Read Ngaju LUKAS 18 Bible Online

LUKAS 18 - Ngaju bible

LUKAS 18

¹Limbah te Yesus manyarita ije paribasa hapan majar kare murid Ayue uka ewen harajur balakudoa tuntang ela nihau kaharape.

²Yesus hamauh, “Hong ije lewu aton ije hakim je dia mikeh dengan Hatalla, tuntang ie dia paduli eweh bewei.

³Hong lewu te kea aton ije biti oloh bawi balo je manyambulang manalih hakim te balaku mangat perkarae imbela. ‘Dohop ih aku manaharep musohku,’ koan balo te.

⁴Pire-pire katahie hakim te dia maku mandohop balo te. Tapi kajariae hakim te manirok, ‘Aloh aku dia mikeh dengan Hatalla, tuntang dia paduli dengan eweh bewei,

⁵tapi awi balo toh harajur manderoh aku, labih bahalap aku mambela perkarae te. Amon dia, ie kareh raju-rajur dumah tuntang manyusah aku.’ ”

⁶Palus Tuhan hamauh, “Keleh keton mite taloh je insanan awi hakim je dia bujur te!

⁷Nah, en Hatalla dia handak mambela perkara ain ungkupe kabuat je mantehau Ie handau hamalem? En Ie handak malumba-lumbar katikae uka mandohop ewen?

⁸Percaya bewei: ie kareh bajeleng mandohop huang perkaran ewen! Tapi amon Anak Olon dumah, en magon aton Ie sondau oloh je percaya Dengae hong hunjun petak?”

⁹Yesus manyarita kea paribasa toh je inintu Awie akan oloh je manampayah oloh beken randah, tapi percaya arepe kabuat labih bahalap.

¹⁰Koan Yesus, “Aton due biti oloh haguet akan Human Tuhan mangat balakudoa. Ije biti te oloh Parisi, tuntang je beken te panagih pajak.

¹¹Oloh Parisi te mendeng mangabuat tuntang balakudoa,[25] ‘O Hatalla, aku manyewut tarimakasih Akam, basa aku dia sama kilau oloh beken, je babungo, tulas, atawa pahabandong. Aku manarima kasih awi aku dia sama kilau panagih pajak te.

¹²Aku puasa handue ije minggo, tuntang aku manyarah Akam sapersapuluh bara kakare hasil je dinongku.’

¹³Tapi panagih pajak te mendeng bara kakejau tuntang ie malahan jaton bahanyi mananggera akan langit. Sambil mamarut usoke ie hamauh, ‘O Hatalla, pasi aku oloh badosa toh!’ ”

¹⁴ “Percaya bewei,” koan Yesus, “katika buli huma, maka panagih pajak te ih je inarima Hatalla tapi oloh Parisi te dia inarima. Basa gagenep oloh je manggatang arepe akan imparandah; tuntang gagenep oloh je mamparandah arepe akan inggatang.”

¹⁵Aton kare oloh mimbit are anak korik manalih Yesus mangat ie mimbing tuntang mamberkat ewen. Katika kare murid Yesus mitee, ewen malait kare oloh te.

¹⁶Tapi Yesus mantehau kare anak te palus hamauh dengan kare murid Ayue, “Nauhe ih kare anak korik te manalih Aku! Ela mangahana ewen, basa oloh je sama kilau toh je manjadi anak ungkup ain Hatalla.

¹⁷Ingat! Oloh je dia manaharep Hatalla sama kilau ije biti anak korik, kareh dia tau manjadi ungkup ain Hatalla.”

¹⁸Ije biti pamimpin Yehudi misek dengan Yesus, “Pa Guru je bahalap, aku musti malalus en mangat tau manarima pambelom je bujur tuntang katatahie?”

¹⁹“Mbuhen ikau manyewut Aku bahalap?” koan Yesus misek ie. “Dia aton oloh je bahalap, beken bara Hatalla kabuat.

²⁰ Ikau jari katawan kare parentah Hatalla: ‘Ela habandong, ela mampatei olon, ela manakau, ela mananjaro, tuntang hormat bapam tuntang indum.’ ”

²¹“Uras kare parentah te jari inumongku bara tabela,” koan oloh te tombah.

²²Mahining auh te Yesus hamauh, “Magon aton ije hal je musti ikau malaluse: Jual kakare ramom, tenga duite akan kare oloh je belom susah, tuntang ikau kareh mandino ramo hong sorga. Limbah te ikau dumah omba Aku.”

²³Tapi katika oloh te mahining te, ie kapehe ateie awi ie tatau toto.

²⁴Yesus katawan oloh te kapehe ateie. Tagal te ie hamauh, “Bahali toto akan oloh tatau manjadi anak ungkup ain Hatalla!

²⁵Labih gampang ije kongan onta tame rumbak pilus, bara ije biti oloh tatau tame Lewu Taheta ain Hatalla.”

²⁶Kare oloh je mahining Yesus hamauh kalote, misek, “Amon kalote, eweh je tau salamat?”

²⁷Yesus tombah, “Taloh je dia tau akan olon, tau akan Hatalla!”

²⁸Palus Petrus hamauh, “Ite ih! Ikei jari malihi huma serok ikei mangat omba Bapa.”

²⁹“Percaya bewei!” koan Yesus. “Oloh je jari malihi humae atawa kabalie, atawa paharie atawa indu bapae atawa anak jariae awie sinta Hatalla,

³⁰oloh te kareh mandino baleh balipe-lipet hong wayah jetoh, tuntang hong wayah je akan dumah akae kareh inenga pambelom je bujur tuntang katatahie.”

³¹Yesus mamumpong duewalas murid Ayue mangabuat dengan ewen ih, palus hamauh, “Hining toh! Itah metoh toh manalih Yerusalem. Hong hete kakare taloh je inyurat kare nabi tahiu Anak Olon, kareh manjadi.

³²Ie kareh inyarah akan kare oloh je dia Yehudi, je kareh halalea, mahina, tuntang maluja Ie.

³³Ewen kareh mangapehe tuntang mampatei Ie, tapi hong andau je kateloe Ie kareh misik.”

³⁴Kare murid Yesus jaton harati taloh samandiai te. Riman kare auh Aie te inyahokan bara ewen. Ewen jaton katawan, tahiu en Ie hakotak.

³⁵Katika Yesus handak sampai hong Yerikho, ije biti oloh babute metoh mondok manyadakah intu saran jalan.

³⁶Katika ie mahining oloh are te mahalau, ie misek, “En toh?”

³⁷“Yesus, oloh Nasaret te, mahalau,” koan ewen dengae.

³⁸Maka oloh babute te mangkariak, “Yesus, anak Dawid! Pasi aku toh!”

³⁹Kare oloh je hila baun, malait tuntang manyoho ie suni. Tapi ie mangkariak labih hai hindai, “Anak Dawid! Pasi ah aku toh!”

⁴⁰Yesus tende tuntang manyoho mimbit oloh babute te manalih Ie. Katika ie sampai, Yesus misek,

⁴¹“En taloh je ingahandakm uka Aku mawie akam?” “Tuan,” koan oloh te tombah, “aku handak mite.”

⁴²Palus Yesus hamauh, “Amon kalote, ite ih! Awi ikau percaya dengang-Ku, ikau keleh.”

⁴³Hemben te kea ie tau mite, palus ie omba Yesus sambil manyewut tarimakasih akan Hatalla. Katika oloh are te mite hal te, ewen uras manara Hatalla.