Read Ngaju LUKAS 19 Bible Online

LUKAS 19 - Ngaju bible

LUKAS 19

¹Katika Yesus sampai hong Yerikho, Ie mananjong palus mahoroi lewu te.

²Hong lewu te aton ije biti kapala panagih pajak je tatau, arae Sakeus.

³Ie mipen mite Yesus te, tapi awi oloh lalau are tuntang ie kabuat bitie pandak, maka ie dia olih mite Yesus.

⁴Jadi, ie hadari mananselo kare oloh, palus mandai ije batang kayu, mangat olih mite Yesus je dia tahi hindai handak mahalau eka te.

⁵Katika Yesus sampai intu eka batang kayu te, ie manampayah akan hunjun palus hamauh, “Sakeus, mohon bajeleng! Basa aku musti maja humam andau toh.”

⁶Sakeus kaje-kajeng mohon tuntang manambang Yesus dengan kahanjake.

⁷Kakare oloh je mite hal te nampara bakotok. Ewen hamauh, “Ceh! Ie haguet maja akan human oloh je dia bahalap!”

⁸Limbah te tinai, intu humae, Sakeus mendeng tuntang hamauh dengan Yesus, “Tuhan, satengah bara ramongku handak inyadakahku akan oloh je belom susah; tuntang eweh bewei je puji aku mamikire kareh imbayarku akae lipet epat karee!”

⁹Balalu koan Yesus, “Hong andau toh, ikau tuntang hapus keluargam inyalamat awi Hatalla tuntang inenga pambelom je taheta awi ikau kea bara turonan Abraham.

¹⁰ Anak Olon dumah uka manggau tuntang manyalamat oloh je layang.”

¹¹ Pandehan oloh magon mahining Yesus hakotak, Ie manyarita ije paribasa. Awi metoh te Ie jari tokep Yerusalem, tuntang oloh manyangka Hatalla bajeleng akan marentah kilau Raja hong kalunen.

¹²Yesus hamauh, “Aton ije biti oloh bangsawan je haguet akan lewu kejau uka iangkat manjadi raja, limbah te ie buli.

¹³Helo bara haguet, ie mantehau sapuluh jipee, palus manenga akan ewen genep bitie ije kabawak duit amas. ‘Keleh keton badagang hapan duit toh katahin aku haguet,’ koae dengan ewen.

¹⁴Tapi oloh lewun aie te dia rajin dengae. Jadi, limbah ie haguet, ewen mangirim utusan uka mansanan, ‘Ikei dia maku oloh toh manjadi rajan ikei.’

¹⁵Tapi bangsawan te iangkat manjadi raja, limbah te ie buli akan lewue. Bajeleng ie mantehau kare jipee manaharep ie, uka mangatawan kare ontong je jari dinon ewen.

¹⁶Jipen ije solake dumah tuntang hamauh, ‘Tuan, ije kabawak duit amas je inenga tuan te, jari iawiku manjadi sapuluh kabawak.’

¹⁷‘Buah te,’ koan tuan te, ‘ikau jipen je bahalap! Awi huang kare hal je korik ikau tau imercaya, maka aku handak mangkat ikau manjadi oloh je manguasa sapuluh lewu.’

¹⁸Jipen je kaduee dumah tuntang hamauh, ‘Tuan, ije duit amas je inenga tuan te, jari inyatiarku manjadi lime.’

¹⁹Dengan jipen te raja hamauh, ‘Ikau kareh manjadi oloh je manguasa lime lewu.’

²⁰Jipen je beken dumah tuntang hamauh, ‘Tuan, toh duit tuan; aku mingkese huang saputangan.

²¹Aku mikeh dengan Tuan, basa Tuan oloh je karas. Tuan manduan taloh je dia Tuan tempoe, tuntang Tuan manduan hasil hong eka je dia Tuan mimbule.’

²²Raja te hamauh dengae, ‘Ikau jipen je papa! Tagal kare auhm kabuat aku mahukum ikau. Ikau katawan aku oloh je karas: aku manduan taloh je dia aku tempoe tuntang mandino hasil je aku dia mimbule.

²³Amon kalote mbuhen ikau dia manamean duit te akan bank mangat amon aku haluli aku tau manarima duit te dengan anake?’

²⁴Limbah te tinai raja te hamauh dengan kare oloh je mendeng hete, ‘Duan duit te bara ie tuntang tenga akan jipen je tempon sapuluh duit amas te.’

²⁵Tapi kare oloh te hamauh, ‘Tuan, ayue jari aton sapuluh.’

²⁶ Raja te tombah, ‘Ingat: oloh je ayue jari aton, akae kareh inenga labih are hindai. Tapi oloh je jaton tempon taloh en-en, taloh je aton huang ie kareh mahin induan tinai bara ie.

²⁷Tuntang toh, imbit ih akan hetoh kare musohku te je dia maku aku manjadi rajan ewen. Patei ewen te samandiai intu taharepku!’ ”

²⁸Limbah Yesus mansanan taloh samandiai te, Ie mananjong hila baun ewen manalih Yerusalem.

²⁹Katika sampai tokep Betpage tuntang Betania hong Bukit Saiton, Ie manyoho due biti murid Ayue haguet helo.

³⁰“Haguet ih akan lewu je hila baun itah te,” koan Yesus dengan ewen, “amon keton sampai hete, keton kareh mite ije kongan anak kalidai injarat. Kalidai te hindai puji oloh manongkange. Paliwus kalidai te tuntang imbit akan hetoh.

³¹Amon oloh misek keton, ‘Mbuhen keton maliwus kalidai te?’ sanan, ‘Tuhan[26] handak mahapae.’ ”

³²Kadadue murid Yesus te haguet tuntang sondau taloh handiai te pas sama kilau je insanae te.

³³Pandehan ewen maliwus anak kalidai te, tempoe hamauh dengan ewen, “Mbuhen keton maliwus kalidai te?”

³⁴Ewen tombah, “Tuhan handak mahapae.”

³⁵Palus ewen mimbit anak kalidai te akan Yesus. Limbah te tinai ewen mambirang jubah ewen hong hunjun kalidai te tuntang mandohop Yesus lumpat akan hunjue.

³⁶Metoh ie mahalau sambil manongkang kalidai te, kare oloh mambirang jubahe hong jalan.

³⁷Katika Yesus handak sampai Yerusalem, intu jalan je mohon Bukit Saiton, maka murid Ayue je are te uras nampara hamauh hai auhe manara Hatalla tuntang manyewut tarimakasih Akae tagal kakare taloh heran je jari inyaksi ewen.

³⁸ Ewen hamauh hai auhe, “Imberkat Raja je dumah huang aran Tuhan! Kasanang hong sorga tuntang tara akan Hatalla!”

³⁹Pire-pire oloh Parisi bara kare oloh are te hamauh dengan Yesus, “Bapa Guru, soho kare murid Bapa te suni.”

⁴⁰Yesus tombah, “Percaya bewei! Amon ewen suni, maka kare batu toh kareh mangkariak.”

⁴¹Katika Yesus sasar tokep dengan Yerusalem, tuntang mite lewu te, ie manangis.

⁴²Koae, “Pasim, puna bahalap toto jaka andau toh ikau katawan aton taloh je tau mimbit kadamai! Tapi toh ikau dia tau mitee.

⁴³Sinde katika ikau kareh mangkeme, katika musohm mawi karambang kaliling ikau; ewen kareh mangapong ikau tuntang mahenyek ikau bara hakaliling.

⁴⁴Ewen kareh mamparotek ikau dengan kakare oloh lewum sampai lepah; tuntang ije batu mahin jaton je tau ewen manaluae hasusun sama arepe huang ekae, basa ikau jaton manantuani katikae hamparea Hatalla dumah mangat manyalamat ikau!”

⁴⁵Yesus tame Human Tuhan tuntang nampara maharak kare oloh dagang hong hete.

⁴⁶ “Huang Surat Barasih,” Koae dengan ewen, “tarasurat kalotoh: Hatalla hamauh, ‘Humangku kareh manjadi huma eka balakudoa.’ Tapi keton mawie manjadi sarangan parampok!”

⁴⁷ Genep andau Yesus majar huang Human Tuhan. Kare imam kapala tuntang kare guru agama, hayak dengan kare pamimpin Yehudi handak mampatei Ie,

⁴⁸tapi ewen jaton sondau jalan uka malalus hal te, basa kakare oloh harajur mahining auh Aie, awi ewen paham rajin manyeneh kare auh Aie.