Read Ngaju MARKUS 3 Bible Online

MARKUS 3 - Ngaju bible

MARKUS 3

¹Yesus haluli tinai akan huma sombayang. Intu hete aton ije biti oloh je lumpuh lengee silae.

²Intu hete kea aton kare oloh je handak manggau kasalan Yesus, mangat tau hapa mangado Ie. Jadi ewen tantai manantuani Ie en Ie handak mampakeleh oloh hong andau Sabat.

³Yesus hamauh dengan oloh je lumpuh lengee silae te, “Kantoh mendeng hetoh, intu baun.”

⁴Palus Ie misek dengan kare oloh je aton hete, “Manumon hadat agama, itah tau mawi en hong andau Sabat? Mawi taloh bahalap atawa mawi taloh papa? Manyalamat oloh atawa mampatei?” Ewen uras benyem.

⁵Marak kasangite Yesus manampayah hakaliling Ie tapi Ie kapehe kea ateie awi ewen te lalau katekang ateie. Palus Ie hamauh dengan oloh te, “Julok lengem.” Oloh te manjuju lengee, tuntang lengee te palus keleh.

⁶Maka kare oloh Parisi malihi huma sombayang te, palus hapakat dengan oloh bara baris Herodes, uka mampatei Yesus.

⁷Yesus tuntang kare murid Ayue haguet mangejau Arepe akan Danau Galilea. Maka are toto oloh bara Galilea je haguet omba Yesus. Are kea je dumah bara Yuda,

⁸bara Yerusalem, bara tanah Idumea, tuntang bara tanah hong hila timor Yordan, tuntang bara kare lewu hakaliling tokep Tirus tuntang Sidon. Ewen samandiai dumah manalih Yesus, basa ewen mahining tahiu kare taloh je jari Ie mawie.

⁹ Kare oloh te kalote karee, sampai Yesus manyoho kare murid Ayue manyadia arut akae, awi mikeh Ie te kareh inyeke awi kare oloh te.

¹⁰Ie mampakeleh are toto oloh, sampai kakare oloh haban hasengkel sama arepe awie handak manokep Yesus mangat tau manigong Ie.

¹¹Tuntang kare oloh je iname awi roh papa, amon mite Ie, palus sontop manyembah intu taharep Ie tuntang mangkariak, “Ikau toh Anak Hatalla!”

¹²Tapi Yesus hayak kakarase mangahana kare roh papa te mansanan eweh Ie.

¹³Limbah te tinai Yesus manukat ije bukit, tuntang mantehau kare oloh je eka kahandak Aie. Kare oloh te dumah,

¹⁴palus Ie mintih duewalas biti bara kare ewen te. Koae, “Aku mintih keton mangat keton mampahayak Aku, mangat Aku manyoho keton mangabar Barita Bahalap bara Hatalla,

¹⁵tuntang keton kareh mandino kuasa uka maharak kare setan.”

¹⁶Maka aran duewalas kare oloh te iete: Simon (je inyewut kea Petrus),

¹⁷Yakobus tuntang paharie Yohanes, ewen te uras anak Sebedeus (ewen te inggare Boanerges rimae “anak Nyaho”),

¹⁸Andreas, Pilippus, Bartolomeus, Mateus, Tomas, Yakobus anak Alpeus, Taddeus, Simon je Menteng,

¹⁹tuntang Yudas Iskariot je mandarhaka mawi Yesus.

²⁰Limbah te tinai Yesus buli huma. Tapi oloh are dumah tinai hapumpong, sampai Yesus tuntang kare murid Ayue dia sampet kuman.

²¹Kare oloh manyewut, “Ie jari nyanyau!” Tuntang katika keluarga Ayue mahining hal te, ewen haguet mangat manduan Ie.

²² Kare guru agama je dumah bara Yerusalem hamauh, “Ie iname awi Beelsebul! Kapalan kare setan te je manenga kuasa Akae mangat maharak setan.”

²³Maka Yesus mantehau oloh are te, tuntang manyarita akan ewen pire-pire paribasa. “Kilen ampie tau setan maharak setan?” koan Yesus.

²⁴“Amon ije negara tabagi akan pire-pire kabagi je hakalahi sama arepe, negara te dia baka tau tahan.

²⁵Tuntang amon huang ije keluarga jaton aton kahinje tuntang kare bitie hamusoh sama arepe, keluarga te akan bakarak.

²⁶Amon huang karajaan Setan lembut kapusit tuntang kalahi, karajaan te dia tahi tuntang pasti kareh lilap.

²⁷Ije biti mahin jaton oloh olih tame akan huang human oloh gancang tuntang marampas ramoe amon ie dia labih helo mamasong oloh gancang te. Limbah te harue ie tau marampas ramoe.

²⁸Keleh keton katawan! Amon oloh mawi dosa tuntang mawi auh papa[7] ie tau iampun.

²⁹ Tapi amon ie mawi auh papa malawan Roh Hatalla, ie dia tau iampun! Karana mamapa Hatalla jete dosa je katatahie.” (

³⁰Yesus hamauh kalote awi aton oloh je hamauh je Yesus te iname awi roh papa.)

³¹Limbah te indu tuntang paharin Yesus dumah. Ewen mentai intu luar tuntang manyoho oloh mantehau Yesus.

³²Metoh te are oloh kanjerae mondok kaliling Yesus. Ewen hamauh Dengae, “Pa, indu tuntang paharin Bapa aton intu luar. Ewen manggau Bapa.”

³³Yesus tombah, “Eweh indu-Ku? Eweh kare paharing-Ku?”

³⁴Palus Ie manampayah kare oloh je mondok hakaliling Ie balalu hamauh, “Jetoh ie indu-Ku tuntang kare paharing-Ku!

³⁵Oloh je malalus kahandak Hatalla, jete paharing-Ku hatue, paharing-Ku bawi, tuntang indu-Ku.”