Read Ngaju LUKAS 15 Bible Online

LUKAS 15 - Ngaju bible

LUKAS 15

¹ Hong sinde andau, are panagih pajak tuntang kare oloh je inyewut oloh dia bahalap, dumah mahining Yesus.

²Kare oloh Parisi tuntang kare guru agama manampara bakotok. Ewen hamauh, “Ceh, oloh toh manarima kare oloh je dia bahalap tuntang malahan kuman hinje ewen!”

³Tagal te Yesus manyarita akan ewen paribasa toh.

⁴“Paribasae ije biti bara keton aton tempon saratus kongan tabiri, balalu nihau ije kongan — en taloh je handak iawie? Pasti ie kareh malihi tabiri je jalatien puluh jalatien kongan te hong padang oru tuntang haguet manggau je nihau te sampai dinon.

⁵Tuntang amon ie sondau tinai tabiri te, ie paham hanjak sampai tabiri te ietoe hunjun bahae,

⁶palus mimbite buli. Limbah te ie mantehau kare kawale tuntang kare oloh hasansila humae, tuntang hamauh, ‘Has itah hanja-hanjak. Tabiringku je layang jari sondau haluli!’

⁷Nah, kalote kea hong sorga aton kahanjak je labih hai tagal ije biti oloh badosa je hobah bara tagal jalatien puluh jalatien biti oloh je jari bahalap tuntang dia perlu hobah.”

⁸“Atawa, paribasa ije biti oloh bawi aton mingkes sapuluh duit perak balalu nihau ije — en taloh je handak iawie? Ie kareh manotong sumboe tuntang mamapas humae sampai ie sondau duit te.

⁹Katika ie sondau duit te, ie mantehau kare kawale tuntang kare oloh hasansila humae, palus hamauh, ‘Aku hanjak toto jari sondau haluli duitku je nihau. Has itah hanja-hanjak!’

¹⁰Kalote kea malekat Hatalla hanjak amon aton ije biti oloh papa hobah bara kare dosae. Percaya bewei!”

¹¹Yesus hamauh tinai, “Aton ije biti bapa je tempon due biti anak hatue.

¹²Je busu hamauh dengae, ‘Bapa, tenga akangku metoh toh panatau itah je akan bagin aingku.’ Maka bapae mambagi panataue te akan kadadue anak te.

¹³Pire-pire andau limbah te anak busu te manjual warisan je bagin aie te palus haguet akan eka je kejau. Hong hete ie maroyal kare duite hapae belom rami-rami.

¹⁴Katika duite lepah-lingis, maka hong lewu te aton lembut lau je paham, sampai ie nampara susah belom.

¹⁵Palus ie haguet bagawi akan ije biti oloh hong lewu te, tuntang oloh te manyoho ie akan tana manjaga bawoie.

¹⁶Ganan ie paham balau, mipen toto angate handak manyuang kanaie hapan panginan bawoi te. Aloh kalote, ije biti mahin jaton oloh manenga panginan akae.

¹⁷Kajariae ie taraingat tuntang hamauh, ‘Kare oloh je bagawi dengan bapaku are toto taloh kinae, tapi aku hetoh handak matei balau!

¹⁸Aku handak haguet manalih bapaku ih, tuntang hamauh dengae: Bapa, aku jari badosa intu taharep Hatalla tuntang taharep Bapa.

¹⁹Dia patut tinai aku inyewut anak bapa. Sewut ih aku oloh panggawi ain bapa.’

²⁰Maka ie haguet buli manalih bapae. Magon kejau bara huma, bapae jari mite ie. Hayak dengan kataharue bapae hadari manyondau ie, palus mamalok tuntang manyium ie.

²¹‘Bapa’, koan anak te, ‘aku jari badosa intu taharep Hatalla tuntang taharep bapa. Dia patut hindai aku inyewut anak bapa.’

²²Tapi bapae mantehau kare anak oloh tuntang hamauh, ‘Jeleng! duan pakaian je paling bahalap, tuntang kepan intu ie. Kepan tisin intu tunjoke, tuntang sapatu intu paie.

²³Limbah te duan anak sapi je paling baseput palus nyambalih! Itah handak kuman tuntang hanja-hanjak.

²⁴Basa anakku toh jari matei, toh belom tinai; ie jari layang, toh sondau haluli.’ Palus ewen nampara pesta.

²⁵Pandehan te anak je bakas aton hong tana. Metoh ie buli tuntang sampai hong tokep huma, ie mahining auh musik tuntang oloh manari.

²⁶Ie mantehau ije bara kare jipee, palus misek, ‘En awi oloh hong huma?’

²⁷Jipen te tombah, ‘Andi Tuan jari dumah haluli! Tuntang bapa Tuan jari manyoho manyambalih sapi tabela je baseput, basa ie jari dinon haluli anake je dumah dengan salamat!’

²⁸Anak je bakas te sangit toto sampai ie dia maku tame huma. Palus bapae balua tuntang mangatau ie tame.

²⁹Tapi ie hamauh, ‘Banyelo-nyelo katahie aku bagawi mate-matei akan bapa. Dia puji aku malawan parentah bapa. Tuntang en je inenga bapa akangku? Ije kongan kambing mahin hindai puji bapa manenga akangku hapaku pesta dengan kare kawalku!

³⁰Anak bapa te jari mampalepah panatau bapa dengan bawin lontei, tapi sana ie haluli, bapa manyambalih sapi tabela je baseput akae!’

³¹‘O anakku,’ koan bapae tombah, ‘ikau harajur aton hetoh hinje aku. Kakare taloh je ayungku jete ayum kea.

³²Tapi itah musti pesta tuntang hanjak, basa andim te jari matei, tapi toh belom tinai; ie jari layang, tapi toh jari sondau haluli.’ ”