Read Ngaju MARKUS 10 Bible Online

MARKUS 10 - Ngaju bible

MARKUS 10

¹Limbah te tinai Yesus malihi eka te, tuntang haguet akan tanah Yuda tuntang tanah intu hila silan Sungei Yordan. Oloh are dumah tinai hakarimpong mangaliling Yesus. Tuntang kilau bahut kea, Yesus majar ewen.

²Pire-pire oloh Parisi dumah kea mangat manjabak Yesus. Ewen misek, “Manumon hukum agaman itah, en tau oloh manolang sawae?”

³Yesus tombah, “Moses manenga parentah en akan keton?”

⁴ “Moses manyoho ih oloh manolang sawae, asal manyurat surat hatolang helo,” koan ewen tombah.

⁵“Moses manyurat surat parentah te awi keton lalau kahalin ajare,” koan Yesus dengan ewen.

⁶ “Tapi hong tamparae, hong katika Hatalla manampa olon, insanan koae, ‘Hatalla manjadian ewen hatue tuntang bawi.

⁷ Jete sababe oloh hatue malihi indu-bapae tuntang hinje dengan sawae,[16]

⁸maka kadaduee te manjadi ije.’ Jadi ewen dia hindai due biti, malengkan ije.

⁹Jete sababe, taloh je jari impahinje Hatalla, dia tau imisah awi olon!”

¹⁰Limbah ewen tame huma, kare murid Ayue misek dengan Yesus tahiu hal te.

¹¹ Yesus hamauh dengan ewen, “Eweh je manolang sawae palus kawin dengan oloh bawi beken, oloh te habandong intu taharep sawae je solake te.[17]

¹²Kalote kea oloh bawi je manganan banae palus kawin dengan oloh hatue beken, ie kea habandong.”

¹³Aton kare oloh mimbit anak korik manalih Yesus mangat Ie manggayap tuntang mamberkat ewen. Tapi kare murid Yesus balait dengan kare oloh te.

¹⁴Awi mite hal te, Yesus balait palus Ie hamauh dengan kare murid Ayue, “Nauhe ih kare anak korik te dumah manalih Aku! Ela mangahana ewen, basa kare oloh je kilau toh je manjadi anak ungkup ain Hatalla.

¹⁵ Keleh mingat jetoh! Eweh je dia manaharep Hatalla sama kilau ije biti anak korik, dia tau manjadi anak ungkup ain Hatalla.”

¹⁶Limbah hamauh kalote, Yesus mamalok kare anak korik te, limbah te Ie mina lengen Ayue akan hunjun ewen mije-mije tuntang mamberkat ewen.

¹⁷Metoh Yesus marajur tinai jalanan Ayue, ije biti oloh dumah dari-dari manalih Yesus. Oloh te sontop manyembah intu taharep Yesus tuntang misek, “Guru je bahalap, aku musti mawi en mangat olih manarima pambelom je bujur tuntang katatahie?”

¹⁸“Mbuhen ikau manyewut aku bahalap?” koan Yesus misek. “Dia aton oloh je bahalap, beken bara Hatalla kabuat.

¹⁹ Ikau jari katawan kare parentah Hatalla. ‘Ela mampatei oloh, ela habandong, ela manakau, ela mananjaro, ela mamikir oloh, hormat bapam tuntang indum.’ ”

²⁰“Bapa Guru,” koan oloh te, “uras kare parentah te jari inumongku bara metoh aku tabela.”

²¹Yesus manampayah oloh te hayak masi palus hamauh, “Baya batisa ije hindai je baguna akam. Lius, jual salepah ramom; tenga duit regan ramom te akan kare oloh je belom susah, tuntang ikau kareh mandino ramo hong sorga. Limbah te ikau dumah omba Aku.”

²²Awi mahining Yesus hamauh kalote, oloh te kacewa angate, palus malihi eka te dengan kapehen ateie awi ie paham tatau.

²³Maka Yesus manampayah kare murid Ayue palus hamauh dengan ewen, “Bahali toto oloh tatau manjadi anak ungkup ain Hatalla!”

²⁴Kare murid Ayue hengan mahining auh Yesus te. Tapi Yesus hamauh tinai, “O, anak-Ku, puna bahali mangat tau manjadi anak ungkup ain Hatalla!

²⁵Labih murah ije kongan onta tame rumbak pilus bara ije biti oloh tatau tame Lewu Taheta ain Hatalla.”

²⁶Kare auh Yesus te mawi kare murid Ayue hengan, sampai ewen misek sama arepe, “Amon kalote, eweh je tau inyalamat?”

²⁷Yesus manampayah ewen tuntang tombah, “Akan olon hal te mastahel, tapi dia mastahel akan Hatalla; akan Hatalla kare taloh handiai uras tau manjadi.”

²⁸Palus Petrus hamauh, “Ite toh, ikei jari malihi kare taloh handiai mangat omba Bapa.”

²⁹Koan Yesus, “Percaya bewei: oloh je jari malihi huma-seroke, atawa paharie je hatue atawa bawi, atawa indue, atawa bapae, atawa anak jariae, atawa tana-nyeloe tagal Aku tuntang tagal Barita Bahalap bara Hatalla,

³⁰oloh te kareh manarima labih are hong wayah toh. Ie kareh mandino saratus lipet labih are humae, paharie hatue, pahari bawi, indue, anak jariae, tana nyeloe — tuntang kajake kea. Tuntang kareh hong wayah je akan dumah, oloh te manarima pambelom je bujur tuntang katatahie.

³¹ Tapi are oloh je wayah toh manjadi pangkaheloe kareh manjadi je pangkarahiae tuntang are oloh wayah toh je pangkarahiae kareh manjadi je pangkaheloe.”

³²Yesus tuntang kare murid Ayue metoh hong benteng jalanan Ayue manintu Yerusalem. Yesus mananjong intu hila baun, tuntang kakare murid Ayue uras gogop angate. Tuntang kare oloh je manuntut ewen bara likut mahin mangkeme mikeh. Limbah te Yesus mantehau tinai kare murid Ayue mangabuat tuntang mansanan akan ewen taloh je kareh manjadi buah Ie.

³³“Hining toh,” koae, “Itah metoh toh tesek itah manintu Yerusalem. Hong hete Anak Olon kareh inyarah akan kare imam kapala tuntang kare guru agama. Ie kareh ihukum matei limbah te inyarah akan kare oloh je dia Yehudi.

³⁴Ewen kareh halalea Ie, maluja Ie, mangapehe Ie, tuntang manyampalaki Ie. Tapi hong andau kateloe Ie kareh misik.”

³⁵Palus Yakobus tuntang Yohanes, ewen te anak Sebedeus, dumah manalih Yesus. “Bapa Guru,” koan ewen, “aton ije hal je handak ikei balaku mangat Bapa mawie akan ikei.”

³⁶“En je ingahandak keton mangat aku mawie akan keton?” koan Yesus misek.

³⁷Ewen tombah, “Ikei handak mondok ije hila gantau tuntang ije hila sambil Bapa, amon Bapa kareh mondok hunjun padadusan kahain Aim.”

³⁸ “Keton dia katawan taloh je ilaku keton,” koan Yesus dengan ewen, “En olih keton mihop bara cangkir kajake je kareh iihop-Ku tuntang tame akan huang padang kajake je kareh inameku?”

³⁹“Olih,” koan ewen tombah. Maka Yesus hamauh tinai dengan ewen, “Puna toto keton kareh mihop bara cangkir kajake je kareh iihop-Ku, tuntang tame akan huang padang kajake je kareh iname-Ku.

⁴⁰Tapi tahiu eweh je kareh mondok hila gantau atawa hila sambil-Ku, jete jaton hak ayung-Ku manukase. Hatalla ih je manukase eweh ie je kareh mondok hong kare eka te.”

⁴¹Metoh sapuluh kare murid Yesus awang beken te mahining hal te, ewen balait dengan Yakobus tuntang Yohanes.

⁴² Jadi Yesus mantehau ewen samandiai palus hamauh, “Keton katawan je kare pamimpin bangsa je dia mangasene Hatalla, mahenyek rayate. Tuntang kare oloh hai ain ewen te mahapit ewen.

⁴³ Tapi keton dia tau kalote! Malahan oloh je mipen manjadi oloh hai hong marak keton, ie musti manjadi jipen keton.

⁴⁴Tuntang oloh je mipen manjadi je pangkaheloe bara marak keton, musti manjadi jipen oloh samandiai.

⁴⁵Basa Anak Olon mahin dia dumah uka iayang awi oloh. Ie dumah uka manyang tuntang manyarah hambaruae uka maliwus are oloh.”

⁴⁶Maka ewen sampai hong Yerikho. Tuntang metoh Yesus dengan kare murid Ayue hayak oloh are malihi lewu te, ije biti oloh babute metohe mondok manyadakah hong saran jalan. Arae te Bartimeus, anak Timeus.

⁴⁷Katika ie mahining oloh je mahalau te jete Yesus oloh Nasaret, ie mangkariak, “Yesus, Anak Dawid! Pasi aku!”

⁴⁸Ie ilait awi are oloh tuntang inyoho oloh ie suni. Tapi ie mangkariak labih hai haream, “Anak Dawid, pasi ah aku!”

⁴⁹Maka Yesus tende palus hamauh, “Tehau ie.” Jadi ewen mantehau oloh babute te. Ewen hamauh dengae, “Benyem ih! Ikau intehau Yesus, hingkat!”

⁵⁰Oloh babute te balalu manjakah jubahe, palus kaje-kajeng mendeng tuntang haguet manalih Yesus.

⁵¹“En je ingahandakm mangat Aku mawie akam?” koan Yesus misek ie. Oloh babute te tombah, “Pa Guru, aku mipen mangat tau mite.”

⁵²“Lius ih,” koan Yesus, “awi ikau percaya dengangku, maka ikau keleh.” Hemben te kea oloh te tau mite. Palus ie manuntut Yesus hong jalan.