Read Ngaju LUKAS 16 Bible Online

LUKAS 16 - Ngaju bible

LUKAS 16

¹Yesus hamauh dengan kare murid Ayue, “Aton ije biti oloh tatau. Ie aton tempon ije pagawai keuangan je maurus panataue. Oloh tatau te mandino laporan tahiu kapala pagawai keuangan ayue te je maroyal duite.

²Jadi ie mantehau kapala keuangan te tuntang hamauh, ‘En toh taloh je ihiningku tahiu ikau? Toh sarah lepah akangku laporan tahiu gawim maurus panatauku. Ikau dia tau manjadi pagawai keuangan ayungku.’

³Maka pagawai te manirok, ‘En je musti iawiku toh? Tuan ayungku toh handak mampaterai aku. Mancangkul, jaton kaabasku; manyadakah, aku mahamen.

⁴Aton akalku; amon aku jari impaterai, aku musti mahaga are kawalku je maku manarima aku hong human ewen!’

⁵Jadi pagawai keuangan te mantehau gagenep oloh je butang dengan tuan ayue te. Akan je solake, ie hamauh, ‘Pire utangm dengan tuan ayungku?’

⁶Oloh te tombah, ‘Saratus balanai undus.’ Pagawai te hamauh dengae, ‘Toh surat utangm. Mondok tuntang nyurat bajeleng: lime puluh.’

⁷Limbah te ie hamauh dengan je kaduee, ‘En pahari, pire utangm?’ Oloh te tombah, ‘Sakoyan karung gandom.’ Pagawai keuangan te hamauh dengae, ‘Toh surat utangm. Surat: hanya ratus.’

⁸Maka majikan te manara pagawai keuangan je dia jujur te tagal gawie je pintar te; basa oloh kalunen toh labih pintar mator kare urusan ewen bara kare oloh je belom hong kalawa.”

⁹Palus Yesus hakotak tinai, koae, “Hining toh! Keleh mahapan panatau kalunen toh mangat mandino kawal, uka amon panatau kalunen toh jari dia barega hindai, keton kareh inarima hong eka je katatahie.

¹⁰Oloh je tau imercaya huang kare taloh je korik, tau imercaya kea huang taloh je hai. Tapi oloh je dia olih imercaya huang kare taloh korik, dia olih kea imercaya huang kare taloh hai.

¹¹Jadi, amon tahiu panatau kalunen toh keton dia olih imercaya, eweh je maku manenga kapercaya akan keton tahiu panatau roh?

¹²Tuntang amon tahiu taloh je ain oloh beken, gitan batantu keton dia tau imercaya, eweh tau manenga akan keton taloh je puna ain keton?

¹³ Jaton ije biti oloh tau bagawi akan due tuan; basa ie kareh labih sinta dengan ije bara dengan je beken, atawa ie kareh labih heret dengan ije bara dengan je beken. Kalote kea dengan keton. Keton dia tau bagawi akan Hatalla tuntang akan ramon panatau kea.”

¹⁴Kare oloh Parisi mahining taloh samandiai je ingotak Yesus. Palus ewen manatawe Ie, basa ewen te rajin dengan duit.

¹⁵Tapi Yesus hamauh dengan ewen, “Keton toh oloh je bujur ampie intu taharep oloh beken, tapi Hatalla katawan taloh je huang atei keton. Basa taloh je inampayah gantong awi olon, inampayah randah awi Hatalla.

¹⁶ Hukum je inenga Moses tuntang auh ajar kare nabi, tetep ihapan sampai Yohanes Pampandoi. Bara katika te Barita Bahalap tahiu kilen ampie Hatalla marentah kilau raja tarus insanan. Tuntang oloh hajajuan arepe manjadi anak ungkup ain Hatalla.

¹⁷ Tapi labih gampang akan langit tuntang petak toh nihau bara ije hurup huang Hukum ain Hatalla imbalang.

¹⁸ Eweh je manganan sawae palus kawin dengan oloh bawi beken, oloh te habandong. Tuntang oloh je kawin dengan oloh bawi beken je jari inganan, ie habandong kea.”

¹⁹“Aton ije biti oloh tatau. Pakaiae te lara-larang, tuntang pambelome sanang-mangat genep andau.

²⁰Hong bauntonggang humae aton insahan ije biti oloh belom susah je arae Lasarus. Bitie kontep awi buhit.

²¹Ie mipen handak manyuang kanaie hapan kare tisan panginan je manjato bara mejan oloh tatau te. Aso mahin aton dumah manjelap buhite.

²²Limbah te oloh je belom susah te matei palus iimbit awi malekat akan eka ije paham ihormat hila balikat Abraham hong sorga. Oloh tatau te matei kea tuntang ingubur.

²³Hong lewun oloh matei ie paham kapehee. Tuntang hong katika ie manampayah bara hete akan hunjun, ie mite Abraham intu eka je kejau tuntang Lasarus aton hila balikat Abraham.

²⁴‘Bapa Abraham!’ koan oloh te mantehau. ‘Pasi aku toh. Soho Lasarus manculop tunjoke akan huang danum palus manalih hetoh mambisa jelangku. Aku kapehe toto huang apui toh!’

²⁵Tapi Abraham tombah, ‘Ingat anakku: katahin ikau belom ikau jari mandino taloh handiai je bahala-halap, tapi Lasarus mandino taloh je eka kajilek. Toh ie sanang hong hetoh, tuntang ikau kapehe.

²⁶Beken bara te, intu helat itah toh jari inampa tiwing je hai, uka oloh bara hetoh dia tau akan hikau tuntang oloh bara hikau dia tau akan hetoh!’

²⁷‘Amon kalote, Pa,’ koan oloh tatau te, ‘aku balaku nyame-nyame mangat bapa manyoho Lasarus akan human bapaku.

²⁸Hete aton lime paharingku. Nyoho Lasarus mampingat ewen, mangat ewen mahin ela sampai manjato akan eka kapehe toh.’

²⁹Abraham tombah, ‘Intu ewen jari aton kare surat ain Moses tuntang surat ain kare nabi! Nauhe ih ewen manumon kare auh je tarasurat huang surat te!’

³⁰Tapi oloh tatau te tombah, ‘Jete dia sukup Pa Abraham. Tapi jaka aton oloh matei belom haluli tuntang dumah manalih ewen, ewen akan hobah bara kare dosan ewen.’

³¹Tapi Abraham hamauh, ‘Amon ewen dia paduli parentah Moses tuntang kare nabi, pasti ewen dia baka percaya kea, aloh aton oloh matei belom haluli.’ ”