Read Ngaju LUKAS 1 Bible Online

LUKAS 1 - Ngaju bible

LUKAS 1

¹Teopilus je bahalap budi basarae, Jari are oloh je manyurat rinti-rinting tahiu kare taloh je jari manjadi hong marak itah.

²Ewen manyurat tumon kare taloh je inyarita akan itah awi kare oloh je mitee kabuat kare taloh je manjadi te bara tamparae, tuntang limbah te manyiar barita te.

³Limbah aku jari manaliti toto-toto taloh samandiai te bara tamparae, maka aku mangkeme buah kea manyurat ije karinting laporan akan Tuan.

⁴Aku mawie kalote mangat Tuan katawan taloh je iajar akan Tuan te toto bujur.

⁵ Katika Herodes manjadi raja hong tanah Yuda,[1] aton ije biti imam bagare Sakaria, ie te bara baris kare imam Abia. Kabalie bagare Elisabet, mahin baris imam kea.

⁶Pambelom due biti oloh ije kabali te puna mampahanjak atei Hatalla. Ewen due te puna mamenda kakare parentah tuntang hukum ain Tuhan hapan sakalepah huange.

⁷Ewen te jaton anak awi Elisabet te tamanang tuntang ewen due te kea uras jari bakas.

⁸Hong sinde andau, metoh oloh bara baris Abia mandino gilir malalus gawi huang Human Tuhan, maka Sakaria malalus gawin imam hai te intu taharep Hatalla.

⁹Tumon bahut, limbah kare imam te batenong, maka Sakaria inunjok uka tame akan huang Human Tuhan tuntang mamapui garo.

¹⁰Pandehan upacara mapui garo te ilalus, oloh are balakudoa intu luar.

¹¹Hong katika te malekat Tuhan mamparahan arepe akan Sakaria. Malekat te mendeng hila gantaun meja eka mapui garo te.

¹²Katika Sakaria mite malekat te, ie gogop hayak mikeh.

¹³Tapi malekat te hamauh, “Ela mikeh, Sakaria! Hatalla jari mahining lakudoam. Kabalim Elisabet kareh manak hatue. Ikau musti manampa arae Yohanes.

¹⁴Ikau kareh akan paham hanjak tuntang are oloh kareh hanja-hanjak amon anak te kareh inakan!

¹⁵ Ie kareh manjadi oloh hai hong tampayah Tuhan, tuntang ie dia handak mihop anggor atawa taloh ihop je tau mambusau. Bara katikae inakan ie inguasa awi Roh Hatalla.

¹⁶Are oloh Israel kareh ingagalan awie haluli talih Hatalla, Tuhan ewen.

¹⁷ Ie kareh manjadi sarohan Tuhan je abas tuntang kuasa sama kilau Elia. Ie kareh mandamai bapa dengan anake, tuntang oloh je baketep kareh ingagalae haluli talih jalan tirok atei je bujur. Kalote ie manatap ije ungkup je jari tatap akan Tuhan.”

¹⁸“Kilen ampie aku katawan je hal toh akan manjadi?” koan Sakaria misek malekat te. “Aku jari bakas, tuntang kabalingku mahin bakas kea.”

¹⁹ Malekat te tombah, “Aku toh Gabriel. Aku rewar ain Hatalla tuntang Ie kea je manyoho aku manyampai barita bahalap toh akam.

²⁰Taloh je insanangku, kareh manjadi hong katikae. Tapi awi ikau dia percaya, ikau kareh dia tau hakotak; ikau kareh bisu sampai taloh je insanangku te manjadi.”

²¹Pandehan te, kare oloh mentai Sakaria. Ewen hengan, mbuhen ie kalote katahie huang Human Tuhan.

²²Tuntang metoh ie balua, ie dia tau hakotak dengan ewen. Ie tarus manenga tanda hapan lengee ih, tuntang tetep bisu. Maka kare oloh mahin katawan je ie te jari mite taloh en-en huang Human Tuhan.

²³Limbah lepah kare gawie huang Human Tuhan, Sakaria palus buli akan huma.

²⁴Dia pire katahie limbah te, kabalie Elisabet te batihi, palus mangurong arepe huang huma lime bulan katatahie.

²⁵Ie hamauh, “Kajariae, Tuhan mandohop aku tuntang mampuas kare kapapangku.”

²⁶Katika Elisabet jari batihi jahawen bulan, Hatalla manyoho malekat Gabriel haguet akan Nasaret, ije lewu hong daerah Galilea.

²⁷ Gabriel inyoho manalih ije biti oloh bawi bujang je arae Maria. Bawi bujang te jari batunangan dengan oloh je arae Yosep, turonan raja Dawid.

²⁸Malekat dumah manalih Maria tuntang hamauh, “Salamat, ikau je imberkat Tuhan! Tuhan mampahayak ikau!”

²⁹Awi mahining auh malekat te, Maria tarewen sampai ie ise-isek huang ateie en riman auh tabe te.

³⁰Maka malekat te hamauh dengae, “Ela mikeh Maria, basa Hatalla mangilak ikau huang ateie.

³¹ Ikau kareh akan batihi tuntang manak ije biti anak je musti ikau manampa arae Yesus.

³² Ie kareh manjadi hai tuntang akan inyewut Anak Hatalla Bara Ngambo. Tuhan Hatalla kareh manjadian Ie Raja sama kilau Raja Dawid, tato hiange.

³³Tuntang Ie kareh marentah kilau Raja hunjun turonan Yakob sampai katatahie. Karajaan Ayue te dia tau lepah.”

³⁴“Tapi aku magon bujang,” koan Maria dengan malekat te, “kilen ampie hal te tau manjadi?”

³⁵Malekat te tombah, “Roh Hatalla kareh dumah manalih ikau, tuntang kuasan Hatalla kareh handak mangalambo ikau. Tagal te maka anak je akan inakan te kareh inyewut Barasih, Anak Hatalla.

³⁶Ingat: Elisabet paharim te jari batihi jahawen bulan, aloh ie jari bakas tuntang inyewut oloh ie tamanang.

³⁷ Basa akan Hatalla jaton taloh je mastahel.”

³⁸Palus Maria hamauh, “Aku toh rewar Tuhan; keleh kare taloh te manjadi tumon je jari insanam nah.” Palus malekat te haguet malihi Maria.

³⁹Bajeleng limbah te, Maria haguet akan ije lewu hong Yuda intu eka je habukit.

⁴⁰Ie haguet akan human Sakaria, tuntang metoh ie tame, ie manabe Elisabet.

⁴¹Tuntang sana Elisabet mahining taben Maria, anak je huang kanain Elisabet te hagerek. Maka Elisabet inguasa awi Roh Hatalla,

⁴²palus hamauh hai auhe, “Ikau je paham imberkat bara marak kare oloh bawi! Imberkat kea anak je inakan awim te!

⁴³Eweh kea aku toh sampai indu Tuhan dumah manalih aku?

⁴⁴Sana aku mahining auh tabem, anak je huang kanaingku, hagerek tagal kahanjake.

⁴⁵Salamat ikau awi ikau percaya taloh je insanan Tuhan akam te kareh manjadi!”

⁴⁶ Maria hamauh, “Ateiku manara Tuhan,

⁴⁷tuntang hambaruangku paham hanjak basa Hatalla Panyalamatku.

⁴⁸ Ie mingat aku, rewar Ayue je randah! Nampara bara toh kare bangsa manyewut salamat akangku.

⁴⁹Karana Hatalla je paham kuasan Aie malalus kare taloh hai akangku. Barasih aran Ayue.

⁵⁰Turon-manuron Tuhan mina asin Aie akan oloh je mikeh Dengae.

⁵¹Hapan lengen Aie je kuasa toto Ie mamisah-darai oloh balecak, tuntang mangacau kare rencana ewen.

⁵² Kare raja inipas bara padadusae tuntang oloh randah inggatang Awie.

⁵³Oloh balau imbesoh Awie hapan kare kahalap, oloh tatau iharak Awie buli buang.

⁵⁴Ie mandohop Israel rewar Ayue te, manumon janji je inampa Awie dengan tato hiang itah.

⁵⁵ Tuhan dia kalapean janjin Ayue, Atei Ayue paham tau dengan Abraham tuntang kare turonan ayue sampai katatahie.”

⁵⁶Kurang labih telo bulan katatahie Maria melai dengan Elisabet, harue ie buli akan humae.

⁵⁷Maka katikae sampai akan Elisabet uka luas. Ie manak ije biti anak hatue.

⁵⁸Kare oloh hasansila humae tuntang kare tundah paharie mahining auh kapaham kataun Tuhan dengan Elisabet, tuntang ewen mahin omba hanjak dengae.

⁵⁹ Metoh awau te umure hanya andau, ewen dumah manyunat ie. Ewen handak manampa aran awau te Sakaria manumon aran bapae,

⁶⁰tapi indue hamauh, “Ela! Ie musti inampa arae Yohanes.”

⁶¹“Jaton ije biti kare tundah paharim je kalote arae,” koan ewen dengae.

⁶²Balalu ewen mahapan tanda, misek dengan Sakaria eweh aran je handak inenga akan anake te.

⁶³Sakaria balaku ije batu tulis palus manyurat, “arae Yohanes.” Ewen uras hengan.

⁶⁴Hong katika te Sakaria tau hakotak tinai tuntang manara Hatalla.

⁶⁵Kare oloh hasansila humae uras mikeh, tuntang barita te tayap akan hapus daerah Yuda je habukit.

⁶⁶Uras oloh je mahining hal te, misek huang ateie, “Jadi en kah anak te kareh?” Basa Tuhan mampahayak ie.

⁶⁷Sakaria, bapa anak te inguasa awi Roh Hatalla sampai ie mansanan peteh bara Tuhan. Ie hamauh,

⁶⁸“Keleh itah manara Tuhan, Hatallan bangsa Israel! Ie jari dumah mandohop ungkup Ayue tuntang maliwus ewen.

⁶⁹Ie manenga akan itah panyalamat je paham kaabase turonan Dawid, rewar Ayue te.

⁷⁰Jaman horan mahalau kare nabi je iintih Awie, Tuhan jari manenga janjin Aie

⁷¹uka manyalamat itah bara musoh itah tuntang bara kuasan kare oloh je manyingi itah.

⁷²Hapae mamparahan kataun atei Aie dengan tato hiang itah, janjin Aie je barasih te ilalus Awie.

⁷³Ie hamauh dengan Abraham bapa itah, tuntang hajanji uka manyalamat itah bara musoh itah, mangat itah lapas bara kikeh manempo Ie

⁷⁴

⁷⁵harajur manempo Ie tuntang manyanang atei Aie hapus umur itah.

⁷⁶ Ikau o, anakku, akan inyewut nabi ain Hatalla je huang ngambo. Ikau inyoho helo hila baun Tuhan uka marintis jalan Akae,

⁷⁷uka mambarita akan ungkup Ayue je ewen inyalamat, awi Hatalla jari mampun kare dosan ewen.

⁷⁸Tuhan itah bahalap atei hayak panyayang; awi Ie manyalamat itah Ie dumah. Sama kilau matanandau lembut hong andau sawah,

⁷⁹ kalote kea Ie manenga kalawae akan kakare oloh je belom huang kakaput tuntang huang kikeh. Ie mangagalan itah huang jalan je manintu akan kasanang.”

⁸⁰Anak Sakaria te sasar hai tuntang sasar abas huang roh. Ie melai hong padang pasir, sampai dumah katikae ie mangarinah arepe akan bangsa Israel.