Read Ngaju MATEUS 8 Bible Online

MATEUS 8 - Ngaju bible

MATEUS 8

¹Yesus mohon bara bukit tuntang are oloh manuntut Ie.

²Hong katika te maka dumah ije biti oloh je buah panyakit kulit je bakaike-ikeh ampie.[6] Ie sontop mandeko utute intu taharep Yesus, palus hamauh, “Pa, amon Bapa handak, Bapa tau mampakeleh aku.”

³Yesus manggayap oloh te sambil hamauh, “Yoh Aku handak. Ikau keleh!” Hemben te kea panyakite te nihau.

⁴ Palus koan Yesus dengae, “Ingat! Ela manyaritae akan eweh bewei. Tapi keleh ikau haguet talih imam, tuntang balaku dengae uka manukas ikau toh jari keleh. Limbah te sarah parapahm tumon je irentah awi Moses, kilau bukti akan kare oloh je ikau puna toto-toto jari keleh!”

⁵Metoh Yesus tame lewu Kapernaum, ije biti perwira Romawi dumah manyondau Ie, tuntang balaku dohop intu Ie.

⁶“Bapa,” koan perwira te, “jipengku haban hong huma. Ie menter lemo-lupek hong ekae batiroh tuntang paham kapehee.”

⁷Koan Yesus, “Aku kareh dumah mampakeleh ie.”

⁸“Dia usah Pa,” koan perwira te, “Aku dia patut manarima Bapa intu humangku. Bapa manenga parentah ih. Kareh jipengku te keleh ih awi parentah Ayum.

⁹Awi aku mahin musti tundok dengan parentah atasan ayungku. Tuntang penda aku aton kea kare prajuritku je musti tundok dengan parentahku. Amon aku manyoho ije biti prajurit ‘Haguet!’ maka ie haguet. Dengan je beken aku hamauh ‘Kahetoh!’ maka ie dumah; tuntang amon aku marentah jipengku ‘Lalus jetoh!’ maka ie malaluse.”

¹⁰Metoh Yesus mahining taloh je insanan perwira te, Ie paham jungun. Palus Ie hamauh dengan kare oloh je aton omba Ie, “Tamam toto oloh toh. Bara marak oloh Israel mahin hindai puji Aku sondau kapercaya je kahain toh!

¹¹ Toto! Are oloh kareh dumah bara timor tuntang barat uka hanja-hanjak hayak dengan Abraham, Isaak tuntang Yakob hong Lewu Taheta ain Hatalla.

¹² Tapi kare oloh je sapunae manjadi ungkup ain Hatalla te kareh inganan akan eka kakaput hong luar. Intu hete ewen kareh manangis tuntang kapehe.”

¹³Palus Yesus hamauh dengan perwira te, “Buli ih, taloh je imercayam te akan manjadi.” Tuntang hemben te kea jipee te keleh.

¹⁴Yesus haguet akan human Petrus. Intu hete Ie mite empo Petrus je bawi metohe haban badarem hong ekae batiroh.

¹⁵Yesus manggayap lengee, palus dareme nihau. Ie misik tuntang nampara manyang Yesus.

¹⁶Katika andau nampara halemei, oloh mimbit manalih Yesus, are oloh je ingumpang setan. Tuntang hapan ije kabawak kotak ih, Yesus maharak kare setan te tuntang mampakeleh kea kare oloh je haban.

¹⁷ Yesus malalus taloh handiai te, tuntang hapan jete maka manjadi kea taloh je insanan awi Nabi Yesaya, iete, “Ie mananggong kapehen itah tuntang mampakeleh panyakit itah.”

¹⁸Maka are toto oloh mangaliling Yesus. Metoh Yesus mite ewen te samandiai, Ie manyoho kare murid Ayue dimpah danau.

¹⁹Palus dumah ije biti guru agama manalih Ie tuntang hamauh, “Bapa Guru, aku handak omba Bapa akan kueh bewei!”

²⁰Yesus tombah, “Sarigala aton rumbake, tuntang burong aton sarangae, tapi Anak Olon jaton eka Akae mampeter arep.”

²¹Palus ije murid Ayue je beken hamauh, “Pa, aku balaku paramisi buli helo mangat mangubur bapaku.”

²²Tapi Yesus tombah, “Hetoh, keleh omba Aku, nauhe ih oloh matei mangubur jalahan ayue kabuat je matei!”

²³Yesus lumpat akan arut tuntang kare murid Ayue omba hayak Dengae.

²⁴Te salenga riwut barat je paham toto manampur danau sampai arut ewen ihampas galombang. Katika te Yesus batiroh.

²⁵Maka kare murid Ayue manalih Ie tuntang mampisik Ie. “Pa! Dohop! Calaka itah toh!” koan ewen.

²⁶“Mbuhen keton mikeh?” koan Yesus. “Keton tapas kepercayan keton dengang-Ku!” Limbah te Yesus mendeng palus malait riwut tuntang danau te. Balalu danau te manjadi tadoh toto.

²⁷Kare murid Yesus hengan. Ewen hamauh, “Oloh en kea Ie toh, sampai riwut tuntang galombang mahin manumon parentah Aie!”

²⁸Yesus sampai dipah silan danau hong tanah Gadara. Intu hete aton due biti oloh je ingumpang setan dumah manalih Ie. Kadadue oloh te basiak toto ampie, sampai jaton ije biti oloh je bahanyi mahalau hete.

²⁹Ewen balua bara liang kubur tuntang mangkariak, “Anak Hatalla, narai je handak Ikau mawie dengan ikei? En Ikau handak mangapehe ikei helo bara wayahe?”

³⁰Dia kejau bara hete are toto bawoi je kanjerae manggau panginae.

³¹Kare setan te balaku dengan Yesus, “Amon Ikau handak manyoho ikei balua, soho ikei tame akan huang kare bawoi te.”

³²“Balua!” koan Yesus. Kare setan te balua bara kadadue oloh te palus tame akan huang bawoi. Kare bawoi te balalu hadari tuntang manangkero bara saran tiwing akan huang danau, palus buseng.

³³Kare oloh je manjaga bawoi te hadari akan lewu tuntang manyarita taloh handiai je manjadi te, tuntang kea tahiu taloh je manjadi buah due biti oloh je ingumpang setan te.

³⁴Maka oloh are huang lewu te palus manyondau Yesus. Metoh ewen mite Yesus, ewen balaku nyame-nyame uka Ie malihi daerah ewen te.