatalla!”

⁵⁵ Hong hete aton kea are oloh bawi je manampayah bara kejau. Ewen te je jari manuntut Yesus mangat mandohop Ie bara metoh hong Galilea.

⁵⁶Bara kare ewen te aton kea Maria Magdalena, Maria indu Yakobus ewen due Yosep, tuntang indu kare anak Sebedeus.

⁵⁷Alem te kea maka dumah ije biti oloh tatau bara Arimatea, je bagare Yosep. Ie te kea murid Yesus.

⁵⁸Ie haguet manalih Pilatus, tuntang balaku hantun Yesus. Palus Pilatus marentah uka hantun Yesus inenga akae.

⁵⁹Maka Yosep manduan hantu te, tuntang mambungkuse hapan benang baputi bara linen je taheta.

⁶⁰Palus ie mingkes hantun Yesus intu huang kubur ayue kabuat je inampa intu huang ije bukit batu. Limbah te ie manggaling ije bindang batu hai hapa matep bauntonggang kubur te, palus ie haguet.

⁶¹Maria Magdalena tuntang Maria je beken melai mondok hete manaharep kubur te.

⁶²Jajewu andau tinai, hong andau Sabat, kare imam kapala tuntang kare oloh Parisi haguet haya-hayak manaharep Pilatus

⁶³ tuntang hamauh, “Tuan, ikei mingat metoh oloh pananjaro te magon belom, Ie puji hamauh, ‘Limbah telo andau Aku kareh misik.’

⁶⁴Awi te, keleh manyoho oloh je manjaga kubur te manjagae bua-buah sampai andau je kateloe, uka kare murid Ayue dia tau manakau hantun Ayue palus hamauh dengan kare oloh, je Ie jari impisik bara pampatei. Tuntang tanjaro je pangkahai toh kareh labih papa bara je solake.”

⁶⁵“Ain keton aton tentara pangawal,” koan Pilatus dengan ewen, “Keleh lius manjaga kubur te sapire kaolih sampai toto aman.”

⁶⁶Palus ewen haguet akan kubur, manyegel batu je manutupe tuntang manyoho tukang jaga melai intu tambuan bauntonggang kubur te, mangat jaton oloh je tau manderoh kubur te.