Read Ngaju MARKUS 5 Bible Online

MARKUS 5 - Ngaju bible

MARKUS 5

¹Limbah te Yesus tuntang kare murid Ayue sampai saran dipah Danau Galilea, intu saran Gerasa.

²Sana Yesus lumpat bara arut, Ie inalih awi ije biti oloh hatue je balua bara kare rumbak kubur.

³Oloh te inguasa awi kare roh papa tuntang melai intu kare kubur. Ie jari dia olih hindai imasong; aloh mahapan rantai mahin dia olih.

⁴Aloh kare paie tuntang lengee jari imasong, tapi kare rantai te harajur inggetoe, tuntang sanaman je intu paie te imeleke. Ie te dia lue-luen kagancange sampai ije biti mahin jaton oloh je olih manawae.

⁵Handau hamalem Ie te miar kumbang-kamba intu kubur tuntang intu kare bukit sambil kariak-kariak mampahimang bitie mahapan batu.

⁶Metoh ie mite Yesus bara keja-kejau, ie dari-dari palus mahingkep intu taharep Yesus.

⁷Hayak hai auhe ie mangkariak, “Yesus Anak Hatalla, Je Pangkahai! Handak iawim kilen ampie aku toh? Tagal aran Hatalla aku balaku, ela ih mangapehe aku!” (

⁸Oloh te hamauh kalote awi Yesus hamauh dengae, “Roh papa, balua ikau bara oloh toh!”)

⁹Palus Yesus misek ie, “Eweh aram?” Oloh te tombah, “Arangku ‘Legion’ — basa ikei toh are toto!”

¹⁰Ie balaku nyame-nyame mangat Yesus dia manyoho kare roh papa te balua bara daerah te.

¹¹Tokep eka te aton are toto bawoi je kanjerae manggau panginae intu biling bukit.

¹²Kare roh papa te balaku dengan Yesus, “Soho ikei tame akan huang kare bawoi te.”

¹³Tuntang Yesus olih manumoe. Jadi, kare roh papa te balua bara oloh te palus tame akan huang kare bawoi te. Salepah kare kawan bawoi te hadari tuntang manangkero bara saran biling te kangiwa akan huang danau palus leteng — samandiaie te aton due koyan bawoi.

¹⁴Kare oloh je manjaga bawoi te hadari, tuntang mansanan kabar te akan oloh lewu tuntang kare oloh huang kare dukuh hakalilinge. Balalu kare oloh balua mangat mite kare taloh je jari manjadi.

¹⁵Ewen dumah manalih Yesus, palus mite oloh je jari iname awi roh papa te nah, metohe mondok hete. Ie jari hapakaian, tuntang tirok itonge kea jari barendeng. Maka ewen samandiai manjadi mikeh.

¹⁶Kare oloh je jari manyaksi kabuat kare taloh je manjadi buah oloh te tuntang kare bawoi te, manyarita taloh je jari manjadi.

¹⁷Balalu kare oloh lewu hong eka te balaku uka Yesus malihi daerah te.

¹⁸Metoh Yesus lumpat akan huang arut, oloh je jari inguasa awi roh papa te nah balaku dengan Yesus uka ie tau omba.

¹⁹Tapi Yesus dia hakon, koae, “Buli ih tuntang sanan akan kare tondah paharim taloh je jari iawi Tuhan akam tuntang kakai ampin kataun Ayue dengam!”

²⁰Maka oloh te haguet, tuntang manampara manyarita akan kare oloh hong daerah Sapuluh Lewu Hai taloh je jari iawi Yesus dengae. Uras oloh hengan mahininge.

²¹Yesus haluli tinai akan saran danau dipah silae. Intu saran danau te, are oloh dumah hakarimpong mangaliling Yesus.

²²Maka dumah ije biti oloh je bagare Yairus. Ie te ije biti pamimpin huma sombayang intu lewu te. Katika ie mite Yesus, ie manyembah intu taharep Ie,

²³tuntang balaku nyame-nyame, “Pa, anakku je bawi haban paham. Balaku kahiasm dumah uka manggayap ie, mangat ie keleh tuntang dia matei!”

²⁴Maka Yesus haguet hayak dengan Yairus. Are oloh manuntut Ie tuntang manyeke Ie bara hete-hete oloh dumah.

²⁵Bara marak kare oloh te aton tinai ije biti oloh bawi je jari duewalas nyelo haban baduroh dahae ganan dumah bulae.

²⁶Kare panataue jari lepah akan hapa mambayar kare dokter, tapi jaton aton oloh je olih mampakelehe, malahan kahabae te sasar paham haream.

²⁷Oloh bawi te jari are pahininge tahiu Yesus. Maka hong marak oloh are te ie manokep Yesus bara hila likut,

²⁸awi koae huang ateie, “Asal aku manigong jubahe bewei aku kareh keleh!”

²⁹Ie manigong jubah Yesus, tuntang hemben te kea daha je balua te tende. Ie mangkeme je ie jari keleh.

³⁰Hong katika te kea Yesus mangkeme aton kuasa je balua bara Ie. Maka Ie tampaliau akan oloh are tuntang misek, “Eweh je manigong jubah-Ku?”

³¹Kare murid Ayue hamauh, “Bapa mitee kabuat aton kalote ampin kare oloh je hasengkel. Tuntang Bapa magon misek, eweh je manigong Bapa?”

³²Tapi Yesus tetep mite hakaliling Ie uka manggau oloh je jari manigong Ie.

³³Oloh bawi te je katawan taloh je manjadi buah ie, hayak hagenjeh tuntang kikehe hajarungkop intu taharep Yesus tuntang mangaku kare taloh handiai te.

³⁴Palus Yesus hamauh dengan oloh bawi te, “Anak-Ku, awi ikau percaya dengang-Ku, ikau keleh! Lius dengan salamat. Ikau jari keleh samasinde!”

³⁵Metoh Yesus magon hakotak, pire-pire jipen dumah bara human Yairus. “Anak tuan je bawi jari nihau,” koan ewen dengan Yairus. “Dia usah tuan manyusah Bapa Guru hindai.”

³⁶Sambil dia mahining[9] taloh je insanan awi oloh te, Yesus hamauh dengan Yairus, “Ela mikeh, percaya ih!”

³⁷Palus Yesus marajur tanjonge, tapi ije biti mahin jaton Ie manyoho oloh manuntut Ie, beken bara Petrus dengan Yakobus tuntang paharie Yohanes.

³⁸Katika ewen sampai hong human Yairus, Yesus mite ampin oloh puna surak-sirok, tuntang mahining auh tangis tuntang tatum je paham.

³⁹Balalu Yesus tame tuntang hamauh dengan ewen, “Mbuhen kare karidu tuntang tangis toh? Anak te dia matei; ie baya batiroh!”

⁴⁰Ewen manatawe Yesus. Maka Ie manyoho ewen uras balua. Palus Ie mimbit indu-bapa anak te tuntang katelo-telo murid tame akan huang kamar anak te.

⁴¹Yesus mimbing lengen anak te palus hamauh dengae, “Talita kum,” jete rimae, “Anak bawi, aku hamauh dengam: misik!”

⁴²Anak bawi te bajeleng misik, tuntang mananjong. (Umure jari duewalas nyelo.) Kakare oloh je manyaksi kajadian te paham hengan!

⁴³Tapi Yesus dengan kakarase mangahana ewen mansanan hal te akan eweh bewei. Balalu koae, “Tenga panginan akan anak te.”