Read Ngaju MARKUS 6 Bible Online

MARKUS 6 - Ngaju bible

MARKUS 6

¹Bara eka te Yesus buli haya-hayak dengan kare murid Ayue akan lewu-human Ayue.

²Hong andau Sabat Ie nampara majar hong huma sombayang. Are oloh aton intu hete. Metoh kare oloh te mahining auh ajar Yesus, ewen hengan toto. Ewen hamauh, “Bara kueh oloh toh mandino kakare taloh te? Kapintar-kaharati macam en je aton intu Ie toh? Kilen ampie Ie olih mawi taloh heran?

³En dia Ie toh je tukang kayu te, anak Maria, tuntang paharin Yakobus, Yoses, Yudas tuntang Simon? Ie, kare paharin Ayue awang bawi mahin aton melai hetoh kea.” Tagal te ewen dia manarima Ie.

⁴ Palus Yesus hamauh dengan ewen, “Ije biti nabi, hong kueh-kueh bewei ihormat oloh, tapi intu lewu-human ayue, tuntang bentok kare tundah-paharie tuntang keluarga Ayue, ie dia ihormat.”

⁵Intu eka te, ije taloh heran mahin dia Yesus olih mawie, beken bara mampakeleh pire-pire oloh haban awie mingkes lengen Aie akan hunjun ewen.

⁶Ie hengan ewen te dia percaya. Limbah te Yesus haguet akan kare lewu je hakatokep hete, tuntang majar.

⁷Ie mantehau duewalas murid Ayue palus manyoho ewen haguet badue-badue tuntang manenga kuasa akan ewen hapae maharak kare roh papa.

⁸ Ie majar ewen kalotoh: “Ela keton mimbit taloh en-en huang jalanan keton, beken bara sukah. Ela mimbit panginan atawa kambut sadakah, atawa duit.

⁹Keleh mahapan sapatu tapi ela mimbit due kalambar baju.”

¹⁰Ie kea hamauh, “Amon keton tame akan ije huma, keleh melai hete sampai keton malihi lewu te.

¹¹ Tapi amon keton sampai ije eka, tuntang oloh hete dia maku manarima tuntang mahining auh keton, lihi ih eka te. Tuntang ngibas kawo bara pain keton kilau pampingat intu taharep ewen!”

¹²Maka duewalas murid Yesus te haguet. Ewen haguet mangabar barita je olon te musti hobah bara kare dosae.

¹³ Kare murid Yesus te maharak kare setan, mohos undus intu oloh haban tuntang mampakeleh ewen.

¹⁴ Kare barita tahiu taloh handiai je manjadi te sampai kea akan Raja Herodes,[10] basa aran Yesus jari basewut intu hete-hete. Aton oloh je hamauh, “Yohanes Pampandoi jari belom haluli! Jete sababe Ie mandino kuasa malalus taloh heran te.”

¹⁵Tapi kare oloh awang beken hamauh, “Ie te Elia.” Aton tinai je hamauh, “Ie te nabi, sama kilau ije biti nabi jaman horan.”

¹⁶Katika Herodes mahining hal te, ie hamauh, “Pasti toh, Yohanes Pampandoi je bihin inyohoku manetek takoloke. Toh ie jari belom haluli!”

¹⁷ Basa helo bara te Herodes manyoho oloh manawan Yohanes, tuntang manameae akan huang penjara. Herodes mawie kalote awi soal Herodias, kabalin paharie kabuat, iete Pilippus. Basa Herodes jari kawin dengan Herodias,

¹⁸tuntang tahiu hal te Yohanes jari dia hakalayan maningak Herodes kalotoh, “Dia tau ikau kawin dengan kabalin paharim te!”

¹⁹Jete sababe Herodias handak mawi Yohanes, uka mampatei ie, tapi ie dia tau malalus hal te, awi ie ingahana awi Herodes.

²⁰Basa Herodes jari manyoho oloh manjaga bua-buah kasalamatan ain Yohanes intu penjara, awi ie mikeh dengan Yohanes. Ie katawan Yohanes te ije biti oloh bahalap je inyoho awi Hatalla. Tuntang puna amon Yohanes hakotak, Herodes rajin kea mahininge, aloh ie tau gogop toto awi auh Yohanes te.

²¹Kajariae Herodias dinon akal huang katika je bahalap metoh andau Herodes ulang tahun. Katika te Herodes mawi pesta akan kakare pajabat gantong huang karajaan te, kare perwira tuntang kare bakas oloh lewu hong Galilea.

²²Intu pesta te anak bawi bujang ain Herodias[11] manari tuntang tari te paham mampahanjak atei Herodes tuntang kare oloh je dumah hete. Maka Herodes hamauh dengan bawi bujang te, “Ikau handak en, laku ih. Aku kareh handak manenga akam!”

²³Palus Herodes hajanji dengan bawi bujang te hapan sumpah. Herodes hamauh, “Narai bewei je ilakum, kareh inengaku, aloh satengah bara karajaangku toh mahin tau!”

²⁴Maka bawi bujang te balua tuntang misek dengan indue, “Umai, en je bahalap aku musti balakue?” Indue tombah, “Laku ih takolok Yohanes Pampandoi.”

²⁵Bawi bujang te bajeleng haluli manalih Herodes tuntang hamauh, “Aku balaku takolok Yohanes Pampandoi inenga akangku metoh toh kea intu ije bindang baki!”

²⁶Mahining auh palakue te Herodes paham kapehe ateie. Tapi ie dia olih manolak palakue te awi ie jari sumpah intu taharep kare oloh parawei ayue te.

²⁷Jadi ie balalu marentah ije biti pangawal ayue manduan takolok Yohanes Pampandoi. Maka prajurit te haguet akan penjara, palus manetek takolok Yohanes.

²⁸Limbah te ie mimbit takolok te intu baki tuntang manyarahe akan bawi bujang te. Tuntang bawi bujang te manyarahe tinai akan indue.

²⁹Katika kare murid Yohanes mahining hal te, ewen haguet manduan hantun Yohanes palus mangubure.

³⁰Kare rasul je inyoho awi Yesus te limbah te haluli tinai, tuntang buli manalih Yesus. Ewen mansanan akae taloh samandiai je jari iawi ewen tuntang je iajar ewen.

³¹Are toto oloh je dumah baganti-bagilir, sampai Yesus dengan kare murid Ayue, kuman mahin dia panae. Tagal te Yesus hamauh dengan kare murid Ayue, “Has itah haguet akan eka je benyem, eka itah ngabuat arep itah tuntang keton tau malayan hanjulo.”

³²Maka ewen palus haguet mahapan arut manalih akan eka je benyem.

³³Tapi are oloh jari mite ewen malihi eka te, tuntang katawan, eweh ewen te. Jadi bara kakare lewu hong daerah te, kare oloh baradari mahalau jalan hunjun petak mananselo Yesus tuntang kare murid Ayue.

³⁴ Katika Yesus lumpat bara arut, Ie mite oloh are. Ie masi dengan ewen, awi ewen sama kilau tabiri je jaton bara sakatik. Maka Ie te nampara majar are hal akan ewen.

³⁵Katika andau jari halemei, kare murid Yesus hamauh Dengae, “Andau jari handak hamalem tuntang eka toh kejau bara lewu.

³⁶Labih bahalap Bapa manyoho kare oloh te haguet, mangat ewen tau mamili panginan hong kare lewu je aton lakau tokep hetoh.”

³⁷Tapi Yesus tombah, “Keton ih mampakanan ewen.” “Bah, en ikei musti haguet mamili rote akan rega due ratus perak[12] hapan mampakanan kare oloh toh?” kakai auh kare murid Yesus te.

³⁸Palus Yesus misek, “Pire rote aton ain keton? Coba ite helo.” Limbah ewen mitee, ewen hamauh, “Aton lime rote tuntang due kongan lauk kea.”

³⁹Palus Yesus manyoho oloh te samandiai mondok hatumpok-hatumpok intu hunjun oru je bahijau.

⁴⁰Kare oloh te mondok hatumpok-hatumpok. Aton je saratus biti huang ije katumpok, tuntang aton kea lime puluh biti huang ije katumpok.

⁴¹Limbah te Yesus manduan lime rote tuntang due lauk te, palus Ie mananggera akan langit tuntang manarimakasih akan Hatalla. Limbah te Ie mangiwak-mangiwak rote te mahapan lengen Aie akan kare murid Ayue uka imbagi akan oloh are te. Tuntang due lauk te imbagi kea akan ewen samandiai.

⁴²Ewen kuman sampai besoh.

⁴³Limbah te kalabien panginan te inampunan awi kare murid Yesus — karee aton due walas lontong kontep.

⁴⁴Kakare oloh hatue je kuman rote te aton kurang labih lime koyan biti.

⁴⁵Limbah te Yesus bajeleng manyoho kare murid Ayue haguet mahapan arut mananselo Ie haguet akan Betsaida intu saran danau Galilea, pandehan Ie manyoho oloh are te buli.

⁴⁶Limbah Ie manyoho oloh te buli, Yesus haguet manalih bukit mangat balakudoa.

⁴⁷Katika jari hamalem arut ewen murid Yesus te aton hong bentok danau haliai, tapi Yesus magon aton hunjun petak.

⁴⁸Ie mite ewen te heka toto mambesei arut ewen te awi mambesei manahusong riwut. Tagal te, kurang labih helat pukul telo dengan pukul jahawen hanjewu, Ie dumah manalih ewen mananjong hunjun danum. Tuntang Ie mananjong tarus kilau jaka Ie handak mahalau ewen.[13]

⁴⁹Metoh ewen mite Ie mananjong hunjun danum, ewen manyangka Ie te kambe,

⁵⁰sampai ewen mangkariak awi kikehe. Awi ewen samandiai mite Ie tuntang ewen paham tarewen. Tapi Yesus hakotak dengan ewen, “Keleh sanai ih! Aku toh Yesus. Ela mikeh!”

⁵¹Palus ie lumpat akan arut ewen, tuntang riwut mahin tadoh kea. Kare murid Yesus hengan toto.

⁵²Taloh heran dengan lime kabawak rote te magon hindai ewen haratie. Bahali akan ewen manarimae.

⁵³Metoh sampai hong saran danau dipah silae, ewen mampatende arute hong saran danau Genesaret.

⁵⁴Katika ewen lumpat bara arut, kare oloh mite je dumah te Yesus.

⁵⁵Balalu ewen te dari-daria akan kanih-kate hapus eka hakaliling te, tuntang nampara mimbit kare oloh haban hunjun amak manalih Yesus. Amon ewen mahining Yesus aton hong ije eka, ewen mimbit kare oloh haban te akan hete.

⁵⁶Hong kueh bewei Yesus dumah, en hong lewu hai, lewu korik, atawa hong dukoh, akan hete kea oloh harajur dumah tuntang mingkes kare oloh haban hong bentok lewu. Palus ewen balaku nyame-nyame uka kare oloh haban te inyoho ih manigong jubah Yesus, aloh buah lawin jubahe barangai. Uras ewen je manigonge te manjadi keleh.