Read Ngaju MATEUS 7 Bible Online

MATEUS 7 - Ngaju bible

MATEUS 7

¹“Ela mahakim oloh beken, uka keton kabuat dia ihakim kea awi Hatalla.

² Karana sama kilau keton mahakim oloh beken, kalote kea Hatalla mahakim keton. Tuntang ukuran je hapan keton akan oloh beken, kareh ihapan Hatalla kea buah keton.

³Mbuhen keton mite rotik huang matan paharim, padahal balok huang matam kabuat dia ikau manantuanie?

⁴Kilen keton tau hamauh dengan paharin keton, ‘Hetoh aku mampalua rotik te bara matam,’ padahal huang matam kabuat aton balok?

⁵O, oloh haliau! Palua helo balok te bara matam kabuat, harue ikau tau mite tarang batantu, tuntang tau mampalua rotik bara matan paharim.

⁶Ela manenga taloh barasih akan aso, mangat ela aso te mules tuntang mamok ikau. Tuntang ela manenga mutiara akan bawoi, mangat bawoi te dia manandik mutiara te.”

⁷“Laku, maka keton kareh manarima. Gau, maka keton kareh mandino. Tegah, maka bauntonggang kareh iuap akan keton.

⁸Karana oloh je balaku kareh manarima; oloh je manggau kareh mandino; tuntang oloh ije manegah, akae bauntonggang iuap.

⁹En aton bara marak keton ije bapa je manenga batu akan anake amon anake te balaku rote?

¹⁰Atawa manenga handipe amon ie balaku lauk?

¹¹Aloh keton oloh papa, mahin katawan keton kea je manenga taloh bahalap akan kare anak keton. Mahin tinai Bapa keton hong sorga! Ie labih haream manenga ije bahalap akan oloh ije balaku intu Ie.

¹² Lalus gawi akan oloh tumon je ingahandak keton oloh mawie kea akan keton. Jete batang hukum Moses tuntang auh ajar kare nabi.”

¹³“Tame mahalau bauntonggang je seke, basa bauntonggang tuntang jalan je manintu naraka puna hai tuntang lombah, tuntang are oloh je mahoroi hete.

¹⁴Tapi puna seke tuntang bahali bauntonggang tuntang jalan je mimbit oloh akan pambelom. Tuntang baya isut oloh je sondaue.”

¹⁵“Bua-buah keton dengan kare nabi pananjaro. Ewen dumah manalih keton kilau ampin tabiri, tapi sapunae ewen te kilau sarigala je basiak.

¹⁶Keton kareh mangasene ewen bara hasil gawie. Rowut bahu haduhi dia tau mampalembut bua anggor, tuntang rowut haduhi dia mampalembut bua ara.

¹⁷Bara batang je basiwoh oloh mandino bua je bahalap, tuntang bara batang je dia basiwoh, bua je papa.

¹⁸Batang je basiwoh dia tau mampalembut bua je papa, tuntang batang je dia basiwoh dia tau mampalembut bua je bahalap.

¹⁹ Gagenep batang je dia mampalembut bua je bahalap, ineweng tuntang inusul.

²⁰ Kalote kea dengan kare nabi pananjaro. Keton mangasene ewen bara hasil gawie.”

²¹“Dia uras oloh je mantehau Aku ‘Tuhan, Tuhan,’ kareh manjadi anak ungkup ain Hatalla, tapi baya kare oloh je malalus kahandak Bapa-Ku je hong sorga.

²²Hong Andau Kiamat are oloh kareh hamauh dengang-Ku, ‘Tuhan, Tuhan, en dia huang aran Aim ikei jari mansanan peteh Hatalla? Tuntang diakah huang aran Tuhan kea ikei jari maharak kare setan tuntang mawi are taloh heran?’

²³ Tapi Aku kareh tombah, ‘Aku dia puji mangasene keton! Dari bara hetoh, keton je mawi taloh papa!’ ”

²⁴“Nah oloh je mahining auh-Ku toh, tuntang manumoe, sama kilau oloh pintar je mamangun humae hunjun batu.

²⁵Katika ujan mohon tuntang danum soho dumah hayak riwut karas manampur huma te, maka huma te dia baduroh awi jari imangun hong hunjun batu.

²⁶Tuntang oloh je mahining auh-Ku toh, tapi dia manumoe, ie sama kilau oloh humong je mamangun humae hunjun pasir.

²⁷Metoh ujan dumah palus danum soho paham hayak riwut karas manampur huma te, maka huma te baduroh. Tuntang karusake paham toto!”

²⁸ Kajariae auh ajar Yesus te hapus, tuntang kare oloh je aton hete paham hengan mahining ajar Ayue.

²⁹Basa Ie majar hapan kahain pangaruh, dia kilau kare guru agama ain ewen.