Read Ngaju MATEUS 6 Bible Online

MATEUS 6 - Ngaju bible

MATEUS 6

¹ “Ingat, ela keton malalus ampin kapatut agaman keton hong taharep oloh are mangat gitan oloh. Amon keton mawie kalote, Bapa keton huang sorga dia baka manenga upah akan keton.

²Jadi, amon keton manenga sadakah akan oloh je belom susah, ela manarong hal te sama kilau je iawi kare oloh haliau. Ewen rajin malalus jete intu huang huma sombayang tuntang hong bentok jalan hai, mangat inara oloh. Ingat, ewen te jari manarima upahe.

³Tapi keton, amon keton manenga sadakah, tenga suni-suni, sampai jaton oloh je katawae.

⁴Keleh gawim te dia usah ingatawan awi eweh bewei, tapi baya awi Bapa keton hong sorga. Ie mite gawim je basilim tuntang Ie handak manenga upah akan keton.”

⁵ “Amon keton balakudoa, ela sama kilau kare oloh je rajin pura-pura. Ewen rajin balakudoa sambil mendeng hong huma sombayang tuntang hong simpang jalan mangat gitan oloh. Ingat, jete ih upah je jari inarima ewen.

⁶Tapi amon keton balakudoa, tame kamar tuntang atep bauntonggang, palus balakudoa intu Bapam je dia gitan te. Maka Bapam je mite gawim je basilim te kareh manenga upah akam.

⁷Amon keton balakudoa, ela auh keton lula-luli sama kilau kare oloh je dia mangasene Tuhan. Ewen manyangka palakun ewen te akan ihining, awi lakudoan ewen je panjang te.

⁸Ela keton sama kilau ewen. Bapa keton jari katawan taloh je imerlu keton, helo bara keton balakue.

⁹Jadi keleh balakudoa kalotoh, ‘Bapa ikei hong sorga: Aram buah imparasih. Keleh Karajaan Aim dumah.

¹⁰Kahandak Aim akan manjadi kilau hong sorga kakai kea hunjun petak.

¹¹Tenga taloh kinan ikei ombet akan andau toh. [4]

¹²Ampun kare kasalan ikei, kilau ikei jari mampun oloh je sala dengan ikei.

¹³Ela manamean ikei huang tingkes tapi paliwus ikei bara taloh papa karana Ayum aton karajaan, tuntang kuasa, tuntang kahai palus katatahie, Amen.’

¹⁴ Amon keton mampun oloh je basala dengan keton, Bapa keton je huang sorga mahin kareh mampun kasalan keton.

¹⁵Tapi amon keton dia mampun kasalan oloh beken, Bapa keton hong sorga kea dia baka mampun kasalan keton.”

¹⁶“Amon keton puasa, ela baun keton kilau oloh je rajin pura-pura. Ewen mobah ampin tampayah baue mangat oloh katawan ewen te puasa. Ingat, tikas te ih upah je jari dinon ewen.

¹⁷Tapi amon keton puasa, enyau baun keton tuntang nyarak balau keton,

¹⁸mangat jaton oloh je katawan keton puasa, baya Bapam je dia gitan te bewei. Ie mite gawim je basilim te tuntang kareh manenga upah akam.”

¹⁹ “Ela manampunan panatau akan arep keton hong kalunen toh, je eka gagat tuntang tagar tau marusake tuntang maling tau manakaue.

²⁰Tapi tampunan panatau sorga, je eka gagat tuntang tagar dia tau marusake, tuntang maling dia tau dumah manakaue.

²¹Karana hong kueh panataum, hete kea ateim!”

²²“Mate jete sumbo akan biti. Amon matam barasih, maka hapus bitim balawa paha-pahai.

²³Tapi amon matam hawor, maka hapus bitim kaput pijem. Jadi amon sumbo huang arepm te kaput, paham haream kakaput te!”

²⁴“Ije biti mahin jaton oloh tau bagawi akan due tuan. Basa ie kareh labih sinta dengan ije bara dengan je beken te. Atawa ie kareh labih heret dengan tuan ije te bara je beken. Kalote kea dengan keton. Keton dia tau bagawi akan Hatalla tuntang akan ramon panatau kea.

²⁵Awi te ingat; ela mikeh tahiu pambelom keton, tahiu taloh je kinan tuntang taloh je ihop keton, atawa taloh je akan hapan keton. En dia pambelom labih hai bara panginan, tuntang biti labih bara pakaian?

²⁶Ite burong hong penda langit. Ewen jaton mimbul, jaton manggetem, tuntang jaton kea manampunan hasil taloh imbule akan huang lepau. Aloh kalote, Bapa keton je huang sorga mahaga ewen! En dia keton toh kejau kahain regan keton bara burong?

²⁷Eweh bara keton je tagal kikehe tau mamanjang umure isut barangai?[5]

²⁸Mbuhen keton mikeh tahiu pakaian keton? Keleh keton manantuani kare kambang bakung je belom hong padang. Kare kambang te jaton bagawi tuntang manjawet;

²⁹ Tapi Raja Salomo je kalote katataue mahin jaton mahapan pakaian je sama kahalape kilau kambang te!

³⁰Oru hong padang lembut andau toh tuntang andau jewu lepah inusul. Tapi Hatalla makaian oru te kalote kahalape. Mahin tinai je keton! Tapi keton kurang percaya!

³¹Ela keton mikeh tuntang hamauh, ‘Narai je akan indu kinan itah’ atawa ‘narai taloh ihop itah’, atawa ‘narai taloh je akan hapan itah’?

³²Kare taloh te harajur inggoang awi kare oloh je dia kasene Hatalla. Padahal Bapa keton je huang sorga katawan je keton manggau taloh samandiai te.

³³Jadi, gau helo jalan mangat Hatalla marentah hong pambelom keton tuntang lalus kahandak Ayue. Maka kare taloh awang beken kareh inenga Hatalla kea akan keton.

³⁴Tagal te, ela mikeh tahiu andau jewu. Basa andau jewu aton tinai kikeh ayue kabuat. Andau toh jari sukup kasusahe, dia usah indahang tinai.”