Read Ngaju MATEUS 9 Bible Online

MATEUS 9 - Ngaju bible

MATEUS 9

¹Yesus lumpat akan arut, palus dimpah danau, buli akan lewu-human Ayue. [7]

²Intu hete oloh mimbit manalih Ie ije biti oloh lumpuh, je menter hong ekae batiroh. Katika Yesus mite ampin kapercayan oloh te, Ie hamauh dengan oloh je lumpuh te, “O anak, keleh ikau tanggar ateim! Kare dosam jari iampun.”

³Pire-pire guru agama je aton hete hamauh huang ateie, “Oloh toh mamapa Hatalla!”

⁴Yesus katawan tirok ewen, palus Ie hamauh, “Mbuhen tirok keton papa kalote?

⁵Je kueh je labih murah: manyewut ‘Dosam jari iampun’, atawa manyewut, ‘Hingkat tuntang mananjong’?

⁶Tapi toh Aku handak mambukti akan keton je Anak Olon aton barakuasa hong hunjun petak toh uka mampun dosa.” Palus Yesus hamauh dengan oloh lumpuh te, “Hingkat, gatang ekam batiroh, tuntang buli!”

⁷Oloh lumpuh te palus hingkat tuntang buli akan humae.

⁸Metoh kare oloh mite kajadian te, ewen takikeh tuntang manara Hatalla, basa Hatalla jari manenga kuasa je kalote kahai akan olon.

⁹Limbah te Yesus malihi eka te. Pandehan mananjong, Ie mite ije biti oloh panagih pajak, arae Mateus, metohe mondok hong kantor pajak. Yesus hamauh dengae, “Kantoh, omba Aku!” Maka Mateus mendeng palus omba Yesus.

¹⁰ Metoh Yesus kuman hong human Mateus,[8] maka dumah kare panagih pajak tuntang kare oloh je ianggap dia bahalap awi kare oloh, omba kuman haya-hayak dengan Yesus tuntang kare murid Ayue.

¹¹Kare oloh Parisi aton mite hal te. Tuntang ewen misek dengan kare murid Yesus, “En sababe gurun keton kuman haya-hayak dengan panagih pajak tuntang kare oloh je dia bahalap?”

¹²Yesus mahining auh paisek ewen balalu Ie tombah, “Oloh je barigas dia perlu dokter, baya oloh je haban bewei.

¹³ Riksa narai rimae auh Surat Barasih toh: ‘Aku mangahandak asi, tuntang dia mangahandak meto akan parapah’. Basa Aku dumah dia uka mantehau oloh je manyangka arepe jari bahalap, tapi oloh je ianggap papa.”

¹⁴Limbah te kare murid Yohanes Pampandoi dumah manalih Yesus. Palus ewen misek, “Mbuhen ikei tuntang kare oloh Parisi puasa tapi kare murid Bapa dia?”

¹⁵Yesus tombah, “Kilen angat tirok keton? En tau kare oloh maja hong pesta kawin kapehe ateie amon panganten hatue magon hinje ewen? Batantu dia! Tapi kareh akan dumah katikae panganten hatue te induan bara ewen. Katika te harue ewen puasa.

¹⁶Jaton aton oloh manumpang baju je jari kupit mahapan tantanan benang je magon taheta. Karana tantanan benang te kareh kanjorot tuntang marantat baju te, sampai kajariae mawi rabite paham hai.

¹⁷Jaton kea oloh manyuang anggor je taheta akan huang kambut upak meto je usang. Karana kambut te kareh babindai tuntang rusak, palus anggor te nihau mananya. Anggor je taheta musti inyuang akan huang kambut je taheta kea, uka kadaduee te tetep bahalap.”

¹⁸Metoh Yesus hakotak dengan kare murid Yohanes Pampandoi, maka dumah ije biti pamimpin huma sombayang. Ie sontop mandeko utute intu taharep Yesus tuntang hamauh, “Anakku je bawi harue nihau, tapi keleh pahias dumah uka mimbing ie mangat ie belom tinai.”

¹⁹Yesus harikas tuntang haya-hayak dengan kare murid Ayue haguet dengan oloh te.

²⁰Hong benteng jalan, ije biti oloh bawi je jari due walas nyelo katahie buah panyakit baduroh dahae, dumah manokep Yesus bara hila likut. Ie manirok, “Asal aku manigong jubahe bewei, aku palus keleh.” Palus ie manigong lawin jubah Yesus.

²²Maka hemben te kea Yesus tampaliau tuntang mite oloh bawi te palus hamauh dengae, “Keleh ikau tanggar ateim, anak-Ku! Awi ikau percaya dengang-Ku, ikau keleh!” Hemben te kea oloh bawi te keleh.

²³Limbah te Yesus sampai hong human kapala huma sombayang te. Katika Ie mite kare oloh je main musik hong eka oloh matei tuntang are oloh je ridu-ridu,

²⁴Ie hamauh dengan ewen, “Balua urase keton! Anak toh dia matei; Ie baya batiroh.” Ewen uras manatawe Yesus.

²⁵Limbah kare oloh te balua, Yesus tame akan huang kamar anak te tuntang mimbing lengee. Balalu anak bawi te hingkat.

²⁶Kabar tahiu hal te tayap akan hapus daerah hete.

²⁷Yesus haguet bara hete tuntang hong benteng jalan due biti oloh babute manuntut Ie. Ewen mangkariak, “Anak Dawid, pasi ikei!”

²⁸Katika Yesus tame akan huang huma, kadadue oloh babute te dumah manalih Ie. Yesus misek dengan ewen, “En keton percaya je Aku toh tau mampakeleh keton?” “Percaya Pa!” koan ewen.

²⁹Palus Yesus manggayap matan ewen sambil hamauh, “Awi keton percaya, keleh kare kaharap keton te manjadi.”

³⁰Palus ewen tau mite. Yesus mampingat ewen hapan kapaham auh Aie, uka ela mansanan hal te akan eweh bewei.

³¹Tapi ewen haguet tuntang manyiar barita tahiu Yesus akan hapus tanah te.

³²Katika kadadue oloh te haguet, ije biti oloh bisu je inguasa awi setan imbit oloh manalih Yesus.

³³Yesus maharak setan te tuntang hong katika te kea oloh bisu te tau hakotak tinai. Oloh are te hengan tuntang hamauh, “Hindai puji itah mite kajadian kilau toh hong Israel!”

³⁴ Tapi kare oloh Parisi hamauh, “Kapalan kare setan ih je manenga kuasa Akae hapa maharak setan te.”

³⁵ Kalote Yesus haguet mangumbang kare eka bara lewu ije akan lewu je beken tuntang bara dokoh ije akan dokoh je beken. Ie majar hong kare huma sombayang tuntang mangabar Barita Bahalap tahiu ampin Hatalla marentah kilau Raja. Ie mampakeleh kare oloh je kapehe awi buah sepsimpan ampin kare panyakit tuntang karusak biti.

³⁶ Katika Yesus mite oloh are te, Ie lembut masi dengan ewen, awi ewen heka toto ampie tuntang jaton katawan en taloh je musti iawi ewen, sama kilau tabiri je jaton bara sakatik.

³⁷ Palus Yesus hamauh dengan kare murid Ayue, “Taloh je inggetem toh are, tapi oloh je manggeteme isut ih.

³⁸Awi te laku ih dengan oloh je tempon kabon te uka mangirim oloh je manggetem akan taloh je inggetem.”