Read Ngaju MARKUS 9 Bible Online

MARKUS 9 - Ngaju bible

MARKUS 9

¹“Keleh keton katawan!” koan Yesus. “Bara kare keton hetoh aton je dia matei, helo bara Hatalla marentah hapan kuasan Aie!”

² Jahawen andau tinai limbah te Yesus mimbit Petrus dengan Yakobus tuntang paharie Yohanes, mangabuat akan ije bukit je gantong. Intu taharep matan ewen Yesus hobah ampie.

³Pakaian Ayue manjadi baputi mangilat. Jaton ije tukang penatu hong kalunen toh je olih mampukan kilau te kaputie.

⁴Limbah te tinai telo biti murid Ayue te mite Yesus hakotak dengan Elia tuntang Moses.

⁵Maka Petrus hamauh dengan Yesus, “Pa Guru, mangat toto intu hetoh. Keleh itah mampendeng telo tingkap: ije akan Bapa, ije akan Moses, tuntang ije tinai akan Elia.”

⁶Sapunae Petrus dia katawan taloh je musti ingotake, awi ie dengan due kawale te metoh kapaham kikehe.

⁷ Limbah te baunandau manganjungen ewen tuntang bara baunandau te tarahining auh je hamauh, “Ie toh Anakku je inyintaku. Hining auh Ayue!”

⁸Bajeleng ewen mite hakaliling ewen, tuntang jaton tinai mite eweh bewei intu hete dengan ewen, beken bara Yesus.

⁹Metoh ewen mohon bara bukit te, Yesus mampingat ewen, “Ela mansanan akan eweh bewei taloh je gitan keton nah sahelo bara Anak Olon impisik bara pampatei.”

¹⁰Ewen manumon auh peteh te, tapi sama arep ewen kabuat ewen nampara manahiu taloh je koan Yesus “belom haluli bara pampatei”.

¹¹ Maka ewen misek Dengae, “Mbuhen kare guru agama hamauh, je Elia musti dumah labih helo?”

¹²Yesus tombah, “Elia puna dumah labih helo mangat mamberes kare taloh handiai. Tapi kilen ampie tahiu Anak Olon? En sababe hong Surat Barasih tarasurat je Ie akan are ingapehe tuntang ihina oloh?

¹³Tapi Aku hamauh dengan keton: Elia jari dumah, tuntang kare oloh mawi ie mana koan ewen ih. Jete saroroi dengan je jari inyurat huang Surat Barasih tahiu ie.”

¹⁴Katika Yesus tuntang katatelo murid Ayue jari aton haluli tinai dengan kare murid Ayue awang beken, ewen mite are oloh intu hete. Pire-pire guru agama metohe hasoal dengan kare murid Yesus te.

¹⁵Sana kare oloh te mite Yesus, ewen paham hengan, palus hadari manambang Ie.

¹⁶“En taloh je inyoal keton dengan kare guru agama te?” koan Yesus misek kare murid Ayue.

¹⁷Ije bara kare oloh are te tombah, “Bapa Guru, aku mimbit anakku manalih Bapa. Ie te bisu awi iname roh papa.

¹⁸Amon roh papa te manyarang ie, bitie ihampas-hampase intu petak, nyamae habure, kasingae mangaret tuntang hapus bitie manjadi kejang. Aku balaku kare murid Bapa maharak roh papa te, tapi ewen dia olih malaluse.”

¹⁹Maka Yesus hamauh dengan ewen, “Lalehan keton toh! Toto-toto keton toh oloh je dia percaya. Sampai hamparea aku musti melai hinje keton tuntang sabar dengan keton? Imbit anak te akan hetoh!”

²⁰Te ewen mimbit anak te manalih Yesus. Sana roh papa te mite Yesus, ie mawi bitin anak te keje-kejer sampai anak te balihang gulang-galing akan petak. Nyamae habure.

²¹Palus Yesus misek dengan bapae, “Jari kilen katahie ie kilau toh?” “Bara metoh ie korik!” koan bapae tombah.

²²“Jari kinjap roh papa te manggau jalan handak mampatei ie, impalihange akan apui atawa akan huang danum. Tapi amon Bapa olih mandohop, buah Bapa masi ikei tuntang mandohop ikei!”

²³“Narai koam? Amon Bapa olih?” koan Yesus tombah. “Taloh handiai te olih, asal oloh percaya!”

²⁴Balalu bapa te mangkariak, “Tuhan, aku percaya tapi kapercayangku tapas. Dohop aku mangat labih percaya hindai!”

²⁵Metoh Yesus mite oloh are nampara dumah hakarimpong, Ie manyoho roh papa te haguet. Ie hamauh, “Roh badengen tuntang bisu aku marentah ikau balua bara anak toh tuntang ela samasinde tame tinai intu huang ie!”

²⁶Roh papa te mangkariak, palus mawi bitin anak te keje-kejer, limbah te balua bara anak te. Anak te ampie kilau hantu uras kare oloh hamauh, “Ie jari matei!”

²⁷Tapi Yesus mimbing lengee tuntang mandohop ie hingkat. Anak te palus hingkat.

²⁸Limbah te Yesus intu huma, kare murid Ayue dumah mangabuat manalih Ie tuntang misek, “En sababe ikei dia olih maharak roh papa te?”

²⁹Yesus tombah, “Roh papa macam te dia olih iharak dengan cara en bewei, beken bara lakudoa.”

³⁰Yesus tuntang kare murid Ayue malihi eka te tuntang marajur jalanan Ayue mahalau Galilea. Yesus dia maku oloh katawan hong kueh Ie aton,

³¹awi Ie metoh majar kare murid Ayue. “Anak Olon kareh inyarah akan kuasan olon,” koan Yesus, “tuntang Ie kareh impatei tapi hong andau kateloe Ie kareh impisik!”

³²Kare murid Ayue dia harati taloh je iajar awi Yesus, tapi ewen mikeh misek Dengae.

³³Ewen sampai intu Kapernaum. Limbah jari intu huma, Yesus misek dengan kare murid Ayue, “Keton manahiu en hong benteng jalan endau?”

³⁴ Ewen dia tombah awi hong benteng jalan ewen hasoal tahiu eweh je pangkahaie.

³⁵ Yesus mondok palus mantehau duewalas murid Ayue te. Ie hamauh dengan ewen, “Oloh je handak manjadi nomor ijee, ie musti manjadi je pangkarahiae tuntang manjadi jipen akan oloh samandiai.”

³⁶Limbah te Yesus manduan ije biti anak korik, tuntang manyoho anak te mendeng intu taharep ewen samandiai. Yesus mamalok anak te tuntang hamauh dengan kare murid Ayue,

³⁷ “Oloh je manarima ije biti anak korik kilau toh tagal Aku, rimae ie manarima Aku. Tuntang oloh je manarima Aku, ie dia manarima Aku bewei, tapi manarima kea Ie je manyoho Aku.”

³⁸Palus Yohanes hamauh dengan Yesus, “Pa Guru, ikei mite ije biti oloh maharak setan mahapan aran Bapa. Tuntang ikei mangahana ie awi ie beken bara itah.”

³⁹Tapi Yesus hamauh, “Ela mangahana ie, basa jaton ije biti oloh je mawi taloh heran mahapan arang-Ku, balalu tau mamapa Aku.

⁴⁰ Basa oloh je dia malawan itah, rimae ie tame pihak itah.

⁴¹ Keleh ingat! Oloh je manenga danum ihop akan keton awi keton murid Raja Panyalamat, ie kareh pasti mandino upahe.”

⁴²“Ewe-eweh je mawi buku sampai ije bara kare oloh je korik toh dia percaya tinai dengang-Ku, labih bahalap amon batu garinda hai imeteng intu uyate, tuntang ie injakah akan huang tasik.

⁴³ Amon lengem silae mawi ikau badosa, tetek ih lengem te! Labih bahalap ikau belom dengan Hatalla marak jaton lengem silae bara ikau dengan due lengem tame akan naraka, iete apui je katatahie. [

⁴⁴Hong hete apui dia tau belep, tuntang uret dia tau matei.]

⁴⁵Tuntang amon paim mawi ikau badosa, tetek ih paim te. Labih bahalap ikau belom dengan Hatalla marak jaton paim silae bara ikau dengan kadadue paim inganan akan naraka. [

⁴⁶Hong hete apui dia tau belep tuntang uret dia tau matei.]

⁴⁷ Amon matam mawi ikau badosa, karuit ih mate te! Labih bahalap ikau tame Lewu Taheta ain Hatalla marak jaton matam silae, bara ikau dengan kadadue bawak matam inganan akan huang naraka.

⁴⁸ Intu hete apui dia tau belep tuntang uret dia tau matei.

⁴⁹Genep oloh kareh imparasih hapan apui, kilau parapah te imparasih hapan uyah.

⁵⁰ Uyah te bahalap tapi amon uyah te manjadi batawah, en tau ie ingahing tinai? Keleh keton manjadi sama kilau uyah — keleh belom hinje huang kadamai.”