Read Ngaju LUKAS 12 Bible Online

LUKAS 12 - Ngaju bible

LUKAS 12

¹ Bakoya-koyan oloh hasengkel sampai aton je mahunje paie. Pandehan kare oloh hakarimpong, Yesus hamauh dengan kare murid Ayue, “Bua-buah keton manaharep ragin oloh Parisi, iete ampin ewen te je haliau.

² Jaton taloh je basahokan je kareh dia gitan, tuntang jaton taloh je basilim je kareh dia iungkar.

³Taloh je inyewut keton hong hamalem, kareh ihining hong andau balawa; tuntang taloh je imbisik keton hong pinding oloh huang kamar je batutup, kareh imbarita tayap jaton bara tikas.”

⁴“Keleh mingat, o keton kare sobat-Ku! Ela mikeh dengan ewen je mampatei biti tapi dia olih mawi labih bara te.

⁵Keleh Aku mansanan akan keton eweh je patut ingikeh awi keton. Keleh keton mikeh dengan Hatalla! Basa limbah mampatei, Ie kuasa kea manganan oloh akan naraka! Percaya ih, Ie te je musti ingikeh awi keton.

⁶Lime kongan burong ampit tau injual regae hapan due kabawak duit je paling korik. Aloh kalote, ije kongan mahin jaton ingalapean awi Hatalla.

⁷Balau hong takolokm mahin jari iise samandiaie, tagal te ela mikeh; keton labih haream regan keton bara kare burong ampit!”

⁸“Ingat bua-buah: Oloh je mangaku arepe hong bentok oloh je ie murid-Ku, ie kareh ingaku kea awi Anak Olon intu taharep kare malekat Hatalla.

⁹Tapi oloh je milim arepe intu bentok oloh, je ie murid-Ku, ie akan iilim kea awi Anak Olon intu taharep kare malekat Hatalla.

¹⁰ Amon oloh manyewut taloh en-en malawan Anak Olon, ie tau iampun; tapi amon ie mahina Roh Hatalla, ie dia olih iampun.

¹¹ Amon keton iimbit akan kare huma sombayang mangat inyidang intu taharep pamarentah atawa oloh je mimbing kuasa, ela mikeh tahiu kilen ampie keton musti mambela arep keton atawa tahiu taloh je musti ingotak keton.

¹²Basa taloh je musti ingotak keton te kareh iajar awi Roh Hatalla akan keton hong katikae.”

¹³Ije biti oloh bara kakare oloh te hamauh dengan Yesus, “Bapa Guru, coba Bapa manyoho paharingku manenga akangku bagin ramo ayungku je ilihi bapa ikei.”

¹⁴Yesus tombah, “Pahari, eweh je mangkat Aku manjadi hakim atawa manjadi tukang mambagi warisan akan keton due hampahari?”

¹⁵Limbah te dengan kakare oloh je aton hete Yesus hamauh, “Bua-buah tuntang rende-rendeng, ela sampai keton kamaha. Basa pambelom olon dia bahapang dengan panatau, aloh panatau te hatawon.”

¹⁶Palus Yesus manyarita paribasa toh, “Aton ije biti oloh tatau. Ie aton tempon petak je are mimbit hasil.

¹⁷Oloh tatau te nampara manirok huang ateie, ‘Jari jaton hindai ekaku mingkes hasil petakku. En akalku toh?’

¹⁸Limbah te ie manirok tinai tuntang hamauh dengan arepe kabuat, ‘Nah, aku aton akal; kare gudangku kareh inyohoku oloh mungkare palus aku mamangun je labih hai. Intu hete aku kareh mingkes kakare gandomku hayak dengan kare ramongku awang beken.

¹⁹Limbah te aku kareh hamauh dengan arepku kabuat, ikau toh batuah! Uras kare taloh bahalap jari ikau tempoe tuntang dia tau lepah sampai banyelo-nyelo. Toh keleh istirahat ih! Kuman belom tuntang keleh pamangat belaim dengan pambelom aim!’

²⁰Tapi Hatalla hamauh dengae, ‘O oloh humong! Alem toh kea ikau kareh matei, jadi eweh kea je tau mandino salepah panataum je jari inampunam akan arepm te?’

²¹Kalote kajariae akan gagenep oloh je satiar mawi arepe manjadi oloh tatau intu matan Hatalla.”

²²Palus Yesus hamauh dengan kare murid Ayue, “Jete sababe Aku hamauh, ‘Ela mikeh dengan pambelom keton, iete en taloh je akan indu kinan keton, atawa en taloh je akan ihapan keton.’

²³Pambelom toh labih hai bara panginan, tuntang biti labih hai bara pakaian.

²⁴Tampayah keton kare burong kak! Ewen jaton mimbul, jaton manggetem, tuntang jaton kea mingkes gudang atawa lepau. Tapi Hatalla mahaga ewen! Keton toh labih barega bara kare burong!

²⁵Eweh bara marak keton je awi kikehe olih mamanjang umure isut barangai?[19]

²⁶Amon hal je kakorik te bewei mahin dia olih keton malaluse, mbuhen keton mikeh tahiu hal je beken?

²⁷ Tampayah keton kilen ampie kare kambang bakung belom; kare kambang te dia bagawi, dia kea manjawet. Tapi Raja Salomo je kalote katataue mahin jaton mahapan pakaian je kahalape sama kilau ain kare kambang te!

²⁸Oru hong padang belom andau toh tuntang andau jewue tinai lepah inusol. Tapi Hatalla kalote ampie mambungas kare oru te. Mahin hindai keton! Tapi keton tapas kapercaya!

²⁹Jadi ela mikeh tuntang bembang tahiu taloh je akan indu kinan tuntang je akan ihop keton.

³⁰Kare hal je macam te inggoang awi kare oloh je dia mangasene Hatalla. Padahal Bapa keton katawan je keton perlu mahapan kare taloh samandiai te.

³¹Tapi keton musti manggau jalan uka Hatalla marentah pambelom keton, maka taloh awang beken te kareh inenga Hatalla kea akan keton.”

³²“Keton je baya isut kare bitin keton, ela mikeh! Basa Bapa keton manenga akan keton berkat bara pamarentahan Ayue.

³³Jual kare ramon keton tuntang tenga duite akan oloh je belom susah. Tampa akan arep keton dompet je dia tau usang, iete ramo je inyimpan hong sorga. Panatau jete dia tau nihau basa maling dia olih manduae tuntang gagat dia tau marusake.

³⁴Basa hong kueh panatau keton, intu hete kea atei keton!”

³⁵ “Rende-rendeng manaharep gagenep hal. Keton musti tatap hapakaian tuntang sumbon keton tetep inotong,

³⁶ sama kilau kare oloh je tatap mentai tempoe buli bara pesta kawin. Amon tempoe te haluli tuntang manegah bauntonggang, ewen kareh bajeleng muap bauntonggang.

³⁷Ontong toto akan kare jipen je inyondau metohe mentai hong katika tempoe dumah. Percaya bewei: tempoe te kareh batatap tuntang manyoho kare jipen te mondok, palus mandohop ewen.

³⁸Ontong toto kare jipen te amon tempoe sondau ewen batatap mentai, aloh ie dumah hong bentok alem atawa labih liwat bara te!

³⁹ Keleh mingat jetoh! Paribasae tuan huma katawan jam pire maling handak dumah, ie akan manjaga mangat maling dia tame akan huang humae.

⁴⁰Tagal te keton kea musti batatap basa Anak Olon kareh dumah hong katika je dia ingatawan keton.”

⁴¹“Tuhan en auh ajar te inintu Tuhan akan ikei atawa akan oloh samandiai?” koan Petrus.

⁴²Tuhan tombah, “Jipen je kueh je baketep tuntang je pintar-harati sampai iangkat awi tempoe manjadi kapala mahunjun kare jipen awang beken mangat ie mampakanan ewen hong katikae?

⁴³Batuah toto jipen te amon tempoe haluli sondau ie metohe malalus gawie!

⁴⁴Percaya bewei: Tuan te kareh manenga kapercaya akae mahaga kare ramoe.

⁴⁵Tapi amon jipen te hamauh huang ateie, ‘Tempongku magon tahi hindai harue dumah haluli,’ palus ie mawi kakare jipen beken tuntang kuman mihop sampai babusau,

⁴⁶maka tempoe kareh haluli hong andau tuntang jam je dia ie katawae. Tuntang jipen te kareh injara sakalepah belai[20] awi tempoe salepah belaie hayak iawie sama kapehee dengan oloh je dia mangasene Hatalla.

⁴⁷Jipen je katawan kahandak tempoe, tapi dia manatap arepe tuntang dia malalus kahandak tempoe, akan ihewes paham hapan cambuk.

⁴⁸Tapi jipen je dia katawan kahandak tempoe, limbah te malalus taloh je sala sampai ie musti ihewes hapan cambuk, akan ihewes lowa-lowah bewei. Basa oloh je akae jari inenga are, bara ie akan inuntut are kea. Tuntang oloh je jari are imercaya, bara ie kareh inuntut are kea.”

⁴⁹“Aku dumah uka mawi kare taloh uras bakeho hong hunjun petak toh. Bahalap toto amon apui te jari hanyala!

⁵⁰ Magon aton kapehe je paham je musti Aku mahalaue. Tuntang atei-Ku seke toto helo bara taloh te ilalus.

⁵¹En keton manyangka Aku dumah uka mimbit kadamai hong kalunen? Dia, jaton kadamai, tapi kalahi.

⁵²Nampara bara katika toh, oloh lime biti huang ije keluarga kareh hakalahi, telo malawan due atawa due malawan telo.

⁵³ Bapa oloh kareh malawan anake je hatue tuntang anake je hatue malawan bapae. Indue malawan anake je bawi tuntang anake je bawi malawan indue. Empoe je bawi kareh malawan manantue je bawi tuntang manantu bawi malawan empoe je bawi.”

⁵⁴Yesus hamauh kea dengan oloh are, “Amon keton mite baunandau lembut hong hila barat, keton balalu hamauh, ‘Andau handak ujan.’ Tuntang puna toto-toto ujan.

⁵⁵Amon keton mangkeme riwut dumah bara hila salatan, keton hamauh, ‘Andau handak mandang.’ Tuntang puna toto-toto mandang

⁵⁶Keton toh oloh je rajin pura-pura! Keton tau mangasene ampin andau awi mite keadaan intu langit tuntang hunjun petak. Mbuhen kare tanda jaman jetoh dia keton tau mangasenee?”

⁵⁷“Mbuhen keton dia mamutus kabuat taloh je bujur?

⁵⁸Amon aton oloh mangado keton akan pangadilan, saoli-olih gau jalan uka mahapus perkara te pandehan keton magon hong benteng jalan. Amon dia, ie kareh mimbit keton akan taharep hakim tuntang hakim te kareh manyarah keton akan polisi, tuntang polisi manamean keton akan penjara.

⁵⁹Percaya bewei! Keton dia tau balua bara penjara te helo bara keton mambayar punah danda ain keton.”