Read Ngaju MATEUS 5 Bible Online

MATEUS 5 - Ngaju bible

MATEUS 5

¹Katika Yesus mite oloh are te, Ie mandai akan hunjun bukit. Limbah Ie mondok, kare murid Ayue dumah manalih Ie,

²palus Ie majar ewen:

³“Salamat oloh je mangkeme jaton kaabase tuntang harap baya dengan Tuhan bewei; ewen te anak ungkup ain Hatalla!

⁴ Salamat oloh je kapehe ateie; maka Hatalla handak mampong ewen!

⁵ Salamat oloh je randah ateie; maka Hatalla handak manggenep janjin Aie akan ewen!

⁶ Salamat oloh je haus huange handak malalus kahandak Hatalla; maka Hatalla handak mameda angat huang ewen!

⁷Salamat oloh je masi dengan oloh beken; maka Hatalla handak masi ewen kea!

⁸ Salamat oloh je tinduh ateie; ewen kareh mangasene Hatalla.

⁹Salamat oloh je bagawi akan kadamai oloh kalunen; maka Hatalla handak mangaku ewen kilau anak Ayue!

¹⁰ Salamat oloh je buah kapehe awi malalus kahandak Hatalla; basa ewen te anak ungkup ain Hatalla!

¹¹ Salamat keton amon keton ihalalea atawa ingapehe, tuntang imapa tagal Aku.

¹² Kare nabi je belom helo bara keton mahin jari ingapehe kilau te. Buah keton hanjak rantang, basa hai upah je inatap Tuhan akan keton.”

¹³ “Keton toh uyah kalunen. Amon uyah manjadi batawah, en tau ie ingahing haluli? Jete jaton baguna hindai, malengkan inganan tuntang ihunje oloh.

¹⁴ Keton toh kalawan kalunen. Lewu je aton hunjun bukit dia tau basilim.

¹⁵Jaton oloh mambelom sumbo, palus manutup sumbo te mahapan gantong. Tapi ie kareh mingkes sumbo te hong tantahan sumbo, mangat manenga kalawa akan gagenep oloh intu huma.

¹⁶ Kalote kea kalawan keton musti paha-pahai intu taharep oloh, uka ewen mite kare gawin keton je bahalap, palus manara Bapa keton je huang sorga.”

¹⁷“Ela keton manyangka Aku dumah handak manganan hukum Moses tuntang auh ajar kare nabi. Aku dumah dia handak manganae, tapi mangat mamparahan rimae ije bujur.

¹⁸ Ingat! Katahin langit tuntang petak magon aton, ije hurup atawa titik je paling korik mahin jaton tau nihau bara huang hukum te, amon kare auh ajar huang hukum te hindai manjadi! [2]

¹⁹Tagal te eweh bewei je malanggar aloh ije bara kare parentah te, aloh kilen ampin kakorike; tuntang majar oloh beken mawie kalote kea, ie kareh manjadi ije paling korik bara kare anak ungkup ain Hatalla. Tapi eweh bewei je malalus kare parentah te tuntang majar oloh beken mawie kalote kea, ie kareh manjadi hai bara marak kare anak ungkup ain Hatalla.

²⁰Jadi, ingat bua-buah: Keton dia olih manjadi ungkup ain Hatalla, amon keton dia labih bara kare guru agama tuntang kare oloh Parisi huang hal malalus kahandak Hatalla!”

²¹ “Keton katawan ain tato hiang itah aton auh ajar kalotoh: Ela mampatei olon; ewe-eweh ije mampatei, musti iimbit akan pakara.

²²Tapi toh Aku hamauh dengan keton, ewe-eweh je balait[3] dengan oloh beken, kareh iimbit akan pakara; tuntang ewe-eweh je hamauh dengan oloh beken, ‘Ceh ikau toh jaton gunae,’ kareh iimbit manaharep Majelis Agama. Tuntang eweh bewei je manyewut oloh beken ‘Humong’, patut inganan akan apui naraka.

²³Tagal te amon aton ije bara keton metoh ie manyarah parapahe akan Hatalla, hete ie teraingat aton oloh je kapehe ateie dengae,

²⁴keleh ie malihi helo parapahe te hong baun mesbeh, palus tolak badamai dengan oloh te. Limbah te ie tau haluli tuntang manyarah parapahe te akan Hatalla.

²⁵Paribasae aton oloh mangado keton akan pangadilan, keleh badamai ih dengae sarai magon aton katika helo bara sampai akan pangadilan. Amon dia, oloh te kareh manyarah keton akan hakim je handak manyarah keton akan polisi. Palus polisi kareh manamean keton akan huang penjara.

²⁶Tuntang ingat: keton pasti dia baka tau balua bara penjara te, helo bara keton mamunah kare danda je musti imbayar keton.”

²⁷ “Keton katawan aton auh ajar kalotoh: Ela habandong.

²⁸Tapi toh Aku hamauh dengan keton: ewe-eweh je manampayah oloh bawi sampai lembut kipee, oloh te jari habandong dengan oloh bawi te huang ateie.

²⁹ Amon matam hila gantau mawi sabab ikau badosa, karuit tuntang kanan matam te! Labih bahalap ikau nihau ije bara kare ramon bitim bara ikau dengan hapus bitim inganan akan huang apui naraka.

³⁰ Amon lengem gantau mawi sabab ikau badosa, tetek tuntang kanan lengem te! Labih bahalap ikau nihau silan lengem bara hapus bitim tame akan naraka.”

³¹ “Aton kea auh ajar kalotoh: genep oloh je manganan sawae, musti manenga surat hatolang akae.

³² Tapi toh Aku hamauh dengan keton: ewe-eweh je manganan sawae padahal oloh bawi te jaton gawie je sala, ie mawi sabab sawae te habandong amon sawae te kawin tinai. Tuntang ewe-eweh je kawin dengan oloh bawi je inganan kalote, ie habandong kea.”

³³ “Keton katawan ain tato hiang itah aton auh ajar kalotoh: ela malawan janji. Taloh je jari injanjim hapan sumpah intu taharep Hatalla, musti ikau malaluse.

³⁴ Tapi toh Aku hamauh dengan keton: ela samasinde basumpah, maninjok langit, basa langit te padadusan Hatalla,

³⁵ atawa maninjok petak, basa petak te lapik Paie; atawa maninjok Yerusalem, basa jete lewun Raja hai.

³⁶Ela kea basumpah maninjok takolokm, basa ikau kabuat jaton tau manampa balaum mawie jadi baputi atawa babilem, aloh ije kalambar.

³⁷Sewut ih ‘Yoh’ atawa ‘Dia’ — labih bara te, jete dumah bara setan.”

³⁸ “Keton katawan aton kea auh ajar kalotoh: mate ganti mate, kasinge ganti kasinge.

³⁹Tapi toh Aku hamauh dengan keton: ela mambaleh mawi oloh ije mawi kapapa dengan keton. Tapi amon oloh manampar pipim hila gantau, nauhe ie manampar pipim hila sambil kea.

⁴⁰Tuntang amon oloh mangado keton akan hakim tuntang mimes bajum, tenga kea akae jubahm.

⁴¹Amon aton pajabat pamarentah mamaksa keton meton ramoe akan ije kilo meter kakejaue, eton akae sampai due kilometer.

⁴²Amon oloh balaku taloh en-en dengan keton, tenga ih akae. Tuntang ela kea manolak oloh je handak minjam taloh en-en dengan keton.”

⁴³ “Keton katawan aton auh ajar kalotoh: keleh keton sinta kare sobat keton tuntang basingi musoh keton.

⁴⁴Tapi toh Aku hamauh dengan keton: keleh sinta musoh keton, tuntang balakudoa akan kare oloh je mangapehe keton,

⁴⁵uka keton manjadi anak Bapa keton je huang sorga. Basa Hatalla mampalembut matanandau Ayue akan oloh je bahalap tuntang akan oloh je papa kea. Ie mampamohon ujan akan oloh je mawi gawi bahalap tuntang akan oloh je mawi gawi papa kea.

⁴⁶Basa amon keton sinta baya dengan oloh je sinta keton bewei, akan en Hatalla musti mambaleh gawin keton te? En dia kah kare panagih pajak mahin mawie kalote?

⁴⁷Tuntang amon keton manenga hormat baya akan kare sobat keton bewei, narai kea kalabiee te? Kare oloh je dia mangasene Hatalla mahin mawie kalote!

⁴⁸ Bapa keton huang sorga sinta dengan oloh handiai hapan katinduh. Keton musti kalote kea.”