Read Ngaju MARKUS 2 Bible Online

MARKUS 2 - Ngaju bible

MARKUS 2

¹Pire-pire andau limbah te Yesus haluli akan Kapernaum. Maka puna tayap ih auh barita tahiu Ie metohe intu huma.

²Palus are oloh dumah. Ewen hakarimpong intu hete sampai jaton eka hindai. Hong bauntonggang mahin kontep hasengkel awi oloh. Palus Yesus mansanan barita bara Hatalla akan ewen.

³Metoh Ie hakotak, te epat biti oloh mimbit ije biti oloh lumpuh manalih Yesus.

⁴Tapi ganan oloh lalau karee, ewen dia olih manalih manokep Ie. Maka ewen mungkar sapau huma pas tandipah eka Yesus te aton. Limbah te ewen moloh oloh je lumpuh te haya-hayak dengan amak ekae menter.

⁵Katika Yesus mite dia laluen kahain kapercayan ewen, Ie hamauh dengan oloh lumpuh te, “O Anak-Ku, kare dosam jari iampun.”

⁶Pire-pire guru agama je aton mondok intu hete misek huang ateie,

⁷“Bahanyi toto oloh toh hamauh kalote! Ie mahina Hatalla. Eweh je olih mampun dosa beken bara Hatalla?”

⁸Hemben te kea Yesus katawan tirok ewen. Palus Ie hamauh, “Mbuhen keton misek kalote huang atei keton?

⁹Ije kueh je labih murah: manyewut, ‘Dosam jari iampun’, atawa manyewut ‘Mendeng, gatang amakm tuntang lius mananjong’?

¹⁰Tapi toh aku handak mambukti akan keton je hunjun petak toh Anak Olon bara kuasa mampun dosa.” Palus Yesus hamauh dengan oloh je lumpuh te,

¹¹“Mendeng, gatang amakm tuntang buli humam!”

¹²Ie mendeng tuntang bajeleng manduan amake palus balua, inyaksi awi ewen samandiai. Kare oloh te jungun palus manara Hatalla. Koan ewen, “Hindai puji itah mite taloh je manjadi kilau toh!”

¹³Yesus haluli tinai akan saran Danau Galilea. Are oloh dumah manalih Ie, tuntang Ie majar ewen.

¹⁴Metoh Yesus mananjong hete, Ie mite ije biti oloh panagih pajak bagare Lewi, anak Alpeus, mondok hong kantor pajak. “Omba aku ih,” koan Yesus dengae. Maka Lewi mendeng tuntang omba Yesus.

¹⁵Katika Yesus metohe kuman hong human Lewi,[6] maka are panagih pajak dumah tuntang kare oloh je dia bahalap huang tampayah oloh lewu, omba kuman haya-hayak dengan Yesus tuntang kare murid Ayue. Basa are bara kare ewen te je manuntut Yesus.

¹⁶Pire-pire guru agama bara baris oloh Parisi mite Yesus kuman haya-hayak dengan kare panagih pajak tuntang kare oloh beken te kea je inyewut oloh dia bahalap. Jadi ewen misek dengan kare murid Yesus, “Mbuhen gurun keton kuman haya-hayak dengan kare panagih pajak tuntang dengan kare oloh je dia bahalap te?”

¹⁷Yesus mahining paisek ewen te, palus Ie tombah, “Oloh je barigas dia usah manggau dokter; baya oloh je haban ih. Aku toh dumah dia tantai manggau oloh je manyewut arepe jari bahalap, malengkan oloh je inyewut papa.”

¹⁸Hong sinde katika kare murid Yohanes Pampandoi tuntang kare oloh Parisi metohe puasa. Palus aton oloh dumah manalih Yesus tuntang misek, “Mbuhen murid Yohanes Pampandoi tuntang murid oloh Parisi puasa, tapi murid Bapa dia?”

¹⁹Yesus tombah, “Hong pesta kawin, en kare oloh je dumah panggil te dia kuman? Amon panganten hatue te magon aton hinje dengan ewen, batantu ewen kuman.

²⁰Tapi kareh dumah katikae panganten hatue te induan bara ewen. Hong katika te harue ewen dia kuman.

²¹Jaton puji oloh manumpang baju je kupit mahapan tantanan benang taheta. Basa benang je hapa manumpange te kareh kanjorot palus baju te barabit, sampai kajariae mawi rabite labih hai.

²²Kalote kea jaton oloh je manyuang anggor akan huang kambut upak meto je kupit. Basa anggor taheta te kareh mamusit kambut te. Kajariae kadaduee te nihau rusak. Anggor je taheta musti inyuang akan huang kambut je taheta kea!”

²³ Sinde hong andau Sabat, katika Yesus mahalau ije tana gandum, kare murid Ayue manampara mamutik gandum.

²⁴Palus kare oloh Parisi hamauh dengan Yesus, “Mbuhen kare murid Ayum malanggar hukum agaman itah, ewen malalus taloh je ingahana hong andau Sabat?”

²⁵ Yesus tombah, “En keton hindai puji mambasa taloh je iawi Dawid, katika Abyatar manjadi imam hai. Metoh Dawid tuntang kare oloh ayue balau, tuntang ewen jaton taloh kinae, ewen tame huang Human Tuhan, tuntang kuman rote je jari inenga kilau parapah akan Hatalla. Tuntang rote te inengae kea akan kare oloh ayue. Padahal manumon atoran agaman itah, baya kare imam ih je tau kuman rote te.”

²⁷Yesus palus hamauh tinai, “Andau Sabat inampa akan olon; dia ie olon je inampa akan andau Sabat.

²⁸Jadi Anak Olon barakuasa hunjun andau Sabat.”