Read Ngaju LUKAS 10 Bible Online

LUKAS 10 - Ngaju bible

LUKAS 10

¹Limbah te Tuhan mintih uju puluh[14] murid tinai, palus manyoho ewen badue-badue mananselo Ie akan genep lewu tuntang eka je handak inalih Awie.

² “Hasil je handak inggetem are,” koan Yesus dengan ewen, “tapi oloh je manggetem isut. Tagal te laku dengan je Tempon tana mangat Ie mangirim oloh panggawi uka manggetem taloh je imbule.

³ Nah, Keleh haguet! Aku manyoho keton sama kilau tabiri akan marak kare sarigala.

⁴ Ela mimbit dompet atawa kambut sadakah atawa sapatu. Ela tende hong benteng jalan mangat manabe eweh bewei.

⁵Amon keton tame akan ije huma, sewut labih helo, ‘Keleh salamat aton huang huma toh.’

⁶Amon hete aton oloh je rajin kadamai maka auh taben keton te kareh melai tetep dengae; amon dia jijit haluli auh taben salamat keton te.

⁷ Keleh melai hong ije huma bewei. Tarima ih taloh je inyarongan oloh akam, basa oloh je bagawi aton hak manarima upahe. Ela pindah-pindah bara ije huma akan huma je beken.

⁸Amon keton dumah akan ije lewu tuntang hete keton inambang dengan bahalap, kinan ih taloh je inyarongan oloh intu hete.

⁹Pakeleh kare oloh haban hong lewu te, tuntang sanan akan kare oloh hete, ‘Hatalla bajeleng kareh manampara marentah kilau Raja hong bentok keton.’

¹⁰ Tapi amon keton dumah akan ije lewu tuntang hete keton dia inarima, keleh balua akan jalan tuntang sanan,

¹¹‘Kawo hong lewun keton je leket hong pain ikei mahin ingibas ikei kilau pampingat akan keton. Tapi keleh keton katawan katikae jari tokep je Hatalla nampara marentah kilau Raja hong bentok keton!’

¹² Keleh keton mingat, hong Andau Kiamat, labih gampang Hatalla mampun oloh lewu Sodom bara mampun oloh lewu te!”

¹³ “Calaka ikau Korasim! Tuntang calaka ikau, Betsaida! Jaka kare taloh heran je iawi hong bentok keton jari iawi hong Tirus tuntang Sidon, pasti kare oloh hete jari tahi hobah bara kare dosan ewen, tuntang mangkepan pakaian kapehen atei hayak mingkes kawo hunjun takolok ewen.

¹⁴Hong Andau Kiamat, kare oloh Tirus tuntang Sidon kareh labih gampang iampun awi Hatalla bara keton.

¹⁵ Tuntang keton, Kapernaum! Keton manirok keton kareh inggatang sampai akan sorga? Dia! Keton kareh inganan akan apui naraka haream!”

¹⁶ Palus Yesus hamauh dengan kare murid Ayue, “Oloh je mahining auh keton, mahining auh-Ku. Oloh je manolak keton, manolak Aku. Tuntang oloh je manolak Aku, manolak kea Ie je manyoho Aku.”

¹⁷Uju puluh[15] murid te haluli hayak paham kahanjake. “Tuhan,” koan ewen, “kare roh papa mahin mamenda auh ikei gagenep ikei marentah ewen mahapan aran Tuhan!”

¹⁸Yesus tombah, “Aku mite setan manjato bara langit sama kilau kilat.

¹⁹ Keleh keton katawan! Keton jari inenga kuasa mangat keton tau mahunje handipe tuntang kala hayak mampakalah kare kuasan musoh, tuntang ije mahin jaton taloh je tau mancalaka keton.

²⁰Tapi aloh kalote ela keton hanjak awi kare roh jari mamenda keton. Labih bahalap keton hanjak awi aran keton jari inyurat hong sorga.”

²¹Hong katika te kea, Yesus hanjak awi inguasa Roh Hatalla.[16] Yesus hamauh, “Bapa, Tuhan je tempon langit tuntang petak! Aku manarimakasih intu Ikau awi are taloh handiai te inyahokan Awim bara kare oloh pintar tuntang ba-ilmu, tapi Ikau mamparahae akan kare oloh je dia sakola. Jete je mampahanjak atei Bapa.

²² Kare taloh handiai jari inyarah Bapa akang-Ku. Ije biti mahin jaton oloh je mangasene Anak, beken bara Bapa. Ije biti mahin jaton kea je mangasene Bapa, beken bara Anak; tuntang kare oloh je akae Anak handak mamparahan Bapa.”

²³Palus Yesus tampaliau akan hila kare murid Ayue, limbah te Ie kabuat hamauh dengan ewen, “Batuah keton awi keton jari mite taloh je gitan keton wayah toh.

²⁴Basa ingat: Are Nabi tuntang raja mipen mite taloh je gitan keton wayah toh tapi ewen jaton mitee. Ewen mipen mahining taloh je ihining keton wayah toh, tapi ewen jaton mahininge.”

²⁵ Limbah te ije biti guru agama dumah handak manjabak Yesus. Ie misek, “Bapa Guru, aku musti malalus en mangat mandino pambelom je toto tuntang katatahie?”

²⁶Yesus tombah, “En je tarasurat huang Surat Barasih? Kilen tumon tirok keton tahiu hal te?”

²⁷ Oloh te tombah, “ ‘Sinta Tuhan Hatallam hapan salepah ateim, hapan salepah hambaruam, hapan salepah kaabasm, tuntang hapan salepah kaharatim,’ tuntang ‘Sinta oloh sama kilau ikau sinta arepm kabuat.’ ”

²⁸ “Auh tombahm te bujur,” koan Yesus, “Lalus jete, maka ikau kareh belom.”

²⁹Tapi guru agama te handak mambujur arepe. Ie misek, “Eweh ie oloh je koan Bapa te?”

³⁰Yesus tombah, “Aton ije biti oloh hatue mohon bara Yerusalem akan Yerikho. Hong benteng jalan ie iamok awi parampok, kare ramoe irampas, ie imukul satengah matei, palus ilihi oloh tanga-tangai hong jalan marak kakare himange.

³¹Aton ije biti imam mananjong kea intu jalan te. Katika ie mite oloh te, ie mahila akan silan jalan palus mananjong tarus.

³²Kalote kea dengan ije biti oloh Lewi je mananjong intu hete; katika ie mite oloh te, ie manokepe tuntang mananturee. Tapi ie mahin mahila akan saran jalan palus mananjong tinai.

³³ Tapi limbah te ije biti oloh Samaria je metoh huang jalanae, mahalau intu hete kea, katika ie mite oloh te, ateie inggerek awi asie.

³⁴Maka ie manokep oloh te palus marasih kare himange hapan anggor tuntang manatamba hapan minyak, limbah te mambabat kare himang te. Limbah te ie manggatang oloh te akan hunjun kalidaie kabuat, palus mimbite akan ije losmen tuntang mahagae.

³⁵Hong hanjewu andau ijee tinai ie manduan due kabawak duit perak tuntang manenga akan oloh je tempon losmen te hayak hamauh, ‘Haga ih ie, tuntang amon aton balanja beken tinai, kareh aku mambayare kea amon aku haluli akan hetoh.’ ”

³⁶Limbah te Yesus mahapus sarita te mahapan paisek toh, “Bara katatelo oloh te, je kueh manumon tirokm je masi dengan oloh je irampok te?”

³⁷Guru agama je buah isek te tombah, “Oloh je jari mandohop oloh te.” “Nah, lius, tuntang awi sama kilau te kea!” koan Yesus.

³⁸ Limbah te Yesus tuntang kare murid Ayue marajur panjalanae, palus sampai huang ije lewu. Intu hete ije biti oloh bawi bagare Marta marawei ie akan humae.

³⁹Marta te aton paharie bawi bagare Maria. Maria toh mondok tokep Tuhan Yesus mahining kare auh ajar Aie.

⁴⁰Tapi Marta deroh toto dengan gawin taloh humae. Ie manalih Yesus tuntang hamauh, “Tuhan, en Tuhan dia paduli Maria manalua aku bagawi kabuatku ih? Soho ie mandohop aku!”

⁴¹“Marta, Marta!” koan Tuhan tombah. “Ikau gaer tuntang deroh manirok taloh toh te;

⁴²padahal je mambatang baya ije. Tuntang Maria jari mintih je bahalap, je jaton tau induan bara ie.”