Read Ngaju MARKUS 1 Bible Online

MARKUS 1 - Ngaju bible

MARKUS 1

¹Jetoh Barita Bahalap tahiu Yesus Kristus, Anak Hatalla. [1]

² Barita Bahalap te manampara sama kilau je inyurat awi Nabi Yesaya, kalotoh, “ ‘Jetoh Ie sarohangku,’ koan Hatalla; ‘Aku manyoho ie mananselo Ikau, mangat ie manatap jalan Akam.’

³ Aton oloh je mantehau hong padang pasir, ‘Keleh manatap jalan akan Tuhan; parata kare jalan je handak ihoroi Awie.’ ”

⁴Sama kilau je tarasurat te, kalote kea maka lembut Yohanes hong padang pasir. Ie mampandoi oloh tuntang mansanan barita bara Hatalla. [2] “Keton musti hobah bara kare dosan keton tuntang musti impandoi mangat Hatalla mampun keton,” koan Yohanes.

⁵Kare oloh bara tanah Yuda tuntang lewu Yerusalem uras haguet mahining auh Yohanes. Ewen mangaku kare dosan ewen, tuntang Yohanes mampandoi ewen hong Sungei Yordan.

⁶ Yohanes mahapan pakaian bara bulon onta. Peteng kahange bara upak meto, tuntang panginae sangkalap tuntang mado.

⁷Ie mansanan barita toh, “Limbah aku toh, kareh dumah oloh je labih hai bara aku. Aloh sontop mengkak talin sapatun Ayue bewei, mahin aku dia patut.

⁸Aku mampandoi keton hapan danum, tapi Ie kareh mampandoi keton mahapan Roh Hatalla.”

⁹Hong katika te Yesus dumah bara Nasaret intu tanah Yuda, tuntang Yohanes mampandoi Ie huang Sungei Yordan.

¹⁰Sana Yesus lumpat bara sungei te, Ie mite langit buap tuntang Roh Hatalla mohon sama kilau burong dara akan hunjun Yesus.

¹¹ Limbah te tarahining auh Hatalla mansanan, “Ikau toh anak-Ku je inyinta-Ku. Ikau je manyanang atei-Ku.”

¹²Limbah te Roh Hatalla mimbit Yesus akan padang pasir.

¹³Epat puluh andau katahie Ie aton intu hete, iningkes awi setan. Kare meto baliar aton kea hinje Dengae intu hete, tuntang kare malekat mandohop Ie.

¹⁴Limbah Yohanes inamean akan huang penjara, Yesus haguet akan Galilea, tuntang mambarita Barita Bahalap intu hete.

¹⁵ Koan Yesus, “Wayah Hatalla marentah jari tokep. Keleh keton hobah bara kare dosan keton, tuntang keleh percaya dengan Barita Bahalap je bara Hatalla!”

¹⁶Katika Yesus mananjong hong saran Danau Galilea, Ie mite due oloh palauk, iete Simon dengan andie Andreas. Ewen metoh te malauk hong danau mahapan jala.

¹⁷Yesus hamauh dengan ewen, “Has omba Aku. Aku handak majar keton manjala olon.”

¹⁸Balalu hemben te kea ewen malihi jalae palus omba Yesus.

¹⁹Yesus marajur tanjonge palus mite tinai due biti oloh hampahari je beken, iete Yakobus tuntang Yohanes, ewen te anak Sebedeus. Ewen aton huang arut, tuntang metohe mangambuah jalae.

²⁰Yesus balalu mantehau ewen. Tuntang ewen malihi bapae huang arut dengan kare oloh je duan upah dengae. Palus ewen haguet omba Yesus.

²¹Yesus tuntang kare murid Ayue sampai hong lewu Kapernaum. Sana andau Sabat sampai, Yesus tame akan huma sombayang tuntang nampara majar.

²² Kare oloh je mahining auh Ayue jungun tagal cara Ie majar. Basa Ie majar dengan pangaroh, dia sama kilau kare guru agama.

²³Hong katika te ije biti oloh je iname awi roh papa tame akan huma sombayang, tuntang mangkariak,

²⁴“O Yesus, oloh Nasaret, narai je handak iawim dengan ikei? En ikau dumah handak marusak ikei? Aku katawan eweh ikau: ikau, Sarohan je barasih bara Hatalla!”

²⁵“Suni!” koan Yesus marentah roh te, “Balua ikau bara oloh toh!”

²⁶Maka roh papa te manyangit manggerek oloh te, limbah te mangkariak, balalu balua bara oloh te.

²⁷Kakare oloh paham hengan, sampai ewen hamauh sama arepe, “Hau, narai toh? Ije ajar taheta! Hapan pangaroh tuntang kuasa Ie marentah kare roh papa balua, tuntang ewen te mamenda Ie!”

²⁸Maka barita tahiu Yesus hanjulo tayap akan hapus tanah Galilea.

²⁹Yesus tuntang kare murid Ayue malihi huma sombayang te, tuntang haguet akan human Simon ewen due Andreas. Yakobus tuntang Yohanes haguet kea hayak ewen.

³⁰Empo Simon je bawi metohe badarem huang ekae batiroh. Jadi metoh Yesus tuntang kare murid Ayue tame akan huang huma te, hal te jari insanan akan Yesus.

³¹Maka Yesus manalih empo Simon je bawi te, tuntang mimbing lengee, palus mandohop mampahingkat ie. Maka dareme te palus nihau tuntang ie kea manampara mandohop ewen.

³²Halemei tinai limbah matanandau belep,[3] kare oloh mimbit kakare oloh je haban tuntang je iname awi setan manalih Yesus.

³³Kare oloh hapus lewu te hakarimpong intu baun huma te.

³⁴Palus Yesus mampakeleh kare oloh je buah sepsimpan ampin panyakit, tuntang kea maharak kare setan. Ie jaton manalua kare setan te hakotak, basa ewen katawan eweh Ie te.

³⁵Hanjewu andau ijee tinai, metoh magon hewo-hewok, Yesus misik palus haguet bara huma. Ie haguet akan eka je benyem intu luar lewu, tuntang balakudoa hete.

³⁶Tapi Simon dengan kare kawale haguet manggau Ie.

³⁷Tuntang limbah ewen sondau Ie, ewen hamauh, “Kare oloh uras manggau Bapa.”

³⁸Tapi Yesus tombah, “Has itah marajur jalanan itah akan kare lewu beken tokep lakau hetoh. Aku kea musti bahotbah huang kare lewu te, basa jete kea tintun kahimatku akan hetoh.”

³⁹ Tagal te Yesus haguet akan hete-hete hong hapus Galilea, tuntang bahotbah hong kare huma sombayang tuntang maharak kare setan.

⁴⁰Ije biti oloh je buah panyakit kulit je bakaike-ikeh[4] dumah manalih Yesus. Oloh te mandeko utute tuntang hamauh, “Amon Bapa handak, Bapa olih mampakeleh aku.”

⁴¹Yesus masi[5] mite oloh te. Maka Ie manggayap oloh te sambil hamauh, “Aku handak, toh keleh ikau!”

⁴²Hemben te kea panyakite nihau tuntang ie keleh.

⁴³Palus Yesus manyoho ie haguet dengan auh pampingat toh:

⁴⁴ “Awas, ela manyarita akan eweh bewei, tapi lius, talih imam tuntang laku dengae uka ie manukas ikau toto jari keleh. Tagal kakeleh ayum te, keleh ikau manyarah parapahm manumon je irentah awi Moses, kilau bukti akan kare oloh ije ikau toh toto-toto jari keleh.”

⁴⁵Tapi oloh te haguet tuntang jaton tende-tende manyarita taloh je manjadi te hong hete-hete sampai Yesus dia olih gitan tara-tarang tame lewu. Ie baya melai hong luar lewu intu eka je benyem. Tapi oloh harajur ih manalih Ie bara hete-hete.