Read Ngaju LUKAS 2 Bible Online

LUKAS 2 - Ngaju bible

LUKAS 2

¹Hong katika te kaisar Agustus marentah uka salepah warga negara Karajaan Roma mandaptar arepe akan sensus.

²Sensus je solake toh ilalus metoh Kirenius manjadi gubernur hong daerah Siria.

³Kare oloh hong katika te uras haguet mandaptar arepe akan lewu ayu-ayue.

⁴Yosep kea mahin haguet bara Nasaret hong Galilea, akan Betlehem hong Yuda, eka Raja Dawid inakan; basa Yosep te turonan Dawid.

⁵Yosep mandaptar arepe haya-hayak dengan Maria tunangae te, je metoh te mimbit arepe.

⁶Metoh ewen hong Betlehem maka katikae jari sampai akan Maria uka luas.

⁷Ie manak ije biti anak hatue, iete anak je tambakase. Anak te imbungkuse hapan benang palus iingkese huang dulang, awi ewen jaton dinon huma je tau eka manyandehan.

⁸Hong alem te aton kare sakatik je metohe manjaga kare tabirie hong padang oru intu daerah te.

⁹Malekat Tuhan salenga mamparahan arepe akan ewen, tuntang kahain Tuhan paha-pahai manyingah ewen, tuntang ewen paham mikeh.

¹⁰Tapi malekat te hamauh, “Ela mikeh! Basa aku dumah mimbit barita bahalap akan keton — barita je paham mampahanjak oloh handiai.

¹¹Andau toh hong lewun Dawid jari inakan Raja Panyalamat keton iete Kristus Tuhan.

¹²Jetoh ie tandae: keton kareh sondau ije anak awau imbungkus hapan benang, tuntang impeter huang ije dulang.”

¹³Malekat te salenga impahayak awi are malekat beken, je manara Hatalla. Ewen hamauh,

¹⁴“Tara akan Hatalla intu langit hong ngambo! tuntang hunjun petak, kasanang akan olon je manyanang atei Tuhan!”

¹⁵Limbah kare malekat malihi ewen tuntang haluli akan sorga, kare sakatik te hamauh sama arepe, “Keleh itah akan Betlehem tuntang mite taloh je manjadi te, je insanan Tuhan akan itah.”

¹⁶Ewen bajeleng haguet, palus manyondau Maria tuntang Yosep, tuntang awau je metoh menter huang dulang.

¹⁷Katika kare sakatik te mite awau te, ewen manyarita taloh je insanan kare malekat tahiu awau te.

¹⁸Tuntang oloh handiai hengan mahining saritan kare sakatik te.

¹⁹Tapi Maria mingkes taloh handiai te huang ateie hayak mangumange.

²⁰Kare sakatik te haluli akan padang oru sambil manara tuntang mampahai Hatalla, tagal taloh handiai je jari ihining tuntang inampayah ewen, hakabuah toto kilau je insanan malekat.

²¹ Limbah umur hanya andau, anak te inyunat. Tuntang ewen manampa arae Yesus, aran je inenga malekat akae helo bara Ie inihi indue.

²² Maka katikae sampai akan Yosep tuntang Maria uka malalus hadat mamparasih manumon hukum Moses. Jadi, ewen mimbit anak te akan Yerusalem mangat inyarah akan Tuhan.

²³ Basa huang Hukum Tuhan tarasurat kalotoh, “Gagenep anak hatue je tambakase, musti inyarah akan Tuhan.”

²⁴Ewen kea mado maluput parapah iete ije pasang burong kuku atawa ije pasang burong dara tabela, sama kilau je iatoh huang Hukum Tuhan.

²⁵Hong katika te intu Yerusalem aton ije biti oloh je arae Simeon. Ie te oloh bahalap, je mikeh dengan Hatalla tuntang kanjerae mentai katikae Hatalla manyalamat Israel. Roh Hatalla mampahayak ie,

²⁶tuntang roh Hatalla jari mansanan akae, je ie dia akan matei helo bara mite Raja Panyalamat je injanji Tuhan.

²⁷Impahayak awi Roh Hatalla, Simeon tame akan huang Human Tuhan. Hong katika te Yosep tuntang Maria mimbit Yesus, anak je magon korik te tame uka malalus upacara je irentah hukum agama.

²⁸Maka Simeon manduan anak te tuntang mangkipite, palus manara Hatalla,

²⁹“Toh o Tuhan Ikau jari malalus janji Ayum. Keleh rewar Ayum toh mahutos dengan kasanang.

³⁰Basa hapan matangku kabuat aku jari mite Panyalamat je bara Ikau.

³¹Panyalamat je jari inatap Awim akan kare bangsa:

³² Kilau kalawa je mampalawa jalan akan kare bangsa beken, uka dumah manalih Ikau; iete kalawa je mimbit hormat akan bangsa Ayum Israel.”

³³Bapa tuntang indu anak te hengan mahining taloh je inyewut Simeon tahiu anak ewen.

³⁴Simeon mamberkat ewen tuntang hakotak dengan Maria, indu anak te, “Anak toh jari iintih awi Hatalla uka mambinasa tuntang uka manyalamat are oloh Israel. Ie kareh manjadi tanda bara Hatalla, je kareh ilawan awi are oloh,

³⁵tuntang awie kalote maka gitan kare taloh huang atei ewen. Kapehen atei kareh manusok ateim sama kilau padang je banyihi.”

³⁶Intu hete aton kea ije biti nabi bawi je bakas toto. arae te Hana, anak Panuel, bara suku Aser. Limbah uju nyelo kawin,

³⁷Hana manjadi balo, tuntang toh umure hanya puluh epat nyelo.[2] Dia puji ie malihi Human Tuhan. Handau-hamalem ie sombayang akan Hatalla intu hete hapan lakudoa tuntang puasa.

³⁸Pas hong katika te kea ie dumah, palus manara Hatalla tuntang hakotak tahiu anak te dengan kakare oloh je mentai katikae Hatalla mambebas Yerusalem.

³⁹ Limbah Yosep tuntang Maria malalus taloh handiai manumon Hukum Tuhan, ewen buli akan Nasaret hong Galilea.

⁴⁰Anak te sasar hai tuntang abas. Ie paham pintar harati tuntang inyayang toto awi Hatalla.

⁴¹ Genep nyelo oloh bakas ain Yesus haguet akan Yerusalem uka mahaga Andau Hai Paska.

⁴²Tuntang katika Yesus umur duewalas nyelo, ewen haguet akan pesta te kilau bahut.

⁴³Limbah pesta te ewen buli, tapi Yesus, Anak te, magon melai hong Yerusalem tuntang jaton ingatawan awi indu bapa Ayue.

⁴⁴Ewen manyangka Ie omba huang rombongan. Limbah mananjong janda-jandau, harue ewen manggau Ie huang marak kare tundah paharie tuntang kare kapatuh ewen.

⁴⁵Tapi ewen jaton sondau Ie, jadi ewen haluli akan Yerusalem manggau Ie.

⁴⁶Limbah telo andau manggau, ewen sondau ie huang Human Tuhan. Ie metohe mondok mahining auh kare guru agama tuntang mawi kare taloh isek.

⁴⁷Kakare oloh je mahining Ie uras hengan tagal kare auh tombah Ayue je cerdas te.

⁴⁸Oloh bakas Ayue mahin hengan mite Ie. Indue hamauh Dengae, “Nak, mbuhen Ikau mawie kalotoh dengan ikei? Kue bapa Aim gogop manggau Ikau!”

⁴⁹Yesus tombah, “Mbuhen bapa dengan umai manggau Aku? En bapa dengan umai dia katawan je Aku musti aton intu huang human Bapa-Ku?”

⁵⁰Tapi ewen dia harati auh tombah Yesus.

⁵¹Limbah te Yesus buli mampahayak ewen akan Nasaret, tuntang manumon auh ewen. Hal te samandiai uras iingkes awi indu Ayue huang ateie.

⁵² Yesus sasar mandahang kahaie tuntang sasar mandahang kaharatie, hayak ie inyayang awi Hatalla tuntang awi olon.