Read Ngaju MARKUS 16 Bible Online

MARKUS 16 - Ngaju bible

MARKUS 16

¹Katika andau Sabat jari mahalau, Maria Magdalena, Maria indu Yakobus tuntang Salome haguet mamili ramon kasai je harum hapan mangasai hantun Yesus.

²Hayak hanjewu toto metoh matanandau lembut, andau je solake huang minggo te, ewen haguet akan kubur.

³Hong benteng jalan, ewen hakotak sama arepe, “Eweh je olih mandohop itah manindar batu tutup bauntonggang kubur te?” Basa batu te hai toto. Tapi sana ewen sampai hete ewen mite batu te jari tagaling.

⁵Palus ewen tame akan huang kubur te. Intu huang je hila gantau, ewen mite ije biti oloh tabela mahapan jubah baputi metohe mondok, tuntang ewen tarewen.

⁶Oloh tabela te hamauh, “Ela mikeh! Aku katawan keton manggau Yesus oloh Nasaret je jari inyampalaki te. Ie jaton hetoh. Ie jari misik! Ite, toh eka ewen mampeter Ie.

⁷ Lius keton, nyampai kabar toh akan kare murid Ayue, tatame kea Petrus. Sanan, ‘Ie haguet helo akan Galilea. Intu hete keton kareh mite Ie, kilau je jari insanan Awie akan keton.’ ”

⁸Maka ewen balua bara kubur te palus hadari awie tarewen hayak mikeh. Ewen jaton mansanan akan ewe-eweh bewei awie mikeh. [

⁹Limbah Yesus misik bara pampatei, hong andau Minggo hayak hanjewu, sola-solake Ie mamparahan Arepe akan Maria Magdalena. (Bara Maria te Yesus puji maharak uju setan.)

¹⁰Maka Maria Magdalena haguet mansanan taloh je manjadi te akan kare sobat Yesus je metohe kapehe ateie tuntang manangis.

¹¹Tapi katika ewen mahining je Yesus te belom, tuntang je Maria kea jari mite Ie, ewen dia percaya.

¹²Limbah te Yesus mamparahan arepe akan due biti murid Ayue mahapan cara beken. Hal te manjadi katika ewen due mananjong akan ije lewu.

¹³Jadi ewen haluli tuntang mansanan hal te akan ewen awang beken. Tapi ewen dia percaya.

¹⁴Kajariae, Yesus mamparahan Arepe akan sawalas murid Ayue, katika ewen metoh kuman. Ie maningak ewen basa ewen kurang kapercayae tuntang lalau batekang ateie sampai dia percaya dengan kare oloh je jari mite kabuat Yesus te belom.

¹⁵ Palus Yesus hamauh dengan ewen, “Lius keton akan hapus kalunen tuntang ngabar Barita Bahalap ain Hatalla te akan salepah oloh kalunen.

¹⁶Oloh je dia percaya kareh buah hukum. Tapi oloh je percaya tuntang impandoi, kareh inyalamat.

¹⁷Kilau tanda tagal kapercayan ewen, maka ewen te kareh maharak setan huang arang-Ku; ewen kareh hakotak hapan kare basa je dia ewen kasenee.

¹⁸Amon ewen mimbing handipe atawa mihop pulih, ewen dia baka buah calaka. Amon ewen mingkes lengee intu hunjun oloh haban, kare oloh te kareh manjadi keleh.”

¹⁹ Limbah Tuhan Yesus hakotak dengan ewen, ie inggatang akan sorga. Intu hete Ie marentah hinje dengan Hatalla.

²⁰Maka kare murid Ayue haguet tuntang manyiar barita bara Hatalla akan hete-hete. Tuntang Tuhan mahin omba bagawi haya-hayak dengan ewen tuntang manenga bukti mahalau kare tanda heran je baritan ewen te puna toto.] [ KAHAPUS SURAT MANUMON NASKAH HELO IJE BEKEN [28] Kare oloh bawi te haguet manalih Petrus tuntang kare kawale, palus manyarita hapan auh pandak kare taloh je jari insanan akan ewen awi oloh tabela te. Limbah te, Yesus kabuat mahalau kare murid Ayue mambarita bara timor barat taloh je barasih tuntang katatahie tahiu salamat je melai katatahie.]