Read Ngaju MARKUS 8 Bible Online

MARKUS 8 - Ngaju bible

MARKUS 8

¹Dia tahi limbah te tinai, aton hindai ije kakawan oloh are dumah hapumpong. Awi ewen dia aton panginan, Yesus mantehau kare murid Ayue tuntang hamauh,

²“Aku masi dengan oloh are toh. Jari telo andau katahie ewen hinje dengang-Ku tuntang toh ewen jaton panginae.

³Amon Aku manyoho ewen buli marak kanai buang, ewen kareh tujah benteng jalan. Mahin tinai bara marak ewen te aton je dumah bara eka kejau.”

⁴Kare murid Yesus tombah, “Hong eka je kejau toh, hong kueh oloh tau mandino sukup panginan akan samandiai oloh toh?”

⁵“Pire kare rote aton dengan keton?” koan Yesus misek. “Uju,” koan ewen tombah.

⁶Maka Yesus manyoho oloh are te mondok intu hunjun petak, palus Ie manduan uju rote te tuntang manarimakasih akan Hatalla. Limbah te Ie mangiwak-mangiwak rote te hapan lengen Aie tuntang manengae akan kare murid Ayue uka imbagi akan kare oloh. Maka kare murid Ayue malalus te.

⁷Ewen aton mimbit pire-pire kongan lauk kea. Yesus manarimakasih akan Hatalla tagal kare lauk te, palus manyoho kare murid Ayue mambagi kare lauk te kea.

⁸Ewen kuman sampai besoh — aton kurang labih epat koyan biti oloh je kuman. Limbah te kare murid Yesus manampunan kalabien panginan — uju ranjong kontep. Palus Yesus manyoho kare oloh te buli,

¹⁰tuntang Ie dengan kare murid Ayue balalu lumpat arut tuntang haguet akan daerah Dalmanuta.

¹¹ Pire-pire oloh Parisi dumah manalih Yesus, tuntang nampara hatakian auh Dengae hapan manjabak Ie. Ewen balaku Yesus mawi taloh heran kilau tanda je Ie te dumah bara Hatalla.

¹² Yesus bakotok palus tombah, “En sababe oloh jaman jetoh balaku Aku mawi taloh heran? Dia! Aku dia akan manenga taloh heran te akan ewen!”

¹³Palus Yesus malihi ewen, tuntang lumpat akan huang arut; limbah te haguet akan saran danau dipah silae.

¹⁴Kare murid Yesus kalapean mimbit rote. Ewen baya aton mina rote huang arut.

¹⁵ “Bua-buah keton taharep kare ragin oloh Parisi tuntang ragin Herodes,” koan Yesus dengan ewen.

¹⁶Maka kare murid Yesus te nampara manahiu hal te. Ewen hamauh, “Ie hamauh kalote, awi itah dia aton rote.”

¹⁷Yesus katawan taloh je inahiu ewen. Awi te Ie misek dengan ewen, “Mbuhen keton manahiu soal jaton rote? En keton hindai katawam tuntang hindai harati kea? Lalehan kadian tirok keton?

¹⁸ Matan keton aton — mbuhen dia mite? Ain keton aton pinding — mbuhen dia mahining? En dia keton mingat

¹⁹lime rote je ingiwak-ingiwak akan lime koyan biti oloh? Pire lontong kontep awi kalabien panginan je inampunan keton?” “Duewalas,” koan ewen tombah.

²⁰“Tuntang metoh aku mangiwak-mangiwak uju rote akan epat koyan biti oloh,” koan Yesus misek tinai, “Pire lontong kalabien panginan je inampunan keton?” “Uju,” koan ewen tombah.

²¹“Nah, en hindai kea keton haratie?” koan Yesus tinai.

²²Ewen sampai intu Betsaida. Intu hete oloh mimbit ije biti oloh babute manalih Yesus, tuntang balaku uka Ie manggayap oloh babute te mangat mampakeleh ie.

²³Maka Yesus mimbing lengen oloh babute te tuntang mangagalan ie balua lewu te. Limbah te Yesus maluja matan oloh te. Ie mina lengee intu matan oloh te palus misek ie, “En toh tau ikau mite taloh en-en?”

²⁴Oloh te manampayah akan hila baun, palus hamauh, “Iyoh. Aku mite oloh tanjo-tanjong; tapi ewen kilau batang kayu ampie.”

²⁵Yesus mingkes tinai lengen Ayue intu matan oloh te tuntang manyoho ie sapire kaolihe mite. Matae te keleh, tuntang ie mite taloh samandiai te hayak batantu toto ampie.

²⁶Palus Yesus hamauh dengae, “Buli ih, tuntang ela haluli akan lewu te.”

²⁷Yesus tuntang kare murid Ayue haguet akan kare lewu hakaliling tokep Kaisarea Pilippi. Hong benteng jalan Yesus misek dengan ewen, “Manumon koan oloh, eweh kea Aku toh?”

²⁸ Ewen tombah, “Aton je manyewut Yohanes Pampandoi; aton kea je manyewut Elia, tuntang je beken tinai manyewut: ije biti bara kare nabi.”

²⁹ “Tapi manumon koan keton kabuat, Aku toh eweh?” koan Yesus misek. Petrus tombah, “Bapa toh Raja Panyalamat!”

³⁰Palus Yesus mampingat ewen, mangat ela mansanan akan eweh bewei tahiu Ie.

³¹Limbah te Yesus nampara majar kare murid Ayue tahiu Anak Olon musti buah kapehe, tuntang akan ilawan awi kare pamimpin, kare imam kapala, tuntang kare guru agama. Ie kareh impatei, tapi huang andau je kateloe Ie kareh impisik tinai.

³²Hapan auh tarang toto Yesus mansanan hal te akan murid Ayue. Maka Petrus manjijit Yesus akan sare, tuntang maningak Ie.

³³Tapi Yesus tampaliau tuntang manampayah kare murid Ayue, palus maningak Petrus, “Indah ikau bara hetoh, Paningkes! Tirokm te tirok olon; dia tirok Hatalla!”

³⁴ Limbah te Yesus mantehau oloh are je aton hete haya-hayak dengan kare murid Ayue. Palus Ie hamauh dengan ewen, “Oloh je handak omba Aku, musti mangalapean taloh je mambatang akan arepe kabuat, limbah te tinai mananggong sampalakie, tuntang tetep omba Aku.

³⁵ Basa oloh je handak mahaga pambelome, kareh nihau pambelome. Tapi oloh je nihau pambelome ganan Aku tuntang ganan Barita Bahalap bara Hatalla, kareh manyalamat pambelome.

³⁶En kaontonge akan oloh, amon hapus kalunen toh ie tempoe, tapi ie nihau pambelome?

³⁷En tau pambelom te inakiri hapan taloh en-en?

³⁸Amon oloh mahamen mangaku Aku tuntang auh ajar-Ku hong wayah darhaka tuntang papa toh, maka Anak Olon kea kareh mahamen mangaku oloh te hong katika Ie dumah kareh huang kuasan Bapae, impahayak kare malekat je barasih.”