Read Ngaju MATEUS 4 Bible Online

MATEUS 4 - Ngaju bible

MATEUS 4

¹ Limbah te Yesus iagah awi Roh Hatalla akan padang pasir uka iningkes awi setan.

²Epat puluh andau epat puluh alem Yesus dia kuman. Balalu Ie mangkeme balau.

³Setan dumah tuntang hamauh, “En dia Ikau toh Anak Hatalla? Soho kare batu toh manjadi rote.”

⁴ Yesus tombah, “Huang Surat Barasih aton tarasurat: Olon dia tau belom baya awi rote bewei, tapi awi gagenep auh je ingotak Hatalla kea.”

⁵Limbah te setan mimbit Yesus akan Yerusalem, lewu barasih, tuntang mingkes Ie hunjun Human Tuhan.

⁶ Palus setan hamauh Dengae, “En dia Ikau toh Anak Hatalla? Amon kalote, sewu ih Ikau akan penda; basa huang Surat Barasih aton tarasurat kalotoh, ‘Hatalla akan manyoho kare malekat Ayue mangalindong Ikau, ewen akan manyambut Ikau mahapan lengen ewen, mangat pain Ayum mahin jaton tapohos batu.’ ”

⁷ Yesus tombah, “Tapi huang Surat Barasih aton kea tarasurat, ‘Ela ikau maningkes Tuhan Hatallam.’ ”

⁸Limbah te setan mimbit Yesus tinai akan bukit je gantong toto tuntang mamparahan Akae kakare karajaan hong kalunen hayak dengan kakare panataue.

⁹Palus setan hamauh dengan Yesus, “Uras kare taloh toh handak inengaku akam, amon ikau sontop manyembah aku.”

¹⁰ Yesus tombah, “Dari ikau setan! Huang Surat Barasih aton tarasurat: Sembah Tuhan Hatallam, tuntang keleh manempo Ie bewei!”

¹¹Kajariae setan malihi Yesus, tuntang kare malekat dumah mandohop Ie.

¹² Katika mahining Yohanes inamean akan huang penjara, Yesus haguet mangejau Arepe akan Galilea.

¹³ Ie malihi Nasaret palus melai hong Kapernaum, intu saran Danau Galilea hong daerah Sebulon tuntang Naptali.

¹⁴Awi Yesus malalus hal te, maka tulus auh je inyampai awi Nabi Yesaya:

¹⁵ “Tanah Sebulon tuntang tanah Naptali, hong jalan akan danau, silan Sungei Yordan, Galilea tanah oloh je dia Yehudi!

¹⁶bangsa je belom huang kakaput jari mite kalawa je paha-pahai! Akan oloh je melai huang lewun kangkalingen pampatei jari lembut kalawa hai!”

¹⁷ Bara katika te Yesus nampara mambarita, “Hobah keton bara kare dosan keton, karana Hatalla kareh bajeleng marentah kilau Raja!”

¹⁸Metoh Yesus mananjong hong saran Danau Galilea, Ie mite due biti palauk, iete Simon (ije inggaree kea Petrus) dengan andie, Andreas. Ewen te kanjerae malauk hong danau te mahapan jala.

¹⁹Yesus hamauh dengan ewen, “Kahetoh, omba Aku. Aku handak majar keton manjala olon.”

²⁰Balalu ewen te malihi jalae palus omba Yesus.

²¹Yesus marajur tanjonge, palus Ie mite tinai due biti oloh beken hampahari, iete Yakobus tuntang Yohanes, ewen te anak Sebedeus. Ewen habapa te kanjerae mangambuah jalae hong arut. Yesus mantehau ewen kea,

²²tuntang ewen balalu malihi arute dengan bapae, palus omba Yesus.

²³ Hong Galilea, Yesus manamuei mangumbang daerah te tuntang majar hong kare huma sombayang, Ie mangabar Barita Bahalap tahiu Hatalla je handak marentah. Tuntang Ie kea mampakeleh kare oloh je haban tuntang cacat.

²⁴Kabar tahiu Yesus te tayap akan hapus daerah Siria, sampai are oloh dumah manalih Ie. Ewen mimbit kare oloh je buah macam-macam ampin panyakit tuntang kasusah. Kare oloh ije irasuk awi roh papa, je awi inyon, ije lumpuh, uras impakeleh awi Yesus.

²⁵Are toto oloh je omba Yesus wayah te. Aton je dumah bara Galilea, bara Lewu Sapuluh, bara Yerusalem, bara Yuda, tuntang aton tinai je bara lewu hong dipah silan Yordan.