Read Ngaju LUKAS 13 Bible Online

LUKAS 13 - Ngaju bible

LUKAS 13

¹Hong katika te oloh manyarita akan Yesus tahiu pire-pire oloh Galilea je impatei Pilatus, metoh ewen kanjerae maluput parapahe akan Hatalla.

²Hapa manombah sarita te, Yesus hamauh, “Awi oloh Galilea te impatei kalote, keton mangira jete buktie ewen te labih badosa bara kakare oloh Galilea awang beken?

³Dia samasinde! Tapi keleh mingat: amon keton dia hobah bara kare dosan keton, keton handiai kareh matei kea, sama kilau ewen.

⁴Kilen ampie kea dengan hanyawalas oloh je matei hong Siloam, katika candi te manjato menyet ewen? Keton mangira jete mamparahan ewen te labih badosa bara kare oloh handiai awang beken je melai hong Yerusalem?

⁵Dia samasinde! Sinde tinai Aku hamauh: Amon keton dia hobah bara dosan keton, keton kareh uras matei kea sama kilau ewen.”

⁶Limbah te Yesus manyarita kare paribasa toh, “Aton ije biti oloh je tempon batang sikon hong kabon anggor. Sinde andau ie haguet manggau bua hong batang sikon te, tapi ije kabawak bua mahin jaton ie sondaue.

⁷Maka ie hamauh dengan tukang kabon, ‘Ite, jari telo nyelo aku dumah manggau bua sikon hong batang sikon toh, tapi ije kabawak bua mahin jaton aku sondaue. Teweng ih batang kayu toh! Ie baya mampalepah zat panginan bara petak!’

⁸Tapi tukang kabon te tombah, ‘Nauhe ie belom ije nyelo tinai, Tuan. Aku mancangkul petak hakalilinge tuntang mambowor pupuk.

⁹Mikeh ie kareh tau mamua nyelo rahian. Tapi amon dia, tau ih Tuan manyoho oloh manewenge.’ ”

¹⁰Sinde hong andau Sabat, Yesus majar hong ije huma sombayang.

¹¹Intu hete aton oloh bawi je jari hanyawalas nyelo haban, awi aton roh papa huang ie. Oloh bawi te hajongkong tuntang dia olih samasinde mendeng bujur.

¹²Katika mite ie, ie hamauh hai auhe dengae, “Ibu, ikau bebas bara panyakitm!”

¹³Palus Yesus mingkes lengen Aie hunjun oloh bawi te, tuntang hong katika te kea ie mendeng bujur palus manara Hatalla.

¹⁴ Kapala huma sombayang te balait, ganan Yesus mampakeleh oloh hong andau Sabat, tagal te ie hamauh dengan kare oloh, “Aton jahawen andau akan oloh mangat bagawi; keleh dumah hong kare andau te uka impakeleh, ela hong andau Sabat!”

¹⁵Tuhan tombah, “Keton toh haliau! Hong andau Sabat uras oloh maliwus sapi atawa kalidaie bara karambang tuntang mimbite balua mangat mampihope.

¹⁶Nah, hong hetoh aton ije biti oloh bawi turonan Abraham, je hanya walas nyelo katatahie injarat awi setan. En dia tau ie iliwus bara jarat te hong andau Sabat?”

¹⁷Auh tombah Yesus te mawi kare musoh Yesus mahamen toto; tapi kakare oloh awang beken uras hanjak mite kakare taloh heran je iawi Yesus.

¹⁸Yesus misek, “Amon Hatalla marentah, kilen ampie keadaae? Dengan en Aku tau manandinge?

¹⁹Keadaae te sama kilau paribasa toh. Ije kabawak sawi induan awi ije biti oloh palus iimbul hong kabon. Bawak sawi[21] te belom palus manjadi batang kayu, tuntang kare burong palus mawi sarangae intu kare edan kayu te.”

²⁰Sinde tinai Yesus misek, “Amon Hatalla marentah, hapan en Aku tau mananding ampin keadaae?

²¹Keadaae sama kilau ragi je induan awi ije biti oloh bawi palus ie mawoie dengan epat puluh liter tepong, sampai kamer urase.”

²²Hong benteng jalan akan Yerusalem, Yesus mahalau kare lewu tuntang kare kampong oloh sambil majar.

²³Palus aton oloh misek dengan Yesus, “Pa, en baya isut ih oloh je akan inyalamat?” Yesus tombah,

²⁴ “Keleh manggau jalan mangat tame mahalau bauntonggang je simit. Basa, ingat! Are oloh je manggau jalan tame tapi jaton olihe.

²⁵Hong katika tempon huma misik tuntang matep bauntonggange keton mendeng intu luar tuntang nampara manegah sambil hamauh, ‘Tuan, uap bauntonggang akan ikei!’ Tuan te akan tombah, ‘Aku dia katawan keton bara kueh!’

²⁶ Limbah te keton tombah, ‘Ikei jari kuman mihop dengan Tuan, tuntang Tuan kea jari majar intu kare jalan lewun ikei!’

²⁷ Tapi Tuan te hamauh tinai, ‘Aku dia katawan keton bara kueh. Dari bara hetoh, keton je manguan gawi papa!’

²⁸ Katika keton mite Abraham, Isaak tuntang Yakob dengan kakare nabi hanja-hanjak hong lewu taheta ain Hatalla, keton kareh manangis tuntang kapehe awi keton kabuat iharak balua!

²⁹Kare oloh kareh dumah bara hila timor tuntang hila barat, bara utara tuntang salatan, tuntang handak hanja-hanjak huang Lewu Taheta ain Hatalla.

³⁰ Puna toto, aton oloh je pangkarahiae kareh manjadi oloh je pangkaheloe, tuntang aton oloh je pangkaheloe je kareh manjadi oloh je pangkarahiae.”

³¹Hong katika te kea aton pire-pire oloh Parisi dumah manalih Yesus tuntang hamauh, “Ela melai intu hetoh! Talih akan eka beken, basa Herodes handak mampatei Ikau.”

³²Yesus tombah, “Lius ih sanan akan oloh je dia baguna te, ‘Andau toh tuntang andau jewu Aku maharak setan tuntang mampakeleh oloh haban tapi hong andau kateloe, Aku handak mahapus kare taloh gawing-Ku.’

³³Aloh kalote Aku musti marajur kea panjalanang-Ku andau toh, jewu atawa limbah jewu, basa dia bahalap ije biti nabi impatei intu luar Yerusalem.

³⁴Yerusalem, Yerusalem! Kare nabi impateim! Kare sarohan Hatalla imantingm hapan batu sampai matei! Jari pire tingkat Aku handak mamumpong kakare oloh lewum sama kilau manok pehok mangalindong kare anake hong penda palapase, tapi ikau dia maku!

³⁵ Tagal te Hatalla dia hindai mampahayak Ikau. Ingat, nampara bara katika toh Ikau kareh dia mite Aku tinai, sampai Ikau hamauh, ‘Imberkat Ie je dumah huang aran Tuhan.’ ”