Read Ngaju MARKUS 7 Bible Online

MARKUS 7 - Ngaju bible

MARKUS 7

¹Ije kalompok oloh Parisi tuntang pire-pire guru agama bara Yerusalem, dumah manalih Yesus.

²Ewen mite pire-pire murid Yesus kuman hapan lengee marak dia barasih manumon cara agama, iete jaton menyau lengee helo bara kuman manumon atoran agama.

³Kare oloh Parisi, uras oloh Yehudi kalote kea, rajin toto manumon kare hadat tato hiang ewen. Ewen dia handak kuman amon hindai menyau lengee manumon kare cara je jari inukas.

⁴Taloh kinan je imili hong pasar, dia handak ewen kumae amon hindai ienyau helo.[14] Tuntang are atoran beken ain tato hiang ewen je iimbing ewen toto; sampai paribasa atoran menyau galas, mangkok, tuntang kare pakakas bara tambaga.[15]

⁵Tagal te kare oloh Parisi tuntang guru agama te misek dengan Yesus, “Mbuhen kare murid Ayum te kuman mahapan lenge je dia ienyau? En sababe ewen dia maku manumon hadat tato hiang itah?”

⁶ Yesus tombah, “Keton toh oloh haliau! Buah toto taloh je inujum awi Yesaya tahiu keton, iete, ‘Kalotoh auh Hatalla, Kare oloh te baya manyembah Aku hapan kare bawak kotake tapi atei ewen kejau bara Aku.

⁷Jaton gunae ewen manyembah Aku, basa ewen majar atoran olon kilau jaka jete atoran ayung-Ku!’

⁸Kare parentah Hatalla dia keton manantuanie, tuntang kare atoran olon ihaga keton bua-buah.”

⁹Palus Yesus hamauh tinai, “Keton apik toto manolak parentah Hatalla mangat tau mandehen ajar ain keton kabuat.

¹⁰ Moses jari manenga parentah toh, ‘Hormat bapam tuntang indum,’ tuntang ‘Ewe-eweh je mangotok manahiu indu-bapae, musti ihukum matei.’

¹¹Tapi keton majar kalotoh: Amon oloh hamauh dengan oloh bakase, ‘Taloh je musti inengaku akan indu-bapaku, jari inyarahku akan Hatalla,’

¹²maka keton mahambang oloh te bara kapatut gawie mandohop indue-bapae.

¹³Jadi mahapan ajar keton kabuat je inenga keton akan oloh beken, keton manganan auh Hatalla. Are hindai hal je kilau toh je iawi keton.”

¹⁴Palus Yesus mantehau oloh are te sinde tinai tuntang hamauh dengan ewen, “Hining toh mangat keton haratie!

¹⁵Jaton aton taloh je bara luar tame akan huang oloh je tau mawi oloh te papa. Malahan, taloh je balua bara oloh, jete je mawi ie oloh papa. [

¹⁶Jadi, amon aton pinding, keleh mahining.]”

¹⁷Katika Yesus malihi oloh are te tuntang tame huma, kare murid Ayue misek Dengae tahiu riman paribasa te.

¹⁸Maka Yesus hamauh dengan ewen, “En keton hindai kea haratie? En keton dia tau haratie taloh je tame akan huang oloh dia tau mawi oloh te papa?

¹⁹Basa taloh je tame te dia mahalau atei, tapi mahalau kanai, tuntang limbah te balua tinai.” Mahapan kare auh te Yesus mansanan batantu je kare taloh kinan te uras bahalap akan kinan.

²⁰Palus Yesus hamauh tinai, “Taloh je balua bara oloh, jete je mawi ie papa.

²¹Basa bara huang, iete bara huang atei, lembut kare tirok papa je mawi sabab oloh malalus karayap, manakau, mamuno,

²²habandong, mamikir, mandarhaka, hayak malalus kare taloh je papa, manjadi babungo, dia bahadat, bahiri, gantong ateie tuntang bahali ajare.

²³Kakare taloh papa te lembut bara huang, tuntang jete je mawi olon manjadi papa.”

²⁴Rahian tinai Yesus malihi eka te, tuntang haguet akan eka tokep lewu Tirus. Ie tame akan huang ije huma tuntang Ie dia maku oloh mangatawan Ie aton hete. Tapi Ie dia olih manyahokan arepe.

²⁵Ije biti ibu, ie aton anake je irasuk setan, mahining tahiu Yesus. Ie dumah manalih Yesus tuntang manyembah intu taharep Ie,

²⁶sambil balaku mangat Yesus maharak setan bara anake te. Oloh bawi te dia oloh Yehudi, ie inakan hong daerah Poinike intu Siria.

²⁷Yesus hamauh dengae, “Kare anak oloh musti impakanan helo. Dia bahalap manduan panginan bara anak oloh mangat manjakahe akan aso.”

²⁸“Tuan,” koan oloh bawi te tombah, “Kare aso intu penda meja mahin kuman bara tisan panginan je impanjato awi anak oloh!”

²⁹Palus Yesus hamauh dengae, “Tagal auh tombahm te, buli ih; setan jari balua bara anakm!”

³⁰Maka ibu te buli. Intu humae, ie sondau anake te metoh menter intu ekae batiroh, tuntang setan puna toto-toto jari balua bara anak te.

³¹Limbah te Yesus malihi daerah Tirus, tuntang marajur jalanan Ayue mahalau Sidon akan Danau Galilea. Ie mahoroi jalan mahalau Lewu Sapuluh.

³²Intu hete oloh mimbit ije biti oloh bisu badengen manalih Ie. Ewen balaku Yesus mina lengen Aie akan hunjun oloh te.

³³Yesus mimbit oloh te mangabuat kejau bara oloh are palus mina due tunjok Ayue akan huang kadadue pinding oloh te. Balalu Yesus maluja, tuntang manggayap jelan oloh te.

³⁴Limbah te Yesus mananggera akan langit, palus manahaseng kara-karas tuntang hamauh dengan oloh te, “Epata,” jete rimae, “Habangah!”

³⁵Pinding oloh te habangah tuntang jelae manjadi balemo haluli, tuntang ie nampara dia bahali hakotak.

³⁶Palus Yesus mangahana ewen samandiai mansanan hal te akan eweh bewei. Tapi sasar Yesus mangahana, sasar haream ewen mambaritae.

³⁷Tuntang kakare oloh je mahining jete hengan toto. Ewen hamauh, “Taloh samandiai te ilalus Awie dengan kahalape! Malahan Ie mawi oloh badengen mahining tuntang oloh bisu hakotak!”