Read Ngaju MARKUS 14 Bible Online

MARKUS 14 - Ngaju bible

MARKUS 14

¹ Due andau hindai jete Andau Paska tuntang pesta Rote Je Dia Iragi. Kare imam kapala tuntang kare guru agama kanjerae manggau jalan mangat manawan Yesus suni-suni, tuntang mangat mampatei Ie.

²“Tapi ela itah mawie hong pesta,” koan ewen, “basa kareh lembut karidu.”

³ Katika Yesus aton hong Betania, hong human Simon je bihin puji buah panyakit kulit je bakaike-ikeh, ije biti oloh bawi dumah manalih Ie. Ie mimbit ije kasa pualam basuang minyak harum je barega, inampa bara uhat taloh je harum. Katika Yesus metoh mondok kuman, oloh bawi te mamusit kasa te tuntang manata minyak harum te akan hunjun takolok Yesus.

⁴Pire-pire oloh je aton intu hete balalu balait tuntang hamauh sama arepe, “En gunae minyak harum te ihaka-kanan?

⁵Minyak te tau injual hapan rega labih bara telo ratus duit perak,[23] tuntang duite tau inenga akan oloh je belom susah!” Maka ewen balait dengan oloh bawi te.

⁶Tapi Yesus hamauh, “Nduem ih ie! Mbuhen keton manyusah ie? Ie malalus taloh je bahalap tuntang inara akang-Ku.

⁷ Oloh je belom susah harajur aton intu marak keton. Genep katika asal keton handak, keton tau mandohop ewen. Tapi Aku dia harajur hinje keton.

⁸Oloh bawi toh jari malalus taloh je tau ie mawie. Ie jari manatap Aku hapan minyak harum akan kubur-Ku helo bara katikae.

⁹Percaya ih! Hong hapus kalunen, hong kueh bewei Barita Bahalap ain Hatalla imbarita, maka gawin oloh bawi toh kareh inyarita kea kilau pangingat dengae.”

¹⁰Balalu Yudas Iskariot, ije bara duewalas biti kare murid Yesus, haguet manalih kare imam kapala awie mado mandarhaka handak manyarah Yesus akan ewen.

¹¹Ewen hanjak toto mahining auh tawaran te tuntang hajanji uka manenga duit akan Yudas. Maka Yudas manampara manggau katika je buah mangat mandarhaka mawi Yesus.

¹²Intu andau je solake hong Andau Pesta Rote Je Dia Iragi — hong katika oloh manyambalih tabirin Paska — kare murid Yesus misek dengae, “Intu kueh Bapa handak ikei manatap panginan Paska akan Bapa?”

¹³Maka Yesus manyoho due biti bara ewen, koae, “Lius akan lewu, intu hete ije biti oloh hatue aton mimbit ije kandi basuang danum, kareh hasondau dengan keton. Nuntut ih ie

¹⁴akan huma je inamee tuntang sanan akan Tempon huma te, ‘Bapa Guru misek, hong kueh ekae Ie tuntang kare murid Ayue tau kuman panginan Paska.’

¹⁵Oloh te kareh maninjok akan keton ije kamar je hai. Kamar te jari iator, sukup dengan kare pakakas huange. Natap taloh handiai hete akan itah.”

¹⁶Balalu due biti murid Yesus te haguet akan lewu. Hong hete ewen sondau uras hakabuah tumon taloh je insanan awi Yesus. Maka ewen balalu manatap panginan Paska.

¹⁷Hamalem te tinai, Yesus dumah dengan duewalas murid Ayue.

¹⁸ Tuntang metoh ewen mondok kuman, Yesus hamauh, “Hining toh: ije biti bara marak keton, je metoh toh kuman hayak dengang-Ku kareh mandarhaka mawi Aku.”

¹⁹Mahining auh te, kare murid Yesus manjadi kapehe ateie paham. Palus mije-mije ewen misek Yesus, “Batantu beken aku je koan Bapa te?”

²⁰Yesus tombah, “Ie te ije biti bara duewalas keton toh, je kuman hinje piringe dengang-Ku.

²¹Punae Anak Olon kareh matei kilau je tarasurat huang Surat Barasih. Tapi calaka toto oloh je mandarhaka mawi Anak Olon te! Labih bahalap akan oloh te jaka ie dia puji inakan samasinde!”

²²Katika ewen metoh kuman, Yesus manduan rote tuntang manarimakasih intu Hatalla. Limbah te Ie mangiwak rote te hapan lengen Aie, palus manengae akan kare murid Ayue sambil hamauh, “Duan tuntang kinan, jetoh biting-Ku.”

²³Limbah te Ie manduan ije cangkir anggor. Ie balakudoa manarimakasih akan Hatalla, palus manenga cangkir te akan kare murid Ayue. Limbah te ewen uras mihop anggor te.

²⁴ Limbah te Yesus hamauh, “Jetoh dahang-Ku je mandehen janjin Hatalla, daha je inusoh akan oloh are.

²⁵Percaya ih: Aku dia tinai mihop anggor toh, sampai katika Aku mihop anggor je taheta haya-hayak dengan keton hong Lewu Taheta ain Bapa-Ku.”

²⁶Limbah te ewen manyanyi ije nyanyi tara. Tuntang limbah te ewen haguet akan Bukit Saitun.

²⁷ Limbah te Yesus hamauh dengan ewen, “Keton samandiai kareh hadari malihi Aku. Basa huang Surat Barasih tarasurat, ‘Hatalla kareh mampatei sakatike, tuntang kawan tabirie kareh bilang-bilanga.’

²⁸ Tapi limbah Aku impisik haluli, Aku kareh haguet helo akan Galilea.”

²⁹“Dia,” koan Petrus, “aloh ewen uras malihi Bapa, aku toh samasinde dia.”

³⁰“Ingat,” koan Yesus, “alem toh kea, helo bara manok manando handue, ikau hantelo milim aku.”

³¹Petrus tombah hayak karugas auhe, “Aloh aku musti matei haya-hayak dengan Bapa, samasinde dia baka aku hamauh aku dia kasene Bapa!” Tuntang kare murid awang beken mahin hamauh kalote kea.

³²Ewen sampai hong ije eka je bagare Getsemane, tuntang Yesus hamauh dengan kare murid Ayue, “Mondok ih intu hetoh pandehan aku haguet balakudoa.”

³³Palus Yesus mimbit Petrus, Yakobus tuntang Yohanes haguet haya-hayak Dengae. Ie manampara mangkeme kapehen atei Aie tuntang kagogop Ayue.

³⁴“Atei-Ku paham kapehe,” koan Yesus dengan ewen, “angat-Ku bilak handak matei. Keleh keton melai hetoh tuntang bajaga!”

³⁵Yesus haguet akan kakejau isut palus mahingkep akan petak tuntang balakudoa. Huang lakudoae te Ie balaku amon tau Ie dia usah mangkeme andau kapehe te.

³⁶“Bapa, o Bapa,” koae, “jaton ije taloh je mastahel akan Bapa. Indah ih kapehe toh bara Aku. Baya ela ih manumon kahandak-Ku, malengkan tumon kahandak Bapa.”

³⁷Limbah te Yesus haluli tuntang gitan Awie kare murid Ayue metoh batiroh. Ie hamauh dengan Petrus, “Simon, en ikau batiroh? Baya ije jam ih, dia olih ikau bajaga?”

³⁸Balalu Yesus hamauh dengan ewen, “Keleh bajaga tuntang balakudoa mangat dia buah tingkes. Puna roh keton pahias malalus taloh je bujur, tapi keton dia olih mawie awi sipat kalonen te balemo.”

³⁹Sinde tinai Yesus haguet balakudoa mahapan auh je sama.

⁴⁰Ie haluli tinai manalih kare murid Ayue tuntang sondau ewen magon batiroh, awi ewen paham mangantok. Maka ewen jaton katawan en je musti insanan ewen akan Yesus.

⁴¹Katika hong tingkat je kateloe Yesus haluli manalih ewen, Ie hamauh, “En keton magon batiroh malayan kaheka? Sukup ih! Jari sampai katikae Anak Olon inyarah akan lengen kare oloh badosa.

⁴²Has misik, itah haguet. Ite! Oloh je mandarhaka mawi Aku jari dumah!”

⁴³Metoh Yesus magon hakotak, Yudas, iete ije biti bara duewalas murid Ayue te, dumah. Haya-hayak dengae te kea are oloh je mimbit padang tuntang gagada. Ewen te inyoho awi kare imam kapala, kare guru agama tuntang kare pamimpin Yehudi.

⁴⁴Je darhaka te jari manampa ije tanda akan ewen. “Oloh je inyiumku,” koae dengan ewen, “jete Ie oloe. Tawan Ie tuntang imbit Ie hayak injaga toto-toto.”

⁴⁵Katika Yudas dumah, ie balalu manalih Yesus tuntang hamauh, “Bapa Guru!” limbah te ie manyium Yesus.

⁴⁶Palus oloh je dumah haya-hayak dengan Yudas te manawan Yesus tuntang mamasong Ie.

⁴⁷Tapi ije biti bara oloh je aton hete manyilak padange tuntang mawi jipen imam hai sampai bakempang pindinge.

⁴⁸Palus Yesus hamauh dengan ewen, “En Aku toh oloh papa, sampai keton dumah mahapan padang tuntang gagada mangat manawan aku?

⁴⁹ Genep andau aku majar hong Human Tuhan intu taharep keton, tuntang keton dia manawan Aku. Tapi puna musti jari kalote, uka manjadi taloh je jari tarasurat huang Surat Barasih.”

⁵⁰Kare murid Ayue hadari malihi Yesus.

⁵¹Ije biti oloh tabela, je baya mahapan ije kalambar benang hapan manutup bitie, manuntut Yesus. Kare oloh handak manawan ie,

⁵²tapi ie mengkak benang te, palus hadari marak halowai.

⁵³Yesus iimbit akan human imam hai. Hong hete uras kare imam kapala, pamimpin Yehudi, tuntang guru agama hapumpong.

⁵⁴Petrus manuntut Yesus bara kejau sampai tame akan huang baun human imam hai. Intu hete ie mondok mangalasot bitie tokep apui haya-hayak dengan kare pengawal.

⁵⁵Kare imam kapala tuntang hapus Pengadilan Agama manggau jalan uka mandino bukti hapan manyalan Yesus mangat olih mampanjato hukuman matei buah Ie. Tapi ije mahin jaton bukti je olih ewen dinoe.

⁵⁶Are saksi intehau uka manenga kasaksian tanjaro mawi Yesus, tapi kasaksian ewen te uras hakalawan auhe kasaksian ije bara kasaksian je beken.

⁵⁷Palus pire-pire saksi mendeng tuntang manyampai saksi tanjaro mawi Yesus je kalotoh auhe,

⁵⁸ “Ikei mahining oloh toh hamauh, ‘Aku kareh manduroh Human Tuhan je inampa awi olon toh, tuntang limbah telo andau, aku kareh mamangun tinai je beken je dia ie tampan olon.’ ”

⁵⁹Tapi kare kasaksian oloh te sama hakalawan auhe bara ije dengan je beken.

⁶⁰Maka imam hai mendeng intu taharep ewen samandiai tuntang misek dengan Yesus, “En Ikau dia tombah kare dawan oloh je mawi Ikau te?”

⁶¹Tapi Yesus suni ih. Ie dia tombah samasinde. Palus imam hai te misek sinde tinai Dengae, “En ikau Raja Panyalamat, Anak Hatalla je Barasih?”

⁶² “Aku toh ie,” koan Yesus tombah, “tuntang keton samandiai kareh mite Anak Olon mondok hila gantaun[24] Hatalla je Pangkahai Kuasae tuntang dumah bara langit huang baunandau!”

⁶³Maka imam hai marabit-marantat pakaiae[25] tuntang hamauh, “Dia usah saksi hindai!

⁶⁴ Keton jari mahining kabuat kare auh Ayue je mamapa Hatalla. Toh, en auh tukas keton?” Ewen samandiai manukas je Yesus te basala, tuntang patut ihukum matei.

⁶⁵Palus pire-pire oloh manampara maluja Yesus, tuntang ewen manutup matan Aie tuntang mamukul Ie, palus hamauh, “Coba nujum akan ikei eweh je mamukul Ikau?” Kare pengawal te kea omba manampar Yesus.

⁶⁶Metoh Petrus magon aton hong sarambi huma te, ije biti jipen bawi ain imam hai dumah akan hete.

⁶⁷Metoh ie mite Petrus mangalasot arepe tokep apui, ie manantuani baun Petrus tuntang hamauh, “Dia ikau toh kea je dengan Yesus oloh Nasaret te?”

⁶⁸Tapi Petrus milim. “Aku dia katawan tuntang dia harati auhm,” koae dengan jipen te. Palus Petrus haguet akan bauntonggang pagar human imam hai te. [Metoh te manok manando.]

⁶⁹Jipen bawi te mite Petrus tinai tuntang hamauh tinai dengan kare oloh hete. “Ie puna ije bara kare ewen te!”

⁷⁰Tapi Petrus milim tinai. Dia tahi limbah te kare oloh intu hete hamauh tinai dengan Petrus, “Pasti ikau toh ije bara kare ewen te, awi ikau bara Galilea!”

⁷¹Balalu Petrus nampara sapa-sapa, “Aku dia kasene oloh je koan keton te!”

⁷²Metoh te kea manok manando kadue tingkate. Tuntang Petrus taraingat je Yesus jari hamauh dengae, “Helo bara manok manando kadue tingkate, hantelo ikau jari milim Aku.” Balalu Petrus manangis side-siden.