Read Ngaju MARKUS 12 Bible Online

MARKUS 12 - Ngaju bible

MARKUS 12

¹ Limbah te Yesus nampara hakotak hapan paribasa akan kare imam kapala, kare guru agama tuntang kare pamimpin Yehudi te. Yesus hamauh, “Aton ije biti oloh je mangabon ije kalambar kabon anggor, palus mamagar kalilinge. Limbah te ie mangali petak ekae mahamis bua anggor, palus ie mampendeng ije candi eka oloh manjagae. Limbah te ie mampasewa kabon anggor te akan pire-pire tukang garap palus haguet akan lewu beken.

²Katika jari sampai wayahe mamutik bua anggor, oloh te mangirim ije jipee manalih kare tukang garap kabon anggor te, mangat manarima bagin ayue.

³Tapi kare tukang garap te manawan jipen te. Limbah te ewen mamukul ie, palus manyoho ie buli buang.

⁴Balalu tempon kabon te mangirim tinai ije biti jipee je beken. Tapi kare tukang garap te mamukul kapala jipen te, palus maharak ie hayak papa auhe.

⁵Tempon kabon anggor te mangirim tinai ije biti jipee je beken. Tapi ewen mampatei jipen te. Tuntang kalote raju-rajur ampie ewen mawi kare jipen awang beken kea: aton je imukul tuntang aton kea je impatei.

⁶Toh eweh tinai je tau ingirim awi tempon kabon te? Baya tisa ije biti, iete anake kabuat je inyayange. Jadi kajariae ie mangirim anake te manalih kare tukang garap te. ‘Pasti anakku te ihormat,’ koan tiroke.

⁷Tapi tukang garap te hamauh sama arepe, ‘Toh ie ahli waris ayue. Has itah mampatei ie, mangat itah mandino ramo warisae!’

⁸Maka anak te inawan palus impatei. Hantue inganan ewen akan luar kabon te.”

⁹Palus Yesus misek, “En taloh je handak ilalus awi tempon kabon te? Pasti ie kareh dumah tuntang mampatei kare tukang garap te, palus manyarah kabon te akan kare tukang garap je beken.

¹⁰ Batantu keton jari mambasa ayat toh huang Surat Barasih, ‘Batu je dia ihapan awi kare tukang pangun jari manjadi batu je mambatang.

¹¹Jetoh ie gawin Tuhan; lalehan kahalape!’ ”

¹²Maka kare oloh hai bangsa Yehudi je mahining paribasa te, manggau jalan uka manawan Yesus, basa ewen katawan paribasa te inintu akan ewen. Tapi ewen mikeh dengan oloh are. Jadi, ewen haguet malihi Yesus.

¹³Pire-pire oloh Parisi tuntang pire-pire oloh ain Herodes inyoho manjabak Yesus mahapan kare paisek.

¹⁴Ewen dumah manalih Yesus tuntang hamauh, “Bapa Guru, ikei toh katawan Bapa toh bujur atei tuntang dia paduli tirok eweh bewei. Bapa majar tarus-tarang tahiu kahandak Hatalla akan olon, awi Bapa dia mite ampin oloh. Nah, coba ih Bapa mansanan akan ikei, ‘Manumon atoran agaman itah, en tau mambayar pajak akan kaisar atawa dia? En itah musti mambayar pajak te atawa dia?’ ”

¹⁵Yesus mangatawan ewen te haliau. Ie tombah, “En bukue keton handak manjabak aku? Coba parahan akang-Ku ije kabintap duit perak.”

¹⁶Maka ewen manenga akae ije kabintap duit perak. Palus Yesus misek, “Gambar tuntang aran eweh toh?” “Kaisar,” koan ewen tombah.

¹⁷“Nah, amon kalote,” koan Yesus, “tenga akan Kaisar taloh je ain Kaisar, tuntang akan Hatalla taloh je ain Hatalla.” Ewen hengan mahining auh Ayue.

¹⁸ Pire-pire oloh bara baris Saduki dumah manalih Yesus. (Ewen te baris oloh je manyangka oloh matei dia tau belom haluli.)

¹⁹ “Bapa Guru,” koan ewen dengan Yesus, “Moses manyurat hukum toh akan itah: ‘Amon ije oloh hatue matei, tuntang ie jaton dinon anak, maka paharie musti kawin dengan baloe te mangat ie manuron turonan oloh je jari matei te.’

²⁰Puji aton uju oloh hampahari. Je tambakase kawin, palus matei jaton dinon anak.

²¹Limbah te je kaduee kawin dengan baloe te, tapi ie mahin matei jaton dinon anak. Sama kalote kea manjadi dengan paharie je katelo,

²²tuntang kalote rai-rait sampai akan je kaujue. Kajariae maka oloh bawi te kabuat matei kea.

²³Hong andau oloh matei belom haluli, kabalin eweh oloh bawi te? Basa kauju-ujue te jari kawin dengae!”

²⁴Yesus tombah, “Keton sala toto. Awi keton dia harati auh Surat Barasih atawa kuasan Hatalla.

²⁵Basa hong katika kare oloh matei belom haluli, ewen kareh dia kawin tinai, tapi ewen kareh belom kilau malekat hong sorga.

²⁶ Tuntang tahiu oloh matei je belom haluli, en keton hindai puji mambasa huang surat Moses tahiu rowut duhi je hanyala te? Intu huang kare ayat te inyurat je Hatalla hamauh dengan Moses, ‘Aku toh Hatallan Abaraham, Hatallan Isaak tuntang Hatallan Yakob.’

²⁷Hatalla te dia Hatallan oloh matei. Ie Hatallan oloh belom. Keton sala toto!”

²⁸ Palus dumah ije biti guru agama manyeneh auh pander Yesus dengan kare oloh bara baris Saduki te. Guru agama te mite je Yesus jari buah toto auh Ayue manombah kare auh oloh te. Maka ie misek dengan Yesus, “Parentah je kueh je paling mambatang bara kare-kare parentah?”

²⁹ Yesus tombah, “Parentah je mambatang iete: ‘Hining o, bangsa Israel! Tuhan Hatallan itah, Tuhan te tunggal ije bewei.[19]

³⁰Sinta Tuhan Hatallam hapan salepah ateim, hapan salepah hambaruam, hapan salepah kaharatim tuntang hapan salepah kaabasm.’

³¹ Parentah je kaduee iete: ‘Sinta sama arepm kilau ikau sinta arepm kabuat.’ Jaton tinai parentah beken je labih mambatang bara kadadue parentah te.”

³² Palus guru agama te hamauh dengan Yesus, “Buah toto, Bapa Guru! Puna toto taloh je koan Bapa te: Tuhan bewei Hatalla je tunggal, tuntang jaton hindai Hatalla je beken.

³³ Tuntang oloh musti sinta Hatalla hapan salepah ateie, tuntang hapan salepah kaharatie hayak hapan salepah kaabase. Tuntang ie musti sinta sama arepe kilau arepe kabuat. Jete labih bahalap bara maluput parapah je ingehu tuntang kare parapah beken akan Hatalla.”

³⁴Yesus mite ampin guru agama te je jari tombah dengan bahalap toto. Tuntang Yesus hamauh dengae, “Ikau toh dia pire ih hindai tau manjadi anak ungkup ain Hatalla.” Limbah te jaton ije biti hindai oloh je bahanyi mawi paisek akan Yesus.

³⁵Pandehan majar hong Human Tuhan, Yesus misek, “Kilen ampie kare guru agama tau manyewut je Raja Panyalamat te turonan Dawid?

³⁶ Padahal Dawid kabuat — awi akae inenga pangarinah bara Hatalla — hamauh, ‘Tuhan hamauh dengan Tuhangku: mondok ikau hila gantaungku[20] sampai aku mawi kare musohm mamenda Ikau.’

³⁷Jadi, amon Dawid manyewut Raja Panyalamat te ‘Tuhan’, kilen ampie tau Ie turonan Dawid?” Oloh are je aton huang Human Tuhan te hanjak mahining auh Yesus majar.

³⁸Ie hamauh dengan ewen, “Bua-buah keton taharep kare guru agama. Ewen te rajin tanjo-tanjong mahapan jubah panjang tuntang rajin ihormat intu kare pasar.

³⁹Ewen rajin hong eka je tamam intu huma sombayang tuntang intu kare pesta.

⁴⁰Ewen mamikir kare balo tuntang marampas humae. Tuntang hapae manutup kapapan arep ewen kabuat, ewen balakudoa panja-panjang. Hukuman akan ewen te kareh babehat!”

⁴¹Metoh mondok hatandipah dengan patin parapah intu Human Tuhan, Yesus manantuani kare oloh je manamean duite akan huang pati te. Are oloh tatau manamean are duit;

⁴²palus ije biti bawi balo je belom susah dumah kea. Ie manamean due duit tambaga, iete duit korik je korik kea regae.

⁴³Maka Yesus mantehau kare murid Ayue palus hamauh dengan ewen, “Tampayah hetoh: balo je belom susah toh manamean akan huang pati te labih are bara je inamean awi kakare oloh beken te.

⁴⁴Basa ewen uras manamean bara kalabien ramoe. Tapi balo toh aloh ie belom susah toto, ie manenga kakare taloh je aton huang ie — iete taloh je ihapae belom.”