Read Ngaju MARKUS 13 Bible Online

MARKUS 13 - Ngaju bible

MARKUS 13

¹Katika Yesus malihi Human Tuhan, ije biti bara kare murid Ayue hamauh, “Bapa Guru, coba ite ampin kare pangun Huma te. Tampayah kare batue. Dia laluen kahalape!”

²Yesus tombah, “Ikau mite kare pangun je hai-hai te kan? Jaton ije bara kare batu huang pangun Huma te kareh melai hasuson hong ekae. Uras jete kareh baduroh.”

³Limbah te Yesus haguet akan Bukit Saitun, tuntang mondok[21] intu eka je hataharep dengan Human Tuhan. Palus Petrus, Yakobus, Yohanes tuntang Andreas dumah manalih Ie tuntang hakotak dengan Yesus kabuat.

⁴“Coba Bapa mansanan akan ikei,” koan ewen Dengae, “Hamparea taloh handiai te kareh manjadi? Tuntang en kare tandae je mansanan katikae te jari sampai?”

⁵“Rende-rendeng,” koan Yesus tombah, “ela sampai keton buah tanjaro.

⁶Are oloh kareh dumah mahapan arang-Ku tuntang hamauh, ‘Aku toh Ie!’ palus mananjaro are oloh.

⁷Amon keton mahining kare auh parang tuntang kare baritan oloh kalahi, ela mikeh. Kare taloh te musti manjadi, tapi jete dia tau irima je wayahe jari kiamat.

⁸Bangsa ije kareh parang malawan bangsa je beken. Negara ije kareh manyarang negara je beken. Hong hete-hete kareh aton petak hagerek tuntang lau paham. Taloh handiai te harue tamparae bewei, sama kilau kapehe je ingkeme oloh bawi je handak luas.

⁹ Keton musti bua-buah, basa keton kareh inawan tuntang iimbit akan kare pengadilan. Keton kareh injera huang kare huma sombayang. Keton kareh iimbit manaharep kare oloh je mimbing kuasa tuntang kare raja awi keton murid-Ku. Tuntang jete kesempatan akan keton uka manenga kasaksian tahiu Aku akan ewen.

¹⁰Barita Bahalap bara Hatalla te musti inyiar helo akan kare bangsa.

¹¹Tuntang amon keton inawan tuntang iimbit akan pengadilan, ela mikeh tahiu taloh je musti ingotak keton. Amon katikae jari sampai akan hakotak, sewut ih taloh je insanan akan keton hong katika te. Basa kare auh je inyewut keton te dia auh keton kabuat, malengkan dumah bara Roh Hatalla.

¹²Oloh kareh mandarhaka mawi paharie kabuat sampai impatei. Jete kea je akan manjadi buah bapae dengan anake. Kare anak kareh malawan indu-bapae, tuntang manyarah ewen mangat impatei.

¹³ Keton kareh inyingi awi oloh handiai awi keton murid-Ku. Tapi oloh je tahan sampai kalepahe, kareh akan inyalamat.”

¹⁴ “Keton kareh manampayah ‘Kapapa je mampahancor’ mendeng hong eka je pali akae. (Pampingat akan pambasa: Nirok ih en rimae te!) Hong katika te oloh je aton hong Yuda musti hadari akan bukit.

¹⁵ Oloh je aton hong hunjun sapau huma ela mohon tuntang tame akan huang huma awi handak manduan taloh en-en.

¹⁶Oloh je aton hong tana ela mado manduan jubahe.

¹⁷Kare andau te dia laluen kapapae akan oloh bawi je batihi tuntang akan ibu je magon mampatuso anake!

¹⁸Balakudoa ih mangat kare taloh te ela manjadi hong wayah ujan.

¹⁹ Hong kare andau je papa te kareh lembut kasusah je hindai puji manjadi bara metoh Hatalla manjadian kalunen sampai wayah toh, tuntang dia tinai manjadi rahian kareh.

²⁰Paribasae Hatalla dia mamandak wayah te, maka jaton ije biti je tau salamat. Tapi tagal ungkup Ayue, Hatalla mamandak katika te.

²¹Hong katika te amon aton oloh je hamauh dengan keton, ‘Ite, Raja Panyalamat te aton intu hetoh!’ atawa ‘Ite, Ie aton intu hete!’ ela ih percaya auh oloh te.

²²Basa kare panyalamat pananjaro tuntang kare nabi pananjaro kareh dumah. Ewen kareh malalus kare gawi je malabien bara bahut tuntang kare taloh heran hapae mananjaro amon olih, anak ungkup ain Hatalla kea.

²³Jadi, rende-rendeng ih! Uras kare taloh te jari insanang-Ku akan keton helo bara taloh te manjadi.”

²⁴ “Limbah kare wayah kasusah te, matanandau manjadi kaput, tuntang bulan nihau kalawae.

²⁵ Kare bintang kareh manjato bara langit, tuntang kare kuasa hong salepah langit tuntang petak manjadi hakangkalut.

²⁶ Hong katika te Anak Olon gitan dumah intu baunandau dengan kapaham kuasan Aie tuntang kahain Aie.

²⁷Ie kareh manyoho kare malekat Ayue uka mamumpong ungkup je iintih Awie bara kaepat puting kalunen, bara kare saran kalunen sampai akan kare saran langit.”

²⁸“Keleh manduan auh ajar bara batang ara. Amon kare patinge jari bahijau tuntang balemo, tuntang nampara manyuloh, keton katawan jete wayah pandang jari tokep.

²⁹Kalote kea amon keton mite kare taloh te manjadi, keton katawan wayah te jari tokep toto.[22]

³⁰Keleh keton katawan! Kare-kare taloh toh kareh manjadi helo bara kare oloh je belom wayah toh uras matei.

³¹Langit tuntang petak kareh nihau, tapi auh-Ku tetep sampai katatahie.”

³² “Aloh kalote, ije biti mahin jaton oloh katawan hamparea andaue atawa jame. Kare malekat hong sorga kea dia, tuntang Anak mahin dia, baya Bapa bewei je katawan.

³³Jadi keton musti bajaga tuntang barendeng, basa keton dia katawan hamparea katikae.

³⁴ Jete ampie tau inanding sama kilau ije biti oloh je malihi humae palus haguet akan eka je kejau. Ie manyoho kare jipee mahaga humae, tuntang manenga gawi akan ewen mije-mije. Akan tukang jaga baun tonggang, ie mameteh uka bajaga bua-buah.

³⁵Tagal te keton musti jaga-jaga, basa keton jaton katawan hamparea Tempon huma te dumah haluli — tau metoh halemei, tau bentok alem, tau hong tampalawei, atawa tau kea metoh matan andau lembut.

³⁶Amon ie dumah salenga, ela ih sampai ie sondau keton metoh batiroh.

³⁷Taloh je insanang-Ku akan keton toh, kareh handak insanang-Ku kea akan oloh handiai: keleh jaga-jaga!”