Read Ngaju LUKAS 17 Bible Online

LUKAS 17 - Ngaju bible

LUKAS 17

¹Yesus hamauh dengan kare murid Ayue, “Kare taloh je manampa sabab oloh mawi dosa pasti aton. Tapi calaka oloh je mawi sabab te!

²Labih bahalap amon bindang batu hai injarat intu uyate, palus ie impaleteng akan huang tasik bara ie mawi sabab sampai ije biti bara kare oloh je korik toh mawi dosa.

³ Tagal te keleh barendeng! Amon paharim mawi dosa, tingak ie. Amon ie manyasal, ampun ih ie.

⁴Amon ie badosa dengam hangka uju jandau tuntang genep tingkat ie dumah manalih ikau tuntang hamauh, ‘Aku balaku maap,’ ampun ih ie.”

⁵Kare rasul hamauh dengan Tuhan Yesus, “Tuhan, paabas kapercayan ikei.”

⁶Tuhan tombah, “Amon huang keton aton kapercaya kahain bawak sawi, keton tau hamauh dengan batang sikon toh, ‘Pajawut ikau tuntang belom ih hong tasik,’ pasti batang kayu te kareh manumon parentahm.”

⁷“Paribasae ije biti bara keton aton tempon jipen je manaja hong tana atawa manyakatik tabiri. Amon jipen te buli, en ie hamauh dengae, ‘Ayo jeleng kuman’?

⁸Pasti dia! Malahan ie kareh hamauh dengae, ‘Natap panginan akangku. Kepan pakaian je barasih tuntang entai aku pandehan aku kuman mihop; limbah te harun ikau tau kuman.’

⁹Jipen te dia perlu inara karana ie jari mamenda parentah tempoe, kan?

¹⁰Kalote kea keton. Amon keton jari malalus kare taloh handiai je irentah akan keton, keleh keton hamauh, ‘Ikei toh baya jipen bewei, ikei baya malalus kapatut gawin ikei.’ ”

¹¹Huang panjalanae akan Yerusalem, Yesus mahalau helat due daerah, Samaria tuntang Galilea.

¹²Metoh Ie tame ije lewu, Ie inalih awi sapuluh oloh je buah panyakit kulit je bakaike-ikeh ampie.[22] Ewen mendeng bara kejau

¹³tuntang mangkariak, “Yesus! Tuan! pasi ikei toh!”

¹⁴ Katika Yesus mite ewen, Ie hamauh, “Lius talih kare imam, laku mangat ewen mariksa bitin keton.” Metoh ewen mananjong, salenga nihau panyakit ewen. [23]

¹⁵Ije bara ewen te, sana ie mangatawan arepe keleh, ie haluli sambil basasurak manara Hatalla.

¹⁶Intu taharep Yesus ie palus sontop manyembah tuntang manyewut tarimakasih akae. Oloh te oloh Samaria.

¹⁷Limbah te tinai Yesus hamauh, “En dia sapuluh biti oloh je jari aton impakeleh? Hong kueh ewen jalatien te tinai?

¹⁸Mbuhen salenga oloh luar toh ih je haluli manyewut tarimakasih akan Hatalla?”

¹⁹Palus Yesus hamauh dengan oloh te, “Hingkat, tuntang lius. Awi ikau percaya dengang-Ku, maka ikau keleh.”

²⁰Pire-pire oloh Parisi misek dengan Yesus hamparea Hatalla dumah uka marentah. Yesus tombah, “Pamarentah ain Hatalla dia nampara mahapan kare tanda je tau gitan oloh,

²¹sampai oloh tau hamauh, ‘Ayo ite hetoh, toh ie!’ atawa, ‘Hong kanih ie!’ Basa Hatalla jari nampara marentah hong bentok keton.”[24]

²²Limbah te Yesus hamauh dengan kare murid Ayue, “Katikae kareh sampai keton handak mite ije andau barangai bara kare andau ain Anak Olon, tapi keton dia tau mitee.

²³Kare oloh kareh hamauh dengan keton, ‘Ite, hikau!’ atawa, ‘Ite, intu hetoh!’ Tapi ela ih keton balua manggaue.

²⁴Sama kilau kilat mamancar bara langit, tuntang balawa bara saran silae akan saran silae, kalote kea kareh ampin Anak Olon hong andau Ayue.

²⁵Tapi sola-solake ie musti buah are kapehe tuntang dia inarima awi kare oloh jaman jetoh.

²⁶ Hong andau Anak Olon kareh ingarinah, ampie te sama kilau hong jaman Noah horan.

²⁷ Oloh kuman mihop, tuntang kawin; kalote raju-rajur sampai Noah tame akan huang banama tuntang danum soho dumah hayak mampatei kare oloh te samandiai.

²⁸ Kea sama kilau hong jaman Lot. Oloh kuman mihop, hajual-habili, malan mawi tana tuntang mamangun huma.

²⁹Tapi katika Lot balua bara Sodom, hong andau te apui tuntang barirang mohon bara langit tuntang mambinasa ewen samandiai.

³⁰Kalote ampie kareh hong andau Anak Olon ingarinah.

³¹ Hong andau te oloh je jari aton intu hunjun sapau humae ela mohon mado manduan kare ramo je huang huma. Kalote kea oloh je metoh hong tana ela haluli akan humae.

³² Ingat taloh je jari manjadi dengan sawan Lot!

³³ Oloh je satiar handak manyalamat pambelome, kareh nihau pambelome. Tapi oloh je nihau pambelome kareh manyalamat pambelome.

³⁴Percaya bewei: Hong alem te, due biti oloh je metohe batiroh intu ije ranjang, ije kareh iimbit tuntang ije tinai ilihi.

³⁵Due biti oloh bawi metohe manggiling gandom, ije akan iimbit tuntang ije tinai ilihi. [

³⁶Due biti oloh metohe bagawi hong tana, ije akan induan tuntang ije tinai ilihi.]”

³⁷Kare murid Yesus misek, “Hong kueh hal te akan manjadi Tuhan?” Yesus tombah, “Hong kueh aton hantu, intu hete aton burong je kuman hantu.”