Read Ngaju LUKAS 14 Bible Online

LUKAS 14 - Ngaju bible

LUKAS 14

¹Sinde hong andau Sabat Yesus haguet kuman intu human ije biti oloh Parisi je basewut. Intu hete oloh manantuani Yesus toto-toto.

²Maka dumah ije biti oloh je buah panyakit kembang pai-lengee manalih Yesus.

³Palus Yesus misek dengan kare guru agama tuntang kare oloh Parisi je aton hete, “Manumon hukum agaman itah, en tau itah mampakeleh oloh haban hong andau Sabat atawa dia?”

⁴Kare guru agama tuntang kare oloh Parisi te suni ih. Palus Yesus mantehau oloh haban te palus mampakeleh ie, limbah te manyoho ie haguet.

⁵ Limbah te Yesus hamauh dengan kare oloh, “Paribasae ije biti bara kare keton aton tempon ije biti anak atawa ije kongan sapi je manjato akan huang sumur hong andau Sabat, en diakah ie bajeleng manjijit mampalua anak te atawa sapi te huang andau te kea?”

⁶Tapi ije biti mahin jaton ewen olih tombah auh Yesus tahiu hal te.

⁷Yesus mite aton kare oloh maja je mintih kare eka je paling bahalap. Tagal te Ie manenga ajar toh akan ewen handiai.

⁸ “Amon keton irawei akan pesta kawin, ela dumah palus mondok hong karusi je paling tamam. Basa ela-ela oloh beken je labih tamam bara keton jari irawei kea,

⁹sampai tempon huma je jari marawei keton due te, tarapaksa manalih ikau tuntang hamauh, ‘Maap, eka toh jari inatap akan oloh te.’ Maka hayak angat mahamen toto ikau tarapaksa mondok hong eka je pangkalikute.

¹⁰Awi te amon keton irawei, keleh mintih eka je pangkalikute, mangat tempon huma kareh dumah tuntang hamauh dengam, ‘O le, ayo mondok hong eka je labih bahalap.’ Maka kalote kea keton ihormat intu taharep kakare oloh je irawei awang beken.

¹¹ Basa gagenep oloh je manggatang arepe akan imparandah, tapi je mamparandah arepe akan inggatang.”

¹²Palus koan Yesus dengan oloh tempon huma, “Amon ikau marawei oloh akan pesta kuman handau atawa hamalem, ela ikau marawei kawalm atawa paharim, atawa tundah kolam, atawa oloh tatau je hasansila humam. Basa kareh ewen akan marawei ikau kea, tuntang dengan kalote ikau manarima baleh tagal gawim.

¹³Jadi amon ikau mawi pesta, keleh marawei oloh je belom susah, oloh je cacat, oloh lumpuh tuntang oloh babute.

¹⁴Ikau kareh imberkat basa kare oloh te dia baka tau mambaleh kahalap gawim. Kahalap gawim kareh imbaleh awi Hatalla hong katika kare oloh bahalap impisik tinai bara pampatei.”

¹⁵Hong katika ije biti bara kare oloh je kuman haya-hayak hete mahining auh Yesus, ie hamauh, “Ontong toto oloh je kareh kuman hinje dengan Hatalla amon Ie dumah kilau Raja!”

¹⁶Tapi Yesus hamauh dengan oloh te, “Hong sinde katika, aton ije biti oloh mawi pesta hai tuntang marawei oloh are.

¹⁷Katika jari sampai katikae uka pesta inampara, oloh te manyoho jipee haguet manalih kare oloh je irawei tuntang hamauh, ‘Keleh dumah, kare taloh samandiai uras jari tatap!’

¹⁸Tapi kakare ewen te mije-mije uras balaku maap. Ije solake hamauh dengan jipen te, ‘Aku harungku mamili ije kalambar petak tuntang aku perlu haguet mariksae. Jadi maap ih aku’

¹⁹Ije beken tinai hamauh, ‘Aku harungku mamili lime pasang sapi, tuntang aku handak mancoba kare sapingku te. Maap ih aku.’

²⁰Ije beken tinai hamauh, ‘Aku harungku kawin, awi te aku dia tau dumah.’

²¹Jipen te buli tuntang mansanan hal te akan tempoe. Tempoe te balait toto, tuntang hamauh dengan jipee, ‘Jeleng ih haguet akan kare jalan tuntang akan kare tapakan lewu. Imbit akan hetoh kare oloh je belom susah, oloh cacat, oloh babute, tuntang oloh lumpuh.’

²²Limbah te jipen te hamauh, ‘Tuan, parentah Tuan jari ilalusku, tapi eka hetoh magon are.’

²³Palus Tuan te hamauh, ‘Ayo, talih akan kare jalan hai tuntang kare serok lewu, tuntang soho kare oloh dumah mangat humangku kontep.

²⁴Ingat! Ije biti mahin jaton bara kare oloh je jari irawei te kareh mangkeme kamangat panginan hong pesta ayungku toh!’ ”

²⁵Are oloh omba mananjong mampahayak Yesus. Yesus tampaliau tuntang hamauh dengan ewen,

²⁶ “Amon oloh dumah manalih Aku, tapi labih sinta indue, bapae, sawae, anak jariae, kare paharie, malahan arepe kabuat, oloh te dia tau manjadi murid-Ku.

²⁷ Oloh je dia handak mananggong sampalakie tuntang omba Aku, dia tau manjadi murid-Ku.

²⁸Amon ije biti bara keton handak mamangun ije candi, ie musti mondok helo mareken kare ongkose mangat ie katawan en duite sukup atawa dia, hapan mampajadi candi te.

²⁹Basa kareh amon gitan ampie ie dia tau mampajadie, padahal pondasie jari inampa, maka kakare oloh je mite gawi te kareh manatawee.

³⁰Ewen kareh hamauh, ‘Ceh, oloh te mamangun, tapi dia tau mampajadie!’

³¹Amon ije biti raja je tempon sapuluh koyan tantara handak parang malawan raja beken je tempon duepuluh koyan tantara, batantu raja te mondok manimbang helo huang ateie en ie sukup kaabase hapae malawan musohe te.

³²Amon ie katawan ie te tapas kaabase, batantu metoh musohe te magon kejau, ie kareh mangirim sarohae mangat balaku badamai ih.”

³³Kajariae Yesus hamauh, “Kalote kea dengan keton. Jaton ije biti bara keton tau manjadi murid-Ku, amon ie jaton mangorban taloh samandiai.”

³⁴“Uyah te bahalap, tapi amon uyah te batawah, en tau ie ingahing tinai?

³⁵Jaton gunae hindai, akan tana dia baguna akan pupuk mahin dia. Baya inganan bewei. Amon aton pinding keleh mahining!”