Read Ngaju MARKUS 15 Bible Online

MARKUS 15 - Ngaju bible

MARKUS 15

¹Hayak jajewu haliai, hapus Pengadilan Agama tuntang kare imam kapala, kare pamimpin Yehudi tuntang kare guru agama barunding bajeleng. Ewen mamasong Yesus, limbah te mimbit Ie tuntang manyarah Ie akan Pilatus.

²Pilatus misek dengan Yesus, “En toto ikau Rajan Oloh Yehudi?” “Kalote koam,” koan Yesus.

³Kare imam kapala manyampai are auh dawa mawi Yesus.

⁴Palus Pilatus misek tinai dengan Yesus, “En Ikau dia maku tombah? Coba ite kilen karee auh dawa je inyampai ewen mawi Ikau!”

⁵Tapi Yesus samasinde jaton tombah hindai, sampai Pilatus hengan.

⁶Sasining Pesta Paska, bahut Pilatus malapas ije biti oloh tahanan manumon paintih oloh are.

⁷Huang penjara, bara kare oloh je mambarontak je puji mampatei oloh hong wayah karidu-kalahi, aton ije oloh je bagare Barabas.

⁸Oloh are hapumpong tuntang balaku dengan Pilatus uka ie malapas ije biti tahanan kilau bahut.

⁹Pilatus misek dengan ewen, “En handak keton aku malapas rajan oloh Yehudi te akan keton?”

¹⁰Basa Pilatus katawan toto je kare imam kapala manyarah Yesus akae awi kahirin atei ewen.

¹¹Tapi kare imam kapala manantiring oloh are uka balaku Pilatus malapas Barabas akan ewen.

¹²Maka Pilatus hamauh tinai dengan oloh are te, “Amon kalote, en je musti iawiku dengan oloh je inyewut keton Rajan Oloh Yehudi te?”

¹³Ewen mangkariak, “Nyampalaki Ie!”

¹⁴“Tapi en kapapa je iawie?” koan Pilatus misek. Balalu ewen mangkariak sasar hai haream, “Nyampalaki Ie!”

¹⁵Pilatus nahuang manyanang atei oloh are te, maka ie malapas Barabas akan ewen. Limbah te ie manyoho oloh mahewes Yesus hapan cambuk, palus manyarah Ie uka inyampalaki.

¹⁶Yesus iimbit awi kare prajurit akan balai pengadilan hong istana gubernur. Limbah te salepah pasukan intehau hapumpong.

¹⁷Palus ewen mangkepan jubah kawo-kawo intu Yesus, tuntang manampa makota bara kare pating haduhi, limbah te mangkepae intu takolok Yesus.

¹⁸Limbah te ewen manyembah Ie. “Salamat Rajan oloh Yehudi!” koan ewen.

¹⁹Ewen mamukul takolok Yesus hapan sukah, palus ewen maluja Ie tuntang sontop manyembah intu taharep Ie.

²⁰Limbah ewen halalea Yesus, ewen mengkak jubah kawo-kawo te palus mangkepan tinai pakaian Ayue kabuat. Limbah te Ie iimbit akan luar uka inyampalaki.

²¹ Hong benteng jalan ewen hajajuan ije biti oloh meton sampalakin Yesus. Oloh te tabarong harue bara dokohe handak tame akan lewu. (Aran oloh te Simon, asale bara Kirene — bapa Aleksander ewen due Rupus.)

²²Yesus iimbit akan ije eka je bagare Golgota, rimae “Eka Bangon Takolok”.

²³Hong hete ewen handak manenga Akae anggor je iewoi dengan mur, tapi Yesus dia maku mihop anggor te.

²⁴ Limbah te ewen manyampalaki Ie, tuntang ewen habagi pakaian Ayue mahapan tenong uka manukas bagin genep biti.

²⁵Yesus inyampalaki hong pukul jalatien hanjewu.

²⁶Intu hunjun sampalaki te ingkepan auh surat tumon auh dawan oloh mawi Ie, iete: “Rajan Oloh Yehudi”.

²⁷Haya-hayak dengan Yesus te ewen manyampalaki kea due biti bandit; ije biti hila gantaue tuntang ije biti tinai hila sambile. [

²⁸ Kalote maka manjadi taloh je inyurat huang Surat Barasih, iete: “Ie iitong tame baris kare oloh papa.”]

²⁹ Kare oloh je mahalau hete manggiling takoloke[26] tuntang mahina Yesus. Ewen hamauh, “O, ikau je handak manduroh Human Hatalla tuntang mamangue huang telo andau.

³⁰Coba mohon bara sampalaki te tuntang nyalamat Arepm!”

³¹Kalote kea kare imam kapala tuntang kare guru agama halalea Yesus. Ewen hamauh sama arepe, “Ie manyalamat oloh beken, tapi dia olih manyalamat Arepe kabuat!

³²Amon Ie raja Israel, Raja Panyalamat, keleh Ie toh mohon bara sampalaki te, uka ikei manyaksie tuntang percaya Dengae!” Kare oloh je inyampalaki haya-hayak dengan Yesus te mahin mahina Yesus.

³³Hong bentok andau, katahin telo jam, hapus daerah te manjadi kaput.

³⁴ Tuntang pukul telo halemei, Yesus mangkariak hayak hai auh Ayue, “Eloi, Eloi, lama sabakhtani?” jete rimae, “O, Hatallang-Ku, O, Hatallang-Ku, mbuhen Ikau malihi Aku?”

³⁵Pire-pire oloh intu hete mahining kariak te, tuntang hamauh, “Hining Ie mantehau Elia!”

³⁶ Ije biti bara ewen te kaje-kajeng manduan karang, palus manculop huang anggor masem. Limbah te kambang karang te inyucoke intu tapakan ije dereh kayu, palus manjujue manintu biwih Yesus sambil hamauh, “Entai, keleh itah mitee en Elia dumah mampamohon Ie bara sampalaki te.”

³⁷Palus Yesus mangkariak, tuntang mahutos.

³⁸ Tirai benang je iniring intu huang Human Tuhan barabit sila due bara hunjun akan penda.

³⁹Perwira je mendeng hila baun sampalaki te, mite kilen ampie Yesus mahutos.[27] Perwira te hamauh, “Puna toto oloh toh Anak Hatalla!”

⁴⁰ Intu hete aton kea pire-pire oloh bawi je manampayah taloh samandiai te bara kejau. Bara kare ewen te aton Salome, Maria Magdalena, tuntang Maria indu Yakobus je tabela tuntang Yoses.

⁴¹Maka ewen te iete kare oloh bawi je manuntut tuntang mandohop Yesus katika Ie aton hong Galilea. Tuntang aton are tinai oloh bawi beken intu hete je jari dumah akan Yerusalem haya-hayak dengan Yesus.

⁴²Andau jari nampara hamalem katika Yosep bara Arimatea dumah. Ie te anggota Pengadilan Agama je ihormat oloh. Ie kea omba mentai katika ain Hatalla nampara marentah kilau Raja. Andau te andau oloh manatap arepe (jete andau helo bara andau Sabat). Tagal te Yosep mampahanyi arepe manalih Pilatus tuntang balaku hantun Yesus.

⁴³

⁴⁴Pilatus hengan awi mahining Yesus jari mahutos. Jadi ie manyoho oloh mantehau kapala pasukan tuntang misek dengae en Yesus jari tahi mahutos.

⁴⁵Limbah mahining taloh je insanan awi perwira te, Pilatus manyoho Yosep manduan hantun Yesus.

⁴⁶Palus Yosep mamili benang baputi bara linen tuntang limbah mampamohon hantun Yesus, ie mambungkuse hapan benang te. Limbah te ie mampeter hantu te intu huang kubur je inampa intu huang bukit batu. Limbah te ie manggaling batu hai manutup bauntonggang kubur te.

⁴⁷Pandehan te Maria Magdalena tuntang Maria indu Yoses manantuani hong kueh eka Yesus impeter.